ಬೆಂಗಳೂರು:ಮೈಕ್ರೋಸಾಫ್ಟ್ ಸಹಭಾಗಿತ್ವದ ರೋಶಿನಿ ಯೋಜನೆ ಪಾಲಿಕೆಯೊಂದಿಗೆ ಕೈಜೋಡಿಸಿ, ಖಾಸಗಿ ಶಾಲೆಗಳಿಗೆ ಸಮಾನವಾಗಿ ಬಿಬಿಎಂಪಿ ಶಾಲೆಗಳ ಗುಣಮಟ್ಟ ಏರಿಸುತ್ತೇವೆಂದು ಭಾಷಣದ ಮೂಲಕ ಉದ್ಘಾಟನೆ ಮಾಡಿದ್ದರು.ಆದರೆ ಒಂದು ವರ್ಷವಾದರೂ ಪ್ರಗತಿ ಕಾಣುತ್ತಿಲ್ಲ ಎಂಬ ಆರೋಪಗಳು ಕೇಳಿ ಬಂದಿವೆ.
156 ಶಾಲೆಗಳಲ್ಲಿ ಯೋಜನೆ ಜಾರಿಯಾಗುವುದಿರಲಿ, ಕೇವಲ ಪೈಲೆಟ್ ಪ್ರಾಜೆಕ್ಟ್ಗಾಗಿ ಆಯ್ಕೆ ಮಾಡಿಕೊಂಡ ನಗರದ ಏಳು ಶಾಲೆಗಳಲ್ಲೂ ಕಿಂಚಿತ್ತೂ ಪ್ರಗತಿಯಾಗಿಲ್ಲ. ಇನ್ನು ಯೋಜನೆ ಯಾವಾಗ ಆರಂಭಿಸುತ್ತೀರಾ, ಕಟ್ಟಡ ನವೀಕರಣ ಯಾವಾಗ ಎಂದು ಕಾರ್ಪೋರೇಟರ್ ಏನಾದರೂ, ರೋಶಿನಿ ಯೋಜನೆಯ ಮುಖ್ಯಸ್ಥ ಅಲಿ ಸೇಠ್ಗೆ ಫೋನ್ ಮಾಡಿದರೆ, ಆತ ಸಂಪರ್ಕಕ್ಕೇ ಸಿಗುತ್ತಿಲ್ಲ ಎನ್ನಲಾಗುತ್ತಿದೆ.
ಇದಕ್ಕೆ ತಾಜಾ ಉದಾಹರಣೆಯೆಂದರೆ, ರೋಶಿನಿ ಯೋಜನೆಯ ಪೈಲೆಟ್ ಯೋಜನೆಗೆ ಆಯ್ಕೆಯಾಗಿದ್ದ ಗಾಂಧಿನಗರದ ಹೈಸ್ಕೂಲ್. ಕಳೆದ ಡಿಸೆಂಬರ್ನಲ್ಲೇ ಕಟ್ಟಡ ನವೀಕರಣಗೊಂಡು, ಈ ವರ್ಷದ ಶಾಲಾ ಮಕ್ಕಳಿಗೆ ಹೊಸ ತಂತ್ರಜ್ಞಾನದೊಂದಿಗೆ ಶಿಕ್ಷಣ ಆರಂಭಿಸುವ ಕನಸು ಹೊತ್ತಿದ್ದ ಈ ಶಾಲೆಯ ಕತೆಯನ್ನು , ವಾರ್ಡ್ ಕಾರ್ಪೋರೇಟರ್ ಲತಾ ರಾಥೋಡ್ ಈ ಟಿವಿ ಭಾರತ್ ಜೊತೆ ಎಳೆಎಳೆಯಾಗಿ ಬಿಚ್ಚಿಟ್ಟರು. ರೋಶಿನಿ ಯೋಜನೆ ಬಹುದೊಡ್ಡ ಬೋಗಸ್ ಎಂದು ಗೊತ್ತಾದ ಬಳಿಕ ತಮ್ಮಲ್ಲಿದ್ದ ಅನುದಾನವನ್ನೇ ಬಳಸಿ ಕಟ್ಟಡದ ನವೀಕರಣಕ್ಕೆ ಮುಂದಾಗಿದ್ದೇವೆ. ಮುಂದಿನ ವಾರ ಶಂಕುಸ್ಥಾಪನೆ ಮಾಡಿ, ನವೀಕರಣ ಆರಂಭಿಸಲಾಗುವುದು ಎಂದರು.
ಖರ್ಚೆಲ್ಲಾ ಪಾಲಿಕೆಯದ್ದು, ಲಾಭ ಮಾತ್ರ ಯಾರದ್ದೋ ಹೆಸರಿಗೆ ಮಾತ್ರ ರೋಶಿನಿ ಯೋಜನೆ, ಖರ್ಚೆಲ್ಲಾ ಪಾಲಿಕೆಯದ್ದು, ಲಾಭ ಮಾತ್ರ ಯಾರದ್ದೋ?
ಕೇವಲ ಒಂದೆರಡು ಮೀಟಿಂಗ್ಗಳನ್ನು ನಡೆಸಿ, ಯೋಜನೆ ಬಗ್ಗೆ ಬಣ್ಣಬಣ್ಣದ ಮಾತುಗಳನ್ನಾಡಿ, ಮುಖ್ಯಮಂತ್ರಿ ಕುಮಾರಸ್ವಾಮಿಯವರ ಕೈಯಲ್ಲಿ ಉದ್ಘಾಟನೆಗೊಳಿಸಿದಾಗ ಪಾಲಿಕೆ ಶಿಕ್ಷಣ ಸಮಿತಿಯ ವಿಶೇಷ ಆಯುಕ್ತ ರವೀಂದ್ರ ಅವರ ಆಸಕ್ತಿ ಈ ಯೋಜನೆಯನ್ನು ಜಾರಿಗೊಳಿಸುವಲ್ಲಿ ಇಲ್ಲ. ಕೇವಲ ಹೆಸರಿಗೆ ರೋಶಿನಿ ಯೋಜನೆಯೆಂದು ಬೋರ್ಡ್ ಹಾಕಿಸಿ, ಖರ್ಚೆಲ್ಲ ಪಾಲಿಕೆ ವತಿಯಿಂದಲೇ ಮಾಡಿ, ಖಾಸಗಿ ವ್ಯಕ್ತಿಯಾದ ಅಲಿ ಸೇಠ್ಗೆ ಲಾಭ ಮಾಡಿಕೊಡುವ ಹುನ್ನಾರ ಈ ಯೋಜನೆಯದ್ದು ಎಂಬ ಮಾತುಗಳು ಕೇಳಿ ಬರ್ತಿವೆ. ಅಲ್ಲದೆ ಈ ಯೋಜನೆಗೆ ಸಂಬಂಧಿಸಿದ ಒಡಂಬಡಿಕೆ ಕಡತಗಳನ್ನ ಕೇಳಿದ್ರೂ ಅಧಿಕಾರಿಗಳು ಕೊಡದೆ ಹಿಂದೇಟು ಹಾಕುತ್ತಿದ್ದಾರೆ. ಅಲಿ ಸೇಠ್ ಜೊತೆ ಅಧಿಕಾರಿಗಳು ಶಾಮೀಲಾಗಿದ್ದಾರೆ ಎಂಬ ಗಂಭೀರ ಆರೋಪಗಳು ಕೇಳಿ ಬರ್ತಿವೆ. ಅಸಲಿಗೆ ಮೈಕ್ರೋಸಾಫ್ಟ್ ಸಂಸ್ಥೆಯಿಂದಲೂ ದುಡ್ಡು ಪಡೆದು, ಇತ್ತ ಪಾಲಿಕೆಯಿಂದಲೂ ಖರ್ಚು ಮಾಡಿಸಿ, ಯೋಜನೆಗೆ ಮಾತ್ರ 'ರೋಶಿನಿ' ಎಂದು ತನ್ನ ಮಗಳ ಹೆಸರಿಟ್ಟು ಲಾಭ ಮಾಡಿಕೊಳ್ಳುವ ಹುನ್ನಾರ ಅಡಗಿದೆ ಎಂಬ ಮಾತು ಕೇಳಿಬರುತ್ತಿದೆ.
ಅನುದಾನದ ಹಣ ಸಿದ್ದವಾಗಿಟ್ಟಿದ್ದ ಗಾಂಧಿನಗರ ಶಾಲೆಯೇ ಅಭಿವೃದ್ಧಿಯಾಗಿಲ್ಲ:
ಬಸವನಗುಡಿಯ ಪಾಲಿಕೆ ಶಾಲೆಯದ್ದೂ ಇದೇ ಕಥೆ. ರೋಶಿನಿ ಯೋಜನೆಯಿಂದ ಪಾಲಿಕೆ ಶಾಲೆ ಅಭಿವೃದ್ಧಿ ಹೊಂದುತ್ತೆ ಎಂದು ಕಾದಿದ್ದೆವು. ಹೀಗಾಗಿ ರಿಪೇರಿ ಮಾಡಿಸಿರಲಿಲ್ಲ. ಈಗ ನಮ್ಮ ಅನುದಾನವೂ ಬೇರೆ ಕಡೆ ಖರ್ಚಾಗಿದೆ. ರೋಶಿನಿ ಯೋಜನೆಯದ್ದೂ ಪತ್ತೆ ಇಲ್ಲ. ಈ ಬಗ್ಗೆ ಕೌನ್ಸಿಲ್ ಸಭೆಯಲ್ಲಿ ಪ್ರಶ್ನೆ ಮಾಡ್ತೇನೆ ಎಂದು ಮಾಜಿ ಮೇಯರ್ ಕಟ್ಟೆ ಸತ್ಯನಾರಾಯಣ ಪ್ರತಿಕ್ರಿಯಿಸಿದ್ರು.
ಯೋಜನೆ ಕುರಿತು ಸುಳ್ಳುಗಳನ್ನೇ ಹೇಳುತ್ತಾ ಬಂದಿರುವ ವಿಶೇಷ ಆಯುಕ್ತ ರವೀಂದ್ರ ಅವರಿಗೆ ಕೇಳಿದ್ರೆ, ರೋಶಿನಿ ಯೋಜನೆ ಪ್ರಗತಿಯಲ್ಲಿದೆ. ಎಲ್ಲವೂ ಟೆಂಡರ್ ಹಂತದಲ್ಲಿದೆ. ಎಲ್ಲಾ ಶಾಲೆಗಳಿಗೂ ಸುಣ್ಣ, ಬಣ್ಣ,ಪೈಂಟ್ ಹೊಡಿಸಲಾಗ್ತಿದೆ ಅಂತ ಸುಳ್ಳಿನ ಕಂತೆಯನ್ನೇ ಹೇಳ್ತಾರೆ. ಅಲ್ಲದೆ ಕಾರ್ಪೋರೇಟರ್ಸ್ಗಳೇ ಆಸಕ್ತಿ ತೋರುತ್ತಿಲ್ಲ ಎಂದು ರೋಶಿನಿ ಮುಖ್ಯಸ್ಥನ ಪರ ವಹಿಸಿ ಮಾತಾಡ್ತಾರೆ. ಅಸಲಿಗೆ ಟೋಟಲ್ ಸ್ಟೇಷನ್ ಸರ್ವೇ ಮಾಡಿ, ನವೀಕರಣಕ್ಕೆ ಅನುದಾನದ ಹಣ ಸಿದ್ದವಾಗಿಟ್ಟಿದ್ದ ಗಾಂಧಿನಗರ ಶಾಲೆಯೇ ಅಭಿವೃದ್ಧಿಯಾಗಿಲ್ಲ. ಇನ್ನು ಫ್ರೇಜರ್ ಟೌನ್ನ ಪಾಲಿಕೆ ಶಾಲೆಗಳಲ್ಲಿ ಇದ್ದ ಬೋರ್ಡ್ ತೆಗೆದುಹಾಕಲಾಗಿದೆ. ಅಲ್ಲದೇ ಕಟ್ಟಡಕ್ಕೆ ಬೀಗ ಜಡಿಯಲಾಗಿದೆ. ಇದನ್ನು ಕೇಳುವ ಅಧಿಕಾರವನ್ನೂ ಪಾಲಿಕೆ ಶಾಲಾ ಶಿಕ್ಷಕರು ಕಳೆದುಕೊಂಡಿದ್ದಾರೆ.
ಇವಿಷ್ಟೇ ಅಲ್ಲ, ರೋಶಿನಿ ಯೋಜನೆಯ ಪೈಲೆಟ್ ಶಾಲೆಗಳಾಗಿ ಆಯ್ಕೆಯಾದ ಗಾಂಧಿನಗರ, ಕ್ಲೀವ್ ಲೆಂಡ್ ಟೌನ್, ಬಸವನಗುಡಿ, ಬೈರಸಂದ್ರ, ಗಂಗಾನಗರ, ಬೈರವೇಶ್ವರ ನಗರದ ಯಾವುದೇ ಪಾಲಿಕೆ ಶಾಲೆಯಲ್ಲಿ ಕಿಂಚಿತ್ತೂ ಅಭಿವೃದ್ಧಿಯಾಗಿಲ್ಲ. ಇನ್ನಾದ್ರೂ ಪಾಲಿಕೆ ಅಧಿಕಾರಿಗಳು, ಮೇಯರ್ ಎಚ್ಚೆತ್ತುಕೊಳ್ಳದಿದ್ರೆ ಯೋಜನೆ ಹಳ್ಳಹಿಡಿಯುವುದರ ಜೊತೆಗೆ ಪಾಲಿಕೆ ಶಾಲೆಗಳ ಹೆಸರಲ್ಲಿ ಖಾಸಗಿ ವ್ಯಕ್ತಿಗಳು ದುಡ್ಡು ಮಾಡೋದಂತೂ ಗ್ಯಾರಂಟಿ ಎನ್ನಲಾಗುತ್ತಿದೆ.
