ಬೆಂಗಳೂರು: ಪರಪ್ಪನ ಅಗ್ರಹಾರ ಜೈಲಿನಲ್ಲಿ ನಡೆಯುವ ಅಕ್ರಮಗಳನ್ನು ತಹಬದಿಗೆ ತರಲು ಇಲಾಖೆ ಮುಂದಾಗಿದ್ದು, ಇನ್ಮುಂದೆ ಸಜಾಬಂಧಿಗಳಿಗೆ ಬರುವ ಕೊರಿಯರ್ ಹಾಗೂ ಯಾವುದೇ ರೀತಿಯ ಪಾರ್ಸೆಲ್ಗಳಿಗೆ ನಿಷೇಧ ಹೇರಲಾಗಿದೆ. ಜೈಲಿನಲ್ಲಿರುವ ಸಜಾಬಂಧಿಗಳ ಸ್ನೇಹಿತರು, ಸಂಬಂಧಿಗಳು ಹಾಗೂ ಅಪರಿಚಿತರಿಂದ ಪರಪ್ಪನ ಅಗ್ರಹಾರ ಜೈಲಿಗೆ ಅನುಮತಿ ಇಲ್ಲದೆ ಪತ್ರಗಳು, ಕೊರಿಯರ್ ಹಾಗೂ ಪಾರ್ಸೆಲ್ಗಳನ್ನು ಕಳುಹಿಸದಂತೆ ಹೊಸ ನಿಯಮ ಜಾರಿಗೆ ತರಲಾಗಿದೆ.
ಒಂದು ವೇಳೆ ಪಾರ್ಸೆಲ್ ಕಳುಹಿಸಬೇಕಾದ ಅನಿವಾರ್ಯವಿದ್ದರೆ ಒಂದು ವಾರದ ಮುಂಚೆಯೇ ಜೈಲಿ‌ನ ಮುಖ್ಯ ಅಧೀಕ್ಷಕರಿಂದ ಅನುಮತಿ ಪಡೆಯುವುದು ಕಡ್ಡಾಯ. ಅನುಮತಿ ಪಡೆಯದೇ ಹೋದರೆ ಪಾರ್ಸೆಲ್ಗಳನ್ನು ಬಂದ ವಿಳಾಸಕ್ಕೆ ಹಿಂದೆ ಕಳುಹಿಸಲಾಗುವುದು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಅಪರಿಚಿತರ ಹೆಸರಿನಲ್ಲಿ ಡ್ರಗ್ಸ್ ಪಾರ್ಸೆಲ್ ಮಾಡಿ ಕೆಲ ಕೈದಿಗಳನ್ನು ಸಿಲುಕಿಸಲು ಜೈಲಲ್ಲಿರುವವರಿಂದ ಷಡ್ಯಂತ್ರ ನಡೆದಿರುವುದು ಬೆಳಕಿಗೆ ಬಂದಿದೆ. ಗಾಂಜಾ, ಬೀಡಿ ಮಾದಕವಸ್ತುಗಳನ್ನು ಅಪರಿಚಿತರ ಹೆಸರಲ್ಲಿ ಪಾರ್ಸೆಲ್ ಕಳುಹಿಸಲಾಗುತ್ತಿತ್ತು. ಪಾರ್ಸೆಲ್ ಬಂದಿದ್ದ ಕೈದಿಯ ಹೆಸರು ನೋಡಿ ಕ್ರಮ ಕೈಗೊಳ್ಳುವ ಜೈಲಾಧಿಕಾರಿಗಳಿಗೆ ಅನುಮಾನ ಮೂಡುತ್ತಿತ್ತು. ಈ ಕುರಿತಾಗಿ ಕೆಲ ಕೈದಿಗಳು ಮತ್ತು ಸಿಬ್ಬಂದಿ ಜೈಲಾಧಿಕಾರಿಗಳಿಗೆ ಮಾಹಿತಿ ನೀಡಿದ್ದರು. ಹಾಗಾಗಿ ಜೈಲು ಮುಖ್ಯ ಅಧೀಕ್ಷಕ ರಮೇಶ್ ಹೊಸ ಗೈಡ್ ಲೈನ್ಸ್ ತಂದಿದ್ದಾರೆ.
ಆದೇಶದಲ್ಲಿ ಏನಿದೆ ?:ಪರಪ್ಪನ ಅಗ್ರಹಾರ ಪೊಲೀಸ್‌ ಠಾಣೆಯಲ್ಲಿ ಜೈಲಿಗೆ ಕೊರಿಯರ್, ಪಾರ್ಸೆಲ್ ಮೂಲಕ ನಿಷೇಧಿತ ವಸ್ತುಗಳು ಪೂರೈಕೆಯಾಗಿರುವ ಕುರಿತು ಜುಲೈ 6ರಂದು ಪ್ರಕರಣ ದಾಖಲಾಗಿದೆ. ಹಾಗಾಗಿ ಬಂಧಿಗಳಿಗೆ ಸಂದರ್ಶನ ಸಮಯವನ್ನು ನೀಡಲಾಗಿದೆ. ಇದನ್ನು ಹೊರತಾಗಿ ಇನ್ನು ಮುಂದೆ ಯಾವುದೇ ಕೊರಿಯರ್, ಪಾರ್ಸೆಲ್ ಬರುವಂತಿಲ್ಲ. ಒಂದು ವೇಳೆ ಬಂದರೆ, ಬಂದ ಜಾಗಕ್ಕೆ ವಾಪಸ್ ಕಳುಹಿಸಲಾಗುವುದು. ಹಾಗಾಗಿ ಕೈದಿಗಳು ತಮ್ಮ ಕುಟುಂಬದ ಸದಸ್ಯರು, ವಕೀಲರು ಹಾಗೂ ಸ್ನೇಹಿತರಿಗೆ ಕೊರಿಯರ್, ಪಾರ್ಸೆಲ್ ಕಳುಹಿಸದಂತೆ ತಿಳಿಸಬೇಕೆಂದು ಸೂಚಿಸಲಾಗಿದೆ.
ಇದನ್ನೂ ಓದಿ:ಖೈದಿಗೆ ಡ್ರಗ್ಸ್ ಸರಬರಾಜು: ರೆಡ್ ಹ್ಯಾಂಡ್ ಆಗಿ ಸಿಕ್ಕಿಬಿದ್ದ ಜೈಲು ಸಹಾಯಕ ಅಧೀಕ್ಷಕ
