ಬೆಂಗಳೂರು: ಇಂದಿರಾ ಕ್ಯಾಂಟೀನ್ ಮೂಲಕ ಪೌರಕಾರ್ಮಿಕರಿಗೆ ನೀಡುತ್ತಿರುವ ಆಹಾರ ಕಳಪೆ ಗುಣಮಟ್ಟದ್ದಾಗಿದೆ ಎಂದು ಬಿಜೆಪಿ ಪಾಲಿಕೆ ಸದಸ್ಯ ಉಮೇಶ್ ಶೆಟ್ಟಿ ಮಾಡಿರುವ ಆರೋಪ ಸಂಪೂರ್ಣ ಸುಳ್ಳು. ಇಂದಿರಾ ಕ್ಯಾಂಟೀನ್ ಬಗ್ಗೆ ಭಯ ಹುಟ್ಟಿಸುವ ಕೆಲಸವನ್ನು ಮಾಡಿದ್ದಾರೆ. ಇದು ಎಲೆಕ್ಷನ್ ಗಿಮಿಕ್ ಎಂದು ಮೇಯರ್ ಗಂಗಾಂಬಿಕೆ ನಗರದ ಪ್ರೆಸ್ ಕ್ಲಬ್ನಲ್ಲಿ ಸುದ್ದಿಗೋಷ್ಠಿ ನಡೆಸಿ ತಿಳಿಸಿದರು.
ಬಿಬಿಎಂಪಿ ಮೇಯರ್ ಗಂಗಾಂಬಿಕೆ ಸುದ್ದಿಗೋಷ್ಟಿ ನಡೆಸಿದರು
ಇಂದಿರಾ ಕ್ಯಾಂಟೀನ್ ಊಟದ ಮಾದರಿಯನ್ನು ಲ್ಯಾಬ್ನಲ್ಲಿ ಪರೀಕ್ಷೆ ಮಾಡುವಾಗ ಬಿಬಿಎಂಪಿಯ ಗಮನಕ್ಕೆ ತಂದಿಲ್ಲ. ಅವರೇ ಬೇರೆ ಕಡೆಯ ಊಟವನ್ನು ನಾಲ್ಕೈದು ದಿನ ಇಟ್ಟು ಹಳಸಿದ ಬಳಿಕ ಪರೀಕ್ಷೆ ಮಾಡಿಸಿರುವ ಸಾಧ್ಯತೆಯೂ ಇದೆ ಎಂದು ಆರೋಪಿಸಿದರು. ಊಟದಿಂದ ಜನ ಕಾಯಿಲೆ ಬೀಳ್ತಾರೆಂದು ಸುಳ್ಳು ಆರೋಪ ಮಾಡಿದ್ದಾರೆ. ಈಗ ಬಿಬಿಎಂಪಿ ಆಯುಕ್ತರ ಆದೇಶದ ಮೇರೆಗೆ ಎಲ್ಲಾ ಅಡುಗೆ ಮನೆಗಳ ಆಹಾರವನ್ನು ಲ್ಯಾಬ್ ಟೆಸ್ಟ್ಗೆ ಕಳಿಸಲಾಗ್ತಿದೆ. ಪ್ರತೀ ತಿಂಗಳು ಕಳಿಸೋದಕ್ಕೂ ಮಾತುಕತೆ ನಡೆದಿದೆ ಎಂದರು.