ರಾಜಧಾನಿಯಲ್ಲಿವೆ 1288 ಪಾರ್ಕ್​ಗಳು: ನಿರ್ವಹಣೆಯದ್ದೇ ಕೊರತೆ

ಸಿಲಿಕಾನ್​ ಸಿಟಿಯಲ್ಲಿ ಸಾವಿರಕ್ಕೂ ಅಧಿಕ ಪಾರ್ಕ್​ಗಳಿದ್ದರೂ ಅವುಗಳ ನಿರ್ವಹಣೆ ಮಾತ್ರ ಅಷ್ಟಕಷ್ಟೇ. ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆಯಲ್ಲಿ ಪಾರ್ಕ್​​ಗಳ ನಿರ್ವಹಣೆಗೆ ಪ್ರತ್ಯೇಕ ವಿಭಾಗವಿದ್ದರೂ ಪ್ರಯೋಜನ ಇಲ್ಲವಾಗಿದೆ. ಪಾರ್ಕ್​​​ಗಳನ್ನು ಅಭಿವೃದ್ಧಿಪಡಿಸುವ ಅಧಿಕಾರಿಗಳು ನಿರ್ಲಕ್ಷ್ಯ ತೋರುತ್ತಿದ್ದಾರೆ ಎಂದು ಸಾರ್ವಜನಿಕರು ಆರೋಪಿಸಿದ್ದಾರೆ.

ಬೆಂಗಳೂರು:ರಾಜಧಾನಿಗೆ ಉದ್ಯಾನ ನಗರಿ ಎಂಬ ವಿಶೇಷಣವನ್ನು ಅಂಟಿಸಲು ಕಾರಣವಾಗಿರುವ ಪಾರ್ಕ್​​ಗಳೆಲ್ಲ ಅಭಿವೃದ್ಧಿಯಿಂದ ದೂರ ಉಳಿದಿವೆ. ಒಂದು ಕಾಲದಲ್ಲಿ ಬೆಂಗಳೂರಿನಲ್ಲಿ ಉದ್ಯಾನವನಗಳೇ ತುಂಬಿದ್ದ ಜಾಗದಲ್ಲಿ ಈಗ ಮುಗಿಲೆತ್ತರದ ಕಟ್ಟಡಗಳನ್ನು ಕಾಣಬಹುದು. ರಸ್ತೆಯೇ ಕಾಣದ ರೀತಿ ಕಾಂಕ್ರಿಟ್ ಕಾಡಾಗಿ ಬೆಳೆದಿದೆ. ಈ ಮಧ್ಯೆ ನಗರದ ತಾಪಮಾನವನ್ನು ನಿಯಂತ್ರಿಸಬಲ್ಲ ಮತ್ತು ಸೌಂದರ್ಯವನ್ನು ಹೆಚ್ಚಿಸಬಲ್ಲ ಉದ್ಯಾನವನಗಳೂ ಇವೆ. ಆದರೆ, ನಿರ್ವಹಣೆ ಕೊರತೆ ಎದ್ದು ಕಾಣುತ್ತಿದೆ.

ಅದಲ್ಲದೆ, ಪಾರ್ಕ್​​ಗಳ ನಿರ್ವಹಣೆ ಹಾಗೂ ಭೂಗಳ್ಳರಿಂದ ರಕ್ಷಣೆಯೂ ಅಷ್ಟೇ ಸವಾಲಾಗಿದೆ. ಮಳೆ ನೀರುಗಾಲುವೆಗಳು, ಕೆರೆಗಳ ಒತ್ತುವರಿ, ಬಫರ್ ಝೋನ್​​ಗಳ ಒತ್ತುವರಿ ಎಗ್ಗಿಲ್ಲದೆ ನಡೆದಿದೆ. ಪಾರ್ಕ್ ಜಾಗಗಳು ಸೀಮಿತವಾಗಿರುವುದರಿಂದ ಮೊದಲೇ ಬೇಲಿ (ಫೆನ್ಸಿಂಗ್) ಹಾಕಿ ರಕ್ಷಿಸಲಾಗಿದೆ. ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆಯಲ್ಲಿ ಪಾರ್ಕ್​​ಗಳ ನಿರ್ವಹಣೆಗೆ ಪ್ರತ್ಯೇಕ ವಿಭಾಗವಿದ್ದರೂ ಪ್ರಯೋಜನ ಇಲ್ಲವಾಗಿದೆ. ಇನ್ನು ಕಬ್ಬನ್ ಪಾರ್ಕ್, ಲಾಲ್​​ಬಾಗ್​ನಂತಹ ಬೃಹತ್ ಉದ್ಯಾನಗಳನ್ನು ತೋಟಗಾರಿಕಾ ಇಲಾಖೆ ನೋಡಿಕೊಳ್ಳುತ್ತಿದೆ.

ರಾಜಧಾನಿಯಲ್ಲಿ ಪಾರ್ಕ್​​ಗಳ ವಿವರ

ಬಿಬಿಎಂಪಿ ವಲಯ	ಪೂರ್ವ	ಪಶ್ಚಿಮ	ದಕ್ಷಿಣ	ಯಲಹಂಕ	ಬೊಮ್ಮನಹಳ್ಳಿ	ಆರ್​.ಆರ್​.ನಗರ	ಮಹದೇವಪುರ	ದಾಸರಹಳ್ಳಿ	ಒಟ್ಟು
ಪಾರ್ಕ್​​ಗಳ ಸಂಖ್ಯೆ	278	213	345	112	120	157	26	37	1,288

ಗುತ್ತಿಗೆದಾರರ ನಿರ್ವಹಣೆಗೆ 696 ಪಾರ್ಕ್​​ಗಳು

ನಗರದಲ್ಲಿ ಒಟ್ಟು 1,288 ಪಾರ್ಕ್​​ಗಳ ಪೈಕಿ 1,247 ಅಭಿವೃದ್ಧಿಪಡಿಸಿದ, ನೂತನ ಉದ್ಯಾನಗಳು ಸೇರಿದಂತೆ 278 ಪಾರ್ಕ್​​​ಗಳನ್ನು ಅಭಿವೃದ್ಧಿಪಡಿಸಬೇಕಿದೆ ಎಂದು ತೋಟಗಾರಿಕಾ ವಿಭಾಗದ ಉಪನಿರ್ದೇಶಕ ಎಸ್.ಗಂಗಾಧರ್ ಸ್ವಾಮಿ ಅವರು ಈಟಿವಿ ಭಾರತಕ್ಕೆ ಮಾಹಿತಿ ನೀಡಿದರು. 696 ಪಾರ್ಕ್​​​ಗಳು ಖಾಸಗಿ ಗುತ್ತಿಗೆದಾರರು, 429 ಉದ್ಯಾನಗಳನ್ನು ಬಿಬಿಎಂಪಿಯೇ ನಿರ್ವಹಣೆ ಮಾಡುತ್ತಿದೆ. ಅವುಗಳನ್ನು ಸರಿಯಾಗಿ ನೋಡಿಕೊಳ್ಳದ ಕಾರಣ, ಸ್ವಚ್ಛತೆಯಿಂದ ದೂರ ಉಳಿದಿವೆ. ಎಷ್ಟೋ ಗಿಡ-ಮರಗಳು ಒಣಗಿ ಹೋಗುತ್ತಿವೆ. ಇತ್ತ ವಾಯುವಿಹಾರಿಗಳೂ ಹೆಜ್ಜೆ ಇಡಲು ಹಿಂದು-ಮುಂದು ನೋಡುತ್ತಾರೆ.

ಸಾಮಾಜಿಕ ಕಾರ್ಯಕರ್ತ ಸಾಯಿದತ್ತ ಮಾತನಾಡಿ, ಬಿಬಿಎಂಪಿ ಪಾರ್ಕ್​​ಗಳಿಗೆ ನಿರ್ವಹಣೆ ಕೊರತೆ ಇದ್ದು, ಹಲವೆಡೆ ಅನ್ಯ ಉದ್ದೇಶಗಳಿಗೆ ಬಳಕೆಯಾಗಿರುವುದು ದುರಂತ. ಪಾಲಿಕೆ ಕೋರ್ ಏರಿಯಾಗಳಲ್ಲಿ ಫೆನ್ಸಿಂಗ್ ಹಾಕಿರುವುದರಿಂದ ಒತ್ತುವರಿಯಾಗುತ್ತಿಲ್ಲ‌. ಆದರೆ, ಬಿಡಿಎ ನಿರ್ಮಿಸಿರುವ ಹೊಸ ಲೇಔಟ್​ಗಳಲ್ಲಿ ಜಾಗ ಗುರುತಿಸಿದ್ದರೂ ಇನ್ನೂ ಪಾರ್ಕ್ ಅಭಿವೃದ್ಧಿಪಡಿಸಿಲ್ಲ. ಪಾರ್ಕ್​​ಗಳಲ್ಲಿ ಗಿಡ ನೆಡುತ್ತೇವೆ ಎಂದು ಹೇಳುತ್ತಿರುವ ಬಿಬಿಎಂಪಿ, ಇದರ ಸರಿಯಾದ ಲೆಕ್ಕ ಕೊಡುವಲ್ಲಿ ಹಿಂದೇಟು ಹಾಕುತ್ತಿದೆ. ಈ ವಿಚಾರದಲ್ಲಿ ಅಕ್ರಮ ನಡೆದಿರುವ ಸಾಧ್ಯತೆ ಹೆಚ್ಚು ಎಂದರು.