ಇನ್ನೆರಡು ದಿನಗಳಲ್ಲಿ ಸ್ವಂತ ಊರಿಗೆ ತೆರಳಲಿದ್ದಾರೆ ಹೊಂಗಸಂದ್ರ ವಲಸೆ ಕಾರ್ಮಿಕರು: ಬಿಬಿಎಂಪಿ ಆಯುಕ್ತ

ಮನೆಗೆ ಹೋಗುವ ಆತುರದಲ್ಲಿ ಸಮಾಜದ ಹಿತ ಕಾಯದೆ ಇಡೀ ಬೆಂಗಳೂರನ್ನು ಸಮಸ್ಯೆಗೆ ಒಡ್ಡುವ ರೀತಿ ಖಂಡನೀಯ ಎಂದು ಆಯುಕ್ತರು ಹೇಳಿದರು. ಕ್ವಾರಂಟೈನ್​​ಗೆ ಒಪ್ಪದೆ ಪ್ರತಿಭಟನೆ ಮುಂದುವರಿಸಿದರೆ ಕಾನೂನಿನಂತೆ ಕ್ರಮ ಕೈಗೊಳ್ಳಬೇಕಾಗುತ್ತದೆ ಎಂದು ಬಿಬಿಎಂಪಿ ಆಯುಕ್ತರು ಎಚ್ಚರಿಸಿದರು.

ಬೆಂಗಳೂರು: ಹೊಂಗಸಂದ್ರ ವಾರ್ಡ್​ನಲ್ಲಿದ್ದ ವಲಸೆ ಕಾರ್ಮಿಕರ ಕ್ವಾರಂಟೈನ್ ಅವಧಿ ಮುಗಿದಿದೆ. ಜೊತೆಗೆ 132 ಜನಕ್ಕೆ ನೆಗೆಟಿವ್ ರಿಪೋರ್ಟ್ ಬಂದಿರುವುದರಿಂದ ಕ್ವಾರಂಟೈನ್ ಮುಕ್ತ ಮಾಡಿ ಊರಿಗೆ ಕಳಿಸಿಕೊಡಲು ಒತ್ತಾಯಿಸುತ್ತಿದ್ದಾರೆ.

ಈಗಾಗಲೇ ಸೇವಾ ಸಿಂಧು ವೆಬ್​ಸೈಟ್​​ನಲ್ಲಿ ಊರಿಗೆ ಹೋಗಲು ಹೆಸರು ನೋಂದಾಯಿಸಲಾಗಿದೆ. ಒಂದು ಟ್ರೈನ್​​ನಲ್ಲಿ ಅವಕಾಶ ಸಿಗದ ಕಾರಣ ಇನ್ನೆರಡು ದಿನಗಳಲ್ಲಿ ಬಿಹಾರ ಸೇರಿದಂತೆ ವಿವಿಧ ರಾಜ್ಯಗಳಿಗೆ ಕಳಿಸುವ ವ್ಯವಸ್ಥೆ ಮಾಡಲಾಗುವುದು ಎಂದು ಬಿಬಿಎಂಪಿ ಆಯುಕ್ತ ಬಿ.ಹೆಚ್.ಅನಿಲ್ ಕುಮಾರ್ ತಿಳಿಸಿದರು.

ಕ್ವಾರಂಟೈನ್​​ಗೆ ಒಪ್ಪದಿದ್ದರೆ ಕಾನೂನು ರೀತಿ ಕ್ರಮ ಜಾರಿ:

ದೆಹಲಿಯಿಂದ ಬೆಂಗಳೂರಿಗೆ ಬಂದ ರೈಲಿನ ಪ್ರಯಾಣಿಕರನ್ನು ರಾಜ್ಯ ಸರ್ಕಾರದ ನಿರ್ದೇಶನದ ಮೇರೆಗೆ ಹೋಟೆಲ್ ಕ್ವಾರಂಟೈನ್ ಮಾಡಲಾಗಿದೆ. ಆದರೆ ಕೆಲವು ಜನ ಈ ಮಾಹಿತಿ ಮೊದಲೇ ಇರಲಿಲ್ಲವೆಂದು ಕ್ವಾರಂಟೈನ್‍ಗೆ ಒಪ್ಪದೆ ಪ್ರತಿಭಟನೆ ನಡೆಸುತ್ತಿದ್ದಾರೆ. ಇದು ಅವರ ಸಾಮಾಜಿಕ ಕಳಕಳಿ ಎತ್ತಿತೋರಿಸ್ತದೆ.

ಮನೆಗೆ ಹೋಗುವ ಆತುರದಲ್ಲಿ ಸಮಾಜದ ಹಿತ ಕಾಯದೆ ಇಡೀ ಬೆಂಗಳೂರನ್ನು ಸಮಸ್ಯೆಗೆ ಒಡ್ಡುವ ರೀತಿ ಖಂಡನೀಯ ಎಂದು ಆಯುಕ್ತರು ಹೇಳಿದರು. ಕ್ವಾರಂಟೈನ್​​ಗೆ ಒಪ್ಪದೆ ಪ್ರತಿಭಟನೆ ಮುಂದುವರಿಸಿದರೆ ಕಾನೂನಿನಂತೆ ಕ್ರಮ ಕೈಗೊಳ್ಳಬೇಕಾಗುತ್ತದೆ ಎಂದು ಬಿಬಿಎಂಪಿ ಆಯುಕ್ತರು ಎಚ್ಚರಿಸಿದರು.