ನೆತ್ತರ ಓಕುಳಿಯಾಟಕ್ಕೆ ಹೋಳಿ ಹಬ್ಬದ ವೇದಿಕೆ... ಕ್ಷುಲ್ಲಕ ಕಾರಣಕ್ಕೆ ಬಿತ್ತು ಹೆಣ!

ಹೋಳಿ ಹಬ್ಬದಂದು ಕ್ಷುಲ್ಲಕ ವಿಚಾರಕ್ಕೆ ನಡೆದ ಗಲಾಟೆ ಕೊಲೆಯಲ್ಲಿ ಅಂತ್ಯಗೊಂಡಿದೆ. ಸದ್ಯ ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ಇಬ್ಬರು ಆರೋಪಿಗಳನ್ನ ಬೆಂಗಳೂರಿನ ಹನುಮಂತನಗರ ಪೊಲೀಸರು ಬಂಧಿಸಿದ್ದಾರೆ.

ಬೆಂಗಳೂರು:ಅದು ರಂಗು- ರಂಗಿನ ಹೋಳಿ ಹಬ್ಬ. ಇಡೀ ಬೆಂಗಳೂರು ಬಣ್ಣದ ಹೊಳೆಯಲ್ಲಿ ಮಿಂದು ಹೋಗಿದ್ರೆ, ಆ ಇಬ್ಬರು ಯುವಕರು ಮಾತ್ರ ಮುಂದೆ ನಡೆಯಲಿರುವ ಕೊಲೆ ಬಗ್ಗೆ ಚಿಂತಿಸುತ್ತಿದ್ರು.

ಬೆಂಗಳೂರಿನ ಹನುಮಂತನಗರ ಪೊಲೀಸ್ ಠಾಣಾ ವ್ಯಾಪ್ತಿಗೆ ಬರೋ ಕಾಳಿದಾಸ ಬಡಾವಣೆಯಲ್ಲಿ, ಏಪ್ರಿಲ್ 12ರಂದು ರಾತ್ರಿ 8: 30ಕ್ಕೆ ಓರ್ವಯುವಕನನ್ನ ಇರಿದು ಕೊಲೆಗೈಯ್ಯಲಾಗಿತ್ತು. ಆತನ ಹೆಸರು ಭರತ್ ಅಲಿಯಾಸ್ ಡಾಲಿ. ಈತನ ಮೇಲೆ ಹಲವಾರು ಠಾಣೆಗಳಲ್ಲಿ ಕೇಸುಗಳಿತ್ತು. ಕೊಲೆಯಾದ ಜಸ್ಟ್ 2 ದಿನಗಳ ಹಿಂದಷ್ಟೇ, ಭರತ್ ಜೈಲಿನಿಂದ ಹೊರಗೆ ಬಂದಿದ್ದ. ಹೀಗಿರುವಾಗ ಬಂದ ಮಾರನೇ ದಿನವೇ ಭರತ್​ನನ್ನ ಹೊಡೆದು ಕೊಂದು ಹಾಕಲಾಗಿತ್ತು.

ಪ್ರಕರಣ ದಾಖಲಿಸಿಕೊಂಡ ಹನುಮಂತನಗರ ಪೊಲೀಸರಿಗೆ ಅದೊಂದು ಸಿಸಿಟಿವಿ ದೃಶ್ಯ ಸಿಕ್ಕಿತ್ತು. ಸಿಸಿಟಿವಿಯ ದೃಶ್ಯದಲ್ಲಿ ಭರತ್​ನನ್ನ ಕೊಲೆಗೈದಿದ್ದು ಸ್ಪಷ್ಟವಾಗಿತ್ತೇ ವಿನಃ, ಕೊಲೆಗಾರರ ಮುಖಗಳ ಸ್ಪಷ್ಟ ಗುರುತು ಸಿಗಲಿಲ್ಲ. ಪ್ರಕರಣ ದಾಖಲಿಸಿಕೊಂಡ ಪೊಲೀಸರು, ಸಿಸಿಟಿವಿ ಹಾಗೂ ಸ್ಥಳೀಯರ ಮಾಹಿತಿಯ ಮೇರೆಗೆ ಸದ್ಯ ವಿನೋದ್ ಮತ್ತು ಆಕಾಶ್ ಎಂಬ ಇಬ್ಬರನ್ನ ಬಂಧಿಸಿದ್ದಾರೆ.

ಇಲ್ಲಿ ದುರಂತ ಅಂದ್ರೆ, ಭರತ್​ನ ಹತ್ಯೆಗೆ ಕಾರಣವಾಗಿದ್ದು ಹೋಳಿ ಹಬ್ಬದ ದಿನ ನಡೆದ ಕ್ಷುಲ್ಲಕ ಜಗಳ. ಕಾಳಿದಾಸ ಲೇಔಟ್​ನಲ್ಲಿ ಭರತ್ ಬಿಯರ್ ಕುಡಿಯುತ್ತ ಕುಳಿತಿದ್ದ. ಅಂದು ವಿನೋದ್ ಮತ್ತು ಆಕಾಶ್​ಗೆ ಭರತ್ ಬಣ್ಣ ಹಾಕಿದ್ದ. ಆ ವೇಳೆ ಎಳೆದಾಡಿ ನೂಕಾಡಿದ ಅಂತ ಜಗಳವೂ ಆಗಿತ್ತು. ಈ ವೇಳೆ ಭರತ್, ವಿನೋದನ ತಲೆಗೆ ಕುಡಿಯುತ್ತಿದ್ದ ಬಿಯರ್ ಬಾಟಲಿಯಿಂದ ಹೊಡೆದಿದ್ದ. ಇಡೀ ಏರಿಯಾದ ಜನರೆದುರು ಭರತ್ ತಮಗೆ ಬಿಯರ್ ಬಾಟಲಿಯಿಂದ ಹೊಡೆದ ಅನ್ನೋದು ಈ ಇಬ್ಬರ ಅವಮಾನಕ್ಕೆ ಕಾರಣವಾಗಿತ್ತು. ಅದೇ ರೋಷದಲ್ಲಿ ಸ್ಕೆಚ್ ರೂಪಿಸಿದ ಈ ಇಬ್ಬರು ಯುವಕರು, ಅಂದು ಸಂಜೆ ಕಂಠ ಪೂರ್ತಿ ಕುಡಿದು ಮನೆಗೆ ವಾಪಸ್ ಬರುತ್ತಿದ್ದ ಭರತ್​ನನ್ನ ಮನೆ ಕೂಗಳತೆ ದೂರದಲ್ಲೇ ಇರಿದು ಹತ್ಯೆಗೈದು ಪರಾರಿಯಾಗಿದ್ರು. ಸದ್ಯ, ಪ್ರಕರಣ ಭೇದಿಸಿರೋ ಹನುಮಂತನಗರ ಪೊಲೀಸರು ಆರೋಪಿಗಳನ್ನ ಬಂಧಿಸಿದ್ದಾರೆ.