ಬೆಂಗಳೂರು: ಉದ್ಯಾನ ನಗರಿ ಬೆಂಗಳೂರು ರಾಜ್ಯದಲ್ಲಿ ಅತೀ ಹೆಚ್ಚು ಸೋಂಕಿತರು ಹಾಗೂ ಸಕ್ರಿಯ ಪ್ರಕರಣಗಳಿರುವ ನಗರ. ಅಷ್ಟೇ ಅಲ್ಲ ದೇಶದಲ್ಲೇ 2ನೇ ಹೆಚ್ಚು ಸಕ್ರಿಯ ಪ್ರಕರಣಗಳಿರುವ ನಗರ ಅಂದರೆ ಅದು ಬೆಂಗಳೂರು. ಇಷ್ಟರ ಪ್ರಮಾಣದಲ್ಲಿ ಸಕ್ರಿಯ ಪ್ರಕರಣಗಳು ಇರುವ ಈ ನಗರದಲ್ಲಿ ಐಸಿಯು ಹಾಸಿಗೆಗಳ ಕೊರತೆ ಎದುರಾಗಿದ್ದು, ರೋಗಿಗಳು ಪರದಾಡುವ ಪರಿಸ್ಥಿತಿ ಎದುರಾಗಿದೆ.
ರಾಜ್ಯದಲ್ಲಿ ಸೆಪ್ಟೆಂಬರ್ ತಿಂಗಳಿನ ಆರಂಭದಿಂದಲ್ಲೂ ನಿತ್ಯ 9 ಸಾವಿರಕ್ಕೂ ಅಧಿಕ ಮಂದಿಗೆ ಸೋಂಕು ತಗುಲಿತ್ತಿದೆ. 800ಕ್ಕೂ ಹೆಚ್ಚು ಜನರು ಐಸಿಯು‌ನಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಈ ನಡುವೆ ಬೆಂಗಳೂರಿನಲ್ಲಿ ಐಸಿಯು ಬೆಡ್ಗಳ ಕೊರತೆ ಉಂಟಾಗಿದೆ. ಐಸಿಯು ಬೆಡ್ ಇಲ್ಲ ಎಂಬ ಹಳೇ ಮಾತು ಕೇಳಿ ಬರುತ್ತಿರುವ ಕಾರಣ ರೋಗಿಗಳು ಖಾಸಗಿ ಆಸ್ಪತ್ರೆಗಳ ಮೊರೆ ಹೋಗುತ್ತಿದ್ದಾರೆ. ಹೀಗಾಗಿ ಪಾಲಿಕೆ ಎಚ್ಚೆತುಕೊಳ್ಳುತ್ತಿದೆ.
ಈ ಸಂಬಂಧ ಮಾಹಿತಿ ನೀಡಿರುವ ಬಿಬಿಎಂಪಿ ವಿಶೇಷ ಆಯುಕ್ತ ರಂದೀಪ್, ಖಾಸಗಿ ಆಸ್ಪತ್ರೆಗಳಿಗೆ ಕೋವಿಡ್ ರೋಗಿಗಳನ್ನು ಶಿಫಾರಸು ಮಾಡಿದರೆ ಆ ಆಸ್ಪತ್ರೆಗಳು ಐಸಿಯು ಬೆಡ್ಗಳಿಲ್ಲ ಎಂದು ವಾಪಸ್ ಕಳಿಸುತ್ತಿವೆ. ಅಂಕಿ-ಅಂಶದ ಪ್ರಕಾರ 400 ಐಸಿಯು ಬೆಡ್ಗಳಿವೆ. ಆದರೆ, ಬೇರೆ ಬೇರೆ ಕಾರಣ ನೀಡಿ ಇಲ್ಲಿ ಬೆಡ್ ಇಲ್ಲ, ಸಿಬ್ಬಂದಿ ಇಲ್ಲ ಎಂದು ರೋಗಿಗಳನ್ನು ವಾಪಸ್ ಕಳುಹಿಸುತ್ತಿರುವುದು ಗೊತ್ತಾಗಿದೆ. ನಮ್ಮ ಗಮನಕ್ಕೆ ಬಂದಂತೆ ಖಾಸಗಿ ಆಸ್ಪತ್ರೆಗಳು ಕೋವಿಡೇತರ ರೋಗಿಗಳನ್ನು ದಾಖಲು ಮಾಡಿಕೊಳ್ಳುತ್ತಿದ್ದಾರೆ. ಹೀಗಾಗಿ, ಸರ್ಕಾರಕ್ಕೆ ನೀಡಬೇಕಿರುವ ಶೇ.50ರಷ್ಟು ಹಾಸಿಗೆಗಳ ಕೊರತೆ ಎದುರಾಗುತ್ತಿವೆ ಎಂದರು.
ಬಿಬಿಎಂಪಿ ವಿಶೇಷ ಆಯುಕ್ತ ರಂದೀಪ್ ಶೋಕಾಸ್ ನೋಟಿಸ್ ನೀಡಲು ತೀರ್ಮಾನ:100-150 ಹಾಸಿಗೆಗಳ ಸಾಮರ್ಥ್ಯವುಳ್ಳ ಸುಮಾರು 20 ಆಸ್ಪತ್ರೆಗಳಿಗೆ ವಿಕೋಪ ನಿಯಂತ್ರಣ ಕಾಯ್ದೆಯಡಿ ಹಾಗೂ ಕೆಪಿಎಂ‌ಇ ನೋಟಿಸ್ ನೀಡಲು ಪಾಲಿಕೆ ಆಯುಕ್ತರು ತಯಾರಿ ನಡೆಸಿದ್ದಾರೆ. 48 ಗಂಟೆಯೊಳಗೆ ಎಲ್ಲ ರೋಗಿಗಳ ಮಾಹಿತಿ ನೀಡಬೇಕು. ನಿಗದಿಪಡಿಸಿರುವ ಶೇ.50ರಷ್ಟು ಬೆಡ್ಗಳಲ್ಲಿ ಎಷ್ಟು ಬಳಕೆಯಾಗಿವೆ ಎಂಬ ಮಾಹಿತಿ ನೀಡುವಂತೆ ಶೋಕಾಸ್ ನೋಟಿಸ್ ನೀಡಲಿದ್ದಾರೆ. ಉತ್ತರ ಕೊಡದೇ ಇದ್ದರೆ ಲೈಸೆನ್ಸ್ ರದ್ದುಪಡಿಸುವ ಜೊತೆಗೆ ಆಸ್ಪತ್ರೆಯನ್ನು ಟೇಕ್ ಓವರ್ ಮಾಡುವ ಎಚ್ಚರಿಕೆ ನೀಡಿದ್ದಾರೆ ಎಂದರು.
ಐಸಿಯು ಬೆಡ್ಗಳ ಸಂಖ್ಯೆ ಹೆಚ್ಚಿಸಲು ನಿರ್ಧಾರ:ಇತ್ತ ಸರ್ಕಾರಿ ಆಸ್ಪತ್ರೆಯಲ್ಲಿ ಐಸಿಯು ಬೆಡ್ಗಳ ಕೊರತೆ ಉಂಟಾಗದಂತೆ ನೋಡಿಕೊಳ್ಳಲು ಸರ್ಕಾರವೂ ನಿರ್ದೇಶನ ನೀಡಿದೆ. ವಿಕ್ಟೋರಿಯಾ ಆಸ್ಪತ್ರೆಯಲ್ಲಿ 20 ಹಾಗೂ ಸಿ.ವಿ.ರಾಮನ್ ಆಸ್ಪತ್ರೆಯಲ್ಲಿ ಹೆಚ್ಚುವರಿ 20 ಐಸಿಯು ಬೆಡ್ಗಳು ಒಂದು ವಾರದಲ್ಲಿ ಸಜ್ಜಾಗಲಿದೆ ಎಂದು ರಂದೀಪ್ ತಿಳಿಸಿದರು. ಜೊತೆಗೆ 100 ವೆಂಟಿಲೇಟರ್ ಬೆಡ್ಗಳನ್ನು ಖಾಸಗಿ ಆಸ್ಪತ್ರೆಗೆ ನೀಡುವ ಸಂಬಂಧವೂ ಚಿಂತನೆ ನಡೆಯುತ್ತಿದೆ ಎಂದರು.
