ಬೆಂಗಳೂರು: ಆರ್ಥಿಕ ಸಾಲಿನ ಮೊದಲ ತಿಂಗಳಲ್ಲಿಯೇ 1 ಸಾವಿರ ಕೋಟಿ ರೂ. ತೆರಿಗೆ ಪಾವತಿ ಆಗಿದ್ದು, ಇದರಲ್ಲಿ ಶೇ.5 ರಿಯಾಯಿತಿ ಆಧಾರದಲ್ಲಿ 50 ಕೋಟಿ ರೂ ಪಾಲಿಕೆಗೆ ನಷ್ಟವಾಗಿದೆ. ಕೆಲವು ನಿವಾಸಿಗಳ ಕ್ಷೇಮಾಭಿವೃದ್ಧಿ ಸಂಘಗಳು, ಅಸೋಸಿಯೇಷನ್ಗಳು ಹಾಗೂ ಆಸ್ತಿ ಮಾಲೀಕರಿಂದ ರಿಯಾಯಿತಿ ಅವಧಿಯನ್ನು ಮೇ 30ರವರೆಗೆ ವಿಸ್ತರಣೆ ಮಾಡಲು ಕೋರಿಕೆ ಸಲ್ಲಿಕೆಯಾಗಿತ್ತು. ಆದರೆ, ಬಿಬಿಎಂಪಿ ಈ ಮನವಿಯನ್ನು ತಿರಸ್ಕರಿಸಿದೆ.
ಆಸ್ತಿ ತೆರಿಗೆ ಮೇಲಿನ ಶೇ.5 ರಿಯಾಯಿತಿಯನ್ನು ವಿಸ್ತರಣೆ ಮಾಡುವುದಿಲ್ಲ. ಕೋವಿಡ್ ಕಾರಣ ನೀಡಿ ಹಲವು ಸಾರ್ವಜನಿಕರು ವಿಸ್ತರಣೆಗೆ ಪ್ರಸ್ತಾವನೆ ಸಲ್ಲಿಸಿದ್ದರೂ ತಿರಸ್ಕರಿಸಲಾಗಿದೆ. ಒಂದು ವೇಳೆ, ಸರ್ಕಾರದಿಂದ ಸೂಚನೆ ಬಂದಲ್ಲಿ ವಿಸ್ತರಣೆ ಮಾಡಲಾಗುತ್ತದೆ ಎಂದು ಪಾಲಿಕೆಯ ಅಧಿಕಾರಿಗಳು ತಿಳಿಸಿದ್ದಾರೆ.
2022-23ನೇ ಸಾಲಿನ ಆಸ್ತಿ ತೆರಿಗೆಯ ಪಾವತಿ ಮೇಲೆ ಶೇ.5 ರಿಯಾಯಿತಿ ಪಡೆಯುವುದಕ್ಕೆ ಶನಿವಾರ (ಏ.30) ಕೊನೆಯ ದಿನವಾಗಿದೆ. ಮೇ 30ರವರೆಗೆ ತೆರಿಗೆ ರಿಯಾಯಿತಿ ವಿಸ್ತರಣೆಗೆ ಸಾರ್ವಜನಿಕರಿಂದ ಸಲ್ಲಿಕೆಯಾಗಿದ್ದ ಪ್ರಸ್ತಾವನೆಗಳನ್ನು ಬಿಬಿಎಂಪಿ ತಿರಸ್ಕರಿಸಿದೆ ಎಂದು ಹೇಳಿದ್ದಾರೆ.
ಮೊದಲ ತಿಂಗಳ ಪಾವತಿಗೆ ಶೇ.5 ರಿಯಾಯಿತಿ:ಸರ್ಕಾರದ ನಿಯಮದಂತೆ ಆರ್ಥಿಕ ವರ್ಷದ ಆಸ್ತಿ ತೆರಿಗೆಯನ್ನು ಮೊದಲ ತಿಂಗಳಲ್ಲಿಯೇ ಪಾವತಿಸುವ ಮಾಲೀಕರಿಗೆ ತೆರಿಗೆ ಮೊತ್ತದ ಶೇ.5 ರಿಯಾಯಿತಿ ನೀಡಲಾಗುತ್ತದೆ. 2022-23ನೇ ಸಾಲಿನಲ್ಲಿ ಆಸ್ತಿ ತೆರಿಗೆಯಿಂದ 4,500 ಕೋಟಿ ರೂ. ಆದಾಯ ಸಂಗ್ರಹ ಗುರಿಯನ್ನು ಪಾಲಿಕೆ ಇಟ್ಟುಕೊಂಡಿದೆ. ಮೊದಲ ತಿಂಗಳ 29 ದಿನಗಳಲ್ಲಿ 1 ಸಾವಿರ ಕೋಟಿ ರೂ. ಸಂಗ್ರಹವಾಗಿದೆ. ಈ ಮೂಲಕ ಈ ವರ್ಷದ ಗುರಿಯ ಶೇ.22 ತೆರಿಗೆ ಸಂಗ್ರಹಣೆ ಪೂರ್ಣಗೊಂಡಿದೆ. 2021-22ನೇ ಸಾಲಿನಲ್ಲಿ ಏಪ್ರಿಲ್ 29ರ ಅವಧಿಗೆ 860 ಕೋಟಿ ರೂ. ತೆರಿಗೆ ಸಂಗ್ರಹವಾಗಿತ್ತು ಎಂದು ಮಾಹಿತಿ ನೀಡಿದ್ದಾರೆ.
ಮೇ ತಿಂಗಳಲ್ಲಿ ಅಸಲು ಮೊತ್ತ ಪಾವತಿ:ಮೇ ತಿಂಗಳಲ್ಲಿ ಆಸ್ತಿ ತೆರಿಗೆಯ ಅಸಲು ಮೊತ್ತ ಪಾವತಿಸಬೇಕಿದೆ. ಜೂನ್ 1 ರಿಂದ ಮಾರ್ಚ್ 31ರವರೆಗೆ ಆಸ್ತಿ ತೆರಿಗೆ ಪಾವತಿಸುವವರು ವಾರ್ಷಿಕ ಬಡ್ಡಿ ಶುಲ್ಕ ಶೇ.9 ಹಣವನ್ನು ತೆರಿಗೆಯೊಂದಿಗೆ ಪಾವತಿಸಬೇಕಾಗುತ್ತದೆ ಎಂದು ಪಾಲಿಕೆಯ ಅಧಿಕಾರಿಗಳು ತಿಳಿಸಿದ್ದಾರೆ.
ಇದನ್ನೂ ಓದಿ:'ಬಿ' ಖಾತಾ ಸ್ವತ್ತುಗಳು 'ಎ' ಖಾತಾಗೆ ವರ್ಗಾವಣೆ : ಪಾಲಿಕೆಯ ಬೊಕ್ಕಸಕ್ಕೆ ಹರಿದು ಬರಲಿದೆ ಹೆಚ್ಚಿನ ಆದಾಯ
