’ಲೋಕಾಯುಕ್ತ ನಿಷ್ಕ್ರಿಯಗೊಳಿಸಿದ್ದು ಹಿಂದಿನ ಸರ್ಕಾರ’: ಎಸ್ ಎಂ ಕೃಷ್ಣ ಆರೋಪ

ಲೋಕಾಯುಕ್ತ ಸಂಸ್ಥೆಯನ್ನು ನಿಷ್ಕ್ರಿಯಗೊಳಿಸಿದ್ದು ಹಿಂದಿನ ಸರ್ಕಾರ ಎನ್ನುವ ಮೂಲಕ ಎಸ್​ ಎಂ ಕೃಷ್ಣ ಪರೋಕ್ಷವಾಗಿ ಮಾಜಿ ಸಿಎಂ ಸಿದ್ದರಾಮಯ್ಯ ಹೆಸರು ಹೇಳದೆ ಆರೋಪಿಸಿದರು. ನಿವೃತ್ತ ಲೋಕಾಯುಕ್ತ ವೆಂಕಟಾಚಲ ಅಂತಿಮ‌ ದರ್ಶನದ ವೇಳೆ ಮಾತನಾಡಿದ ಅವರು, ಮತ್ತೆ ಲೋಕಾಯುಕ್ತ ಪುನಶ್ಚೇತನ ಆಗಬೇಕಿದೆ. ಆ ನಿಟ್ಟಿನಲ್ಲಿ ಯಡಿಯೂರಪ್ಪ ಸರ್ಕಾರ ಕೆಲಸ ಮಾಡಬೇಕಿದೆ ಎಂದಿದ್ದಾರೆ.

ಬೆಂಗಳೂರು:ಸದಾಶಿವನಗರ ನಿವಾಸದ ಬಳಿ ನಿವೃತ್ತ ಲೋಕಾಯುಕ್ತ ವೆಂಕಟಾಚಲ ಅವರ ಮೃತದೇಹವನ್ನು ಅಂತಿಮ ದರ್ಶನಕ್ಕೆ ಇಟ್ಟು ವಿಧಿ-ವಿಧಾನಗಳನ್ನ ಕುಟುಂಬಸ್ಥರು ಮನೆಯ ಎದುರು ನೆರವೇರಿಸಿದರು. ಈ ವೇಳೆ, ಈಗಿನ ಲೋಕಾಯುಕ್ತ ವಿಶ್ವನಾಥ ಶೆಟ್ಟಿ, ಮಾಜಿ ಸಿಎಂ ಎಸ್​ಎಂ ಕೃಷ್ಣ, ವೆಂಕಟಾಚಲ‌ ಅವರ ಅಂತಿಮ‌ ದರ್ಶನ ಪಡೆದರು.

ಇದೇ ವೇಳೆ, ಲೋಕಾಯುಕ್ತವನ್ನು ನಿಷ್ಕ್ರಿಯಗೊಳಿಸಿದ ಈ ಹಿಂದಿನ ಸರ್ಕಾರ ಎಂದು ಆರೋಪಿಸಿದರು. ವೆಂಕಟಾಚಲ ಅವರು ಲೋಕಾಯುಕ್ತ ಅಂದ್ರೆ ಏನು ಅನ್ನೋದನ್ನು ತೋರಿಸಿದ್ರು. ಅವರ ನಂತರ ಲೋಕಾಯುಕ್ತ ನ್ಯಾಯಮೂರ್ತಿ ಸಂತೋಷ್ ಹೆಗ್ಡೆಯವರು ಅದನ್ನು ಇನ್ನೂ ವೇಗದಿಂದ ಮುಂದುವರಿಸಿದ್ರು. ಆದ್ರೆ ಹಿಂದಿನ ಸರ್ಕಾರ ಅದನ್ನ ಕೇವಲ ನಾಮಕೇವಾಸ್ತೆ ರೀತಿ ಮಾಡಿದೆ. ಯಾವ ಉದ್ದೇಶಕ್ಕೆ ಈ ರೀತಿ ಮಾಡಿದ್ರು ಎಂದು ಗೊತ್ತಿಲ್ಲ. ಮತ್ತೆ ಲೋಕಾಯುಕ್ತ ಪುನಶ್ಚೇತನ ಆಗಬೇಕಿದೆ. ಆ ನಿಟ್ಟಿನಲ್ಲಿ ಯಡಿಯೂರಪ್ಪ ಸರ್ಕಾರ ಕೆಲಸ ಮಾಡಬೇಕಿದೆ ಎಂದರು.

ಇದೇ ವೇಳೆ ಜಸ್ಟೀಸ್​ ಎನ್ ವೆಂಕಟಾಚಲ ಅವರ ಗುಣಗಾನ ಮಾಡಿದ ಎಸ್​ ಎಂ ಕೃಷ್ಣ, ನಾವು ಕಾಲೇಜಿನಲ್ಲೇ ಒಟ್ಟಿಗೆ ಓದುತ್ತಿದ್ವಿ. ಅವರ ಕೆಲಸ ಎಲ್ಲರೂ ಮೆಚ್ಚುವಂತದ್ದು. ಅವರ ಆತ್ಮಕ್ಕೆ ಶಾಂತಿ ಸಿಗಲಿ ಎಂದು ತಿಳಿಸಿದರು.

ಇನ್ನು ಕುಟುಂಬಸ್ಥರು, ವೆಂಕಾಟಾಚಲ‌ ಅವರ ಪಾರ್ಥಿವ ಶರೀರವನ್ನು ಹೆಬ್ಬಾಳದ ಚಿತಾಗಾರದಲ್ಲಿ ಅಂತಿಮ ವಿಧಿ-ವಿಧಾನಗಳ ಮೂಲಕ ಅಂತ್ಯಸಂಸ್ಕಾರ ನೆರವೇರಿಸಲಿದ್ದಾರೆ.