ಬೆಂಗಳೂರು: ಮಹಾತ್ಮ ಗಾಂಧೀಜಿ ಹಾಗೂ ಲಾಲ್ ಬಹದ್ದೂರ್ ಶಾಸ್ತ್ರಿ ಅವರ ಜಯಂತಿ ಹಿನ್ನೆಲೆ, ಕುಮಾರ ಕೃಪ ರಸ್ತೆಯಲ್ಲಿರುವ ಖಾದಿ ಬಟ್ಟೆಗಳ ಮಾರಾಟ ಮಳಿಗೆ ಖಾದಿ ಎಂಪೋರಿಯಂಗೆ ಸಿಎಂ ಬಸವರಾಜ ಬೊಮ್ಮಾಯಿ ಭೇಟಿ ನೀಡಿದರು. ಇವರಿಗೆ ಸಚಿವ ಗೋವಿಂದ ಕಾರಜೋಳ, ಎಂಟಿಬಿ ನಾಗರಾಜ್ ಹಾಗೂ ಬಿ.ವೈ. ವಿಜಯೇಂದ್ರ ಸಾಥ್ ನೀಡಿದರು. ಮೊದಲಿಗೆ ಗಾಂಧೀಜಿ ಭಾವಚಿತ್ರಕ್ಕೆ ಪುಷ್ಪ ನಮನ ಸಲ್ಲಿಸಿದ ಸಿಎಂ ಬೊಮ್ಮಾಯಿ, ಬಳಿಕ ಖಾದಿ ವಸ್ತ್ರ ಖರೀದಿಸಿದರು.
ಪತ್ನಿಗೆ ಸಿಲ್ಕ್ ಸೀರೆ ಖರೀದಿಸಿದ ಸಿಎಂ ಬೊಮ್ಮಾಯಿ
ಖಾದಿ ಎಂಪೋರಿಯಂನಲ್ಲಿ ಜುಬ್ಬಾ ಹೊಲಿಸಲು ಖಾದಿ ಬಟ್ಟೆ ಖರೀದಿಸಿದ ಸಿಎಂ, ಇದೇ ವೇಳೆ ತಮ್ಮ ಪತ್ನಿ ಚೆನ್ನಮ್ಮರಿಗೆ ಸಿಲ್ಕ್ ಸೀರೆಯನ್ನು ತಾವೇ ಆರಿಸಿ ಖರೀದಿಸಿದರು. ಸೀರೆ ಖರೀದಿ ವೇಳೆ ವಿಜಯೇಂದ್ರ ಆಗಮಿಸಿ, ಏನ್ ಸೀರೆ ಖರೀದಿ ಜೋರಾ ಎಂದಾಗ, ಸಿಎಂ ನಮ್ಮದು ಮುಗಿತು ಈಗ ನೀವು ತಗೊಳಿ ಎಂದು ಕಾಲೆಳೆದರು. ಬಳಿಕ ವಿಜಯೇಂದ್ರ ಕೂಡ ಸೀರೆ ಖರೀದಿ ಮಾಡಿದರು.