ಲಾಕ್‌ಡೌನ್ ಬೇಕೋ, ಬೇಡವೋ ಅನ್ನೋದು ಬೆಂಗಳೂರಿಗರ ಕೈಯಲ್ಲಿದೆ: ಸಿಎಂ

ಬೆಂಗಳೂರು ಲಾಕ್‌ಡೌನ್ ಆಗಬಾರದು ಎಂದರೆ ಮುನ್ನೆಚ್ಚರಿಕಾ ಕ್ರಮಗಳನ್ನು ಪಾಲಿಸುತ್ತಾ ಜನರು ಕೊರೊನಾ ಹೋರಾಟಕ್ಕೆ ಸಹಕರಿಸಬೇಕಿದೆ ಎಂದು ಸಿಎಂ ಬಿಎಸ್​ವೈ ತಿಳಿಸಿದರು.

ಬೆಂಗಳೂರು: 'ಬೆಂಗಳೂರು ಲಾಕ್‌ಡೌನ್' ಆಗೋದು ಬಿಡುವುದು ಬೆಂಗಳೂರಿಗರ ಕೈಯಲ್ಲಿದೆ ಎಂದು ಸಿಎಂ ಯಡಿಯೂರಪ್ಪ ಸೂಚ್ಯವಾಗಿ ತಿಳಿಸಿದ್ದಾರೆ.

ವಿಧಾನಸೌಧದಲ್ಲಿ ಮಾತನಾಡಿದ ಅವರು, ಬೆಂಗಳೂರಿನಲ್ಲಿ ಕೋವಿಡ್ ಪಿಡುಗು ಜಾಸ್ತಿ ಆಗುತ್ತಿದೆ. ಇದನ್ನು ತಡೆಗಟ್ಟಲು ಎಲ್ಲ ರೀತಿಯ ಪ್ರಯತ್ನ ಮಾಡಲಾಗುತ್ತಿದೆ. ಕೆಲವು ಏರಿಯಾಗಳನ್ನು ಸೀಲ್​​ಡೌನ್ ಮಾಡಲಾಗಿದೆ. ಎಸ್ಎಸ್ಎಲ್‌ಸಿ ಪರೀಕ್ಷೆಗೆ ಯಾವುದೇ ಸಮಸ್ಯೆ ಆಗದಂತೆ ಎಚ್ಚರಿಕೆ ವಹಿಸಿ ವ್ಯವಸ್ಥೆ ಮಾಡಲಾಗಿದೆ. ಬೆಂಗಳೂರು ಲಾಕ್‌ಡೌನ್ ಆಗಬೇಕೋ, ಬೇಡವೋ ಅನ್ನೋದು ಬೆಂಗಳೂರಿಗರ ಮೇಲಿದೆ. ಸಂಪೂರ್ಣ ಲಾಕ್​ಡೌನ್​ ಆಗಬಾರದು ಎಂದರೆ ಮುನ್ನೆಚ್ಚರಿಕಾ ಕ್ರಮಗಳನ್ನು ಪಾಲಿಸುತ್ತ ಜನರು ಕೊರೊನಾ ಹೋರಾಟಕ್ಕೆ ಸಹಕರಿಸಬೇಕಿದೆ ಎಂದು ತಿಳಿಸಿದರು.

ನಾಳೆ ಸರ್ವಪಕ್ಷ ಸಭೆ:ಇಂದು ಮಧ್ಯಾಹ್ನ ಒಂದು ಗಂಟೆಗೆ ಗೃಹ ಕಚೇರಿ ಕೃಷ್ಣಾದಲ್ಲಿ ಸಚಿವರು, ಅಧಿಕಾರಿಗಳ ಸಭೆ ಕರೆದಿದ್ದೇನೆ. ನಾಳೆ ಮಧ್ಯಾಹ್ನ 12 ಗಂಟೆಗೆ ಬೆಂಗಳೂರಿನ ಸರ್ವ ಪಕ್ಷದ ಶಾಸಕರ ಸಭೆ ಕರೆದಿದ್ದೇನೆ. ಕೋವಿಡ್ ತಡೆಯಲು ಬೇಕಾದ ಇನ್ನಷ್ಟು ಕ್ರಮಗಳ ಕುರಿತು ಚರ್ಚಿಸುತ್ತೇವೆ ಎಂದು ಬಿಎಸ್​ವೈ ಹೇಳಿದರು.