ಖುಷಿಗಾಗಿ ವೇಗದ ಸವಾರಿ : ಐಷಾರಾಮಿ ಕಾರು ವಶ

ಐಷಾರಾಮಿ ವಾಹನವನ್ನು ನಿರ್ಲಕ್ಷ್ಯದಿಂದ ವೇಗವಾಗಿ ಸವಾರಿ ಮಾಡಿ ಜನರಿಗೆ ಮತ್ತು ವಾಹನ ಸವಾರರಿಗೆ ಭೀತಿ ಹುಟ್ಟಿಸಿದ್ದ ಚಾಲಕನ್ನು ಹೈಗ್ರೌಂಡ್ಸ್ ಸಂಚಾರ ಪೊಲೀಸರು ಸಿಸಿಟಿವಿ ಆಧಾರದ ಮೇಲೆ ಪ್ರಕರಣ ದಾಖಲಿಸಿ ಕಾರನ್ನು ವಶಕ್ಕೆ ಪಡೆದಿದ್ದಾರೆ.

ಬೆಂಗಳೂರು : ಐಷಾರಾಮಿ ಕಾರು ಚಾಲಕನೊಬ್ಬ ‌ಹೈಗ್ರೌಂಡ್ ಸಂಚಾರ ಠಾಣಾ ವ್ಯಾಪ್ತಿಯ ಬಳಿಯ ‌ಬಿಡಿಎ ಬ್ರಿಡ್ಜ್ ಕಡೆಯಿಂದ ಅತಿವೇಗವಾಗಿ ಬರುವುದಲ್ಲದೆ, ವಾಹನದ ಕರ್ಕಶ ಶಬ್ದದೊಂದಿಗೆ ಸಾರ್ವಜನಿಕರಿಗೆ ತೊಂದರೆ ಉಂಟುಮಾಡಿದ್ದಾನೆ. ಇದಲ್ಲದೆ, ಇತರೆ ವಾಹನಸವಾರರು ಭಯ ಬೀಳುವ ಕಾರು ಚಲಾಯಿಸಿದ್ದಾನೆ.

ಈ ವಿಚಾರವಾಗಿ ಹೈಗ್ರೌಂಡ್ಸ್ ಸಂಚಾರ ಪೊಲೀಸರು, ಮೋಟಾರ್ ವಾಹನ ಕಾಯ್ದೆಯಡಿ ಪ್ರಕರಣ ದಾಖಲು ಮಾಡಿ ಪರಾರಿಯಾಗಿದ್ದ ಕಾರು ಚಾಲಕನನ್ನ ಪತ್ತೆ ಮಾಡಿದ್ದಾರೆ. ಇನ್ನು ಕಾರು ಚಾಲಕನ ಹೆಸರು ಹರಿ ಬಿನ್ ದೇವರಾಜು. ಖುಷಿಗಾಗಿ ಈ ರೀತಿ ಮಾಡಿರುವುದಾಗಿ ತಪ್ಪೊಪ್ಪಿಕೊಂಡಿದ್ದಾನೆ.

ಸದ್ಯ ಪೊಲೀಸರು ಆರೋಪಿ ಬಳಿ ಇದ್ದ ಐಶಾರಾಮಿ (porsche 911GT3) ಕಾರನ್ನು ವಶಪಡಿಸಿಕೊಂಡಿದ್ದು, ತನಿಖೆ ಮುಂದುವರೆಸಿದ್ದಾರೆ. ಈ ಹಿಂದೆ ನಗರದಲ್ಲಿ ಶ್ರೀಮಂತರ ಮಕ್ಕಳು ನಿರ್ಲಕ್ಷ್ಯವಾಗಿ ಕಾರು ಸವಾರಿ ಮಾಡಿ ಅಮಾಯಕ ಜನರ ಜೀವಕ್ಕೆ ಹಾನಿ‌ಮಾಡಿದ್ದ ಸಂಗತಿಗಳು ನಡೆದ ಹಿನ್ನೆಲೆ ಪೊಲೀಸರು ಇಂತಹ ಪ್ರಕರಣವನ್ನ ಗಂಭೀರವಾಗಿ ಪರಿಗಣಿಸಿದ್ದಾರೆ.