2 ಗಂಟೆ 10 ನಿಮಿಷ ಆಯವ್ಯಯ ​ಪ್ರತಿ ಓದಿದ ಸಿಎಂ ಬೊಮ್ಮಾಯಿ

ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಅವರು ಇಂದು 2022-23ನೇ ಸಾಲಿನ ತಮ್ಮ ಚೊಚ್ಚಲ ಬಜೆಟ್ ಅನ್ನು ವಿಧಾನಸಭೆಯಲ್ಲಿ ಮಂಡಿಸಿದರು. ಈ ಸಂದರ್ಭದಲ್ಲಿ ಅವರು ಒಂದು ರೀತಿಯ ಆಯಾಸದಂತೆ ಕಂಡು ಬಂದರು. ಆಗಾಗ ಕೆಮ್ಮುತ್ತಿದ್ದರೂ ಒಮ್ಮೆ ಮಾತ್ರ ನೀರು ಕುಡಿದು ಬಜೆಟ್ ಓದಿ ಮುಗಿಸಿದರು.

ಬೆಂಗಳೂರು:ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಅವರಿಂದು 2022-23ನೇ ಸಾಲಿನ ತಮ್ಮ ಚೊಚ್ಚಲ ಬಜೆಟ್ ಅನ್ನು ವಿಧಾನಸಭೆಯಲ್ಲಿ ಮಂಡಿಸಿದರು. 113 ಪುಟಗಳಿದ್ದ ಬಜೆಟ್ ಪ್ರತಿಯನ್ನು ಅವರು 2 ಗಂಟೆ 10 ನಿಮಿಷ ಓದಿದರು.

ವಿಧಾನಸಭಾಧ್ಯಕ್ಷ ವಿಶ್ವೇಶ್ವರ ಹೆಗಡೆ ಕಾಗೇರಿ ಮಧ್ಯಾಹ್ನ 12.30 ರ ಸುಮಾರಿಗೆ ಸದನಕ್ಕೆ ಆಗಮಿಸುತ್ತಿದ್ದಂತೆ ವಂದೇ ಮಾತರಂ ಗೀತೆ ಮೊಳಗಿತು. ನಂತರ ಮುಖ್ಯಮಂತ್ರಿ ಬೊಮ್ಮಾಯಿ ಅವರು ಬಜೆಟ್ ಪ್ರತಿಯನ್ನು ಓದಲು ಆರಂಭಿಸಿದರು. 113 ಪುಟಗಳಿದ್ದ ಬಜೆಟ್ ಪ್ರತಿಯನ್ನು ಮಧ್ಯಾಹ್ನ 2.40 ಓದಿ ಮುಗಿಸಿದರು. ಅವರು ಬಜೆಟ್ ಓದಲು 2 ಗಂಟೆ 10 ನಿಮಿಷ ತೆಗೆದುಕೊಂಡರು.

ಆಯಾಸದಂತೆ ಕ‌ಂಡು ಬಂದ ಸಿಎಂ: ಬಜೆಟ್ ಪ್ರತಿಯನ್ನು ಓದುವಾಗ ಕೆಲವು ಕಡೆ ತೊದಲಿದ್ದು ಕಂಡುಬಂತು. ಇನ್ನೂ ಕೆಲ ಕಡೆ ಕನ್ನಡ ಉಚ್ಚಾರಣೆ ಅಸ್ಪಷ್ಟವಾಗಿತ್ತು. ಬೊಮ್ಮಾಯಿ ಬಜೆಟ್ ಪ್ರತಿ ಓದುವಾಗ ಒಂದು ರೀತಿಯ ಆಯಾಸದಂತೆ ಕಂಡು ಬಂದರು. ಸರ್ಕಾರದ ಯೋಜನೆಗಳು ಮತ್ತು ಸಾಧನೆಗಳನ್ನು ಹೇಳುವಾಗ ಆಡಳಿತ ಪಕ್ಷದ ಸದಸ್ಯರು ಮೇಜು ಕುಟ್ಟಿ ಸ್ವಾಗತಿಸಿದರು.

ಈ ಸಂದರ್ಭದಲ್ಲಿ ಸಿಎಂ ಆಗಾಗ ಕೆಮ್ಮುತ್ತಿದ್ದರೂ ಒಮ್ಮೆ ಮಾತ್ರ ನೀರು ಕುಡಿದು ಬಜೆಟ್ ಓದಿದರು. ಬಜೆಟ್ ಪ್ರತಿ ಓದಿದ ಬಳಿಕ ಸಚಿವರು, ಬಿಜೆಪಿ ಶಾಸಕರ ಜೊತೆ ಸಿಎಂ ಬೊಮ್ಮಾಯಿ ವಿಕ್ಟರಿ ಸಿಂಬಲ್ ಪ್ರದರ್ಶನ ಮಾಡಿದರು. ನಂತರ ಸಚಿವರು ಹಾಗೂ ಶಾಸಕರು ಮುಖ್ಯಮಂತ್ರಿಗಳಿಗೆ ಹಸ್ತಲಾಘವ ಮಾಡಿ ಅಭಿನಂದಿಸಿದರು.

ಕಲಾಪ ವೀಕ್ಷಿಸಿದ ಸಿಎಂ ಕುಟುಂಬ: ಇದೇ ಮೊದಲ ಬಾರಿಗೆ ಬಜೆಟ್ ಮಂಡನೆ ಮಾಡಿದ ಸಿಎಂ ಬಸವರಾಜ ಬೊಮ್ಮಾಯಿ ಅವರ ಬಜೆಟ್ ಮಂಡನೆಯ ವೀಕ್ಷಣೆ ಮಾಡಲು ಕುಟುಂಬದ ‌ಸದಸ್ಯರು ಸಹ ಆಗಮಿಸಿದ್ದರು. ಬಸವರಾಜ ಬೊಮ್ಮಯಿ ಪತ್ನಿ, ಮಗ, ಮಗಳು, ಸೊಸೆ ಹಾಗೂ ಸಹ ಕುಟುಂಬದ ಸದಸ್ಯರು ಪ್ರೇಕ್ಷಕರ ಗ್ಯಾಲರಿಯಲ್ಲಿ ವೀಕ್ಷಿಸಿದರು.

ಇದನ್ನೂ ಓದಿ:ಅಭಿವೃದ್ಧಿಗೆ ಒತ್ತು ನೀಡುವ ಅತ್ಯುತ್ತಮ ಆಯವ್ಯಯ: ಬೊಮ್ಮಾಯಿ ಬಜೆಟ್ ಶ್ಲಾಘಿಸಿದ ಬಿಎಸ್​ವೈ