ಮಕ್ಕಳ‌‌ ಮುಂದೆ ಹೃದಯಾಘಾತದಿಂದ ತಂದೆ ಸಾವು... ಯಶವಂತಪುರ ರೈಲ್ವೆ ಸ್ಟೇಷನ್​ನಲ್ಲಿ ಮನಕಲಕುವ ಘಟನೆ

ಕುಟುಂಬ ಸಮೇತ ಸ್ವಗ್ರಾಮಕ್ಕೆ ತೆರಳಲು ಆಗಮಿಸಿದ್ದ ವ್ಯಕ್ತಿ ಹೃದಯಾಘಾತದಿಂದ ಯಶವಂತಪುರ ರೈಲು‌ ನಿಲ್ದಾಣದಲ್ಲಿ ಸಾವನ್ನಪ್ಪಿದ್ದಾರೆ. ತಂದೆಯನ್ನು ಕಳೆದುಕೊಂಡ ಮಕ್ಕಳ ಆಕ್ರಂದನ ಮುಗಿಲು ಮುಟ್ಟಿದೆ.

ಬೆಂಗಳೂರು: ಊರಿಗೆ ಹೋಗಲೆಂದು ಯಶವಂತಪುರ ರೈಲು‌ ನಿಲ್ದಾಣಕ್ಕೆ ಆಗಮಿಸಿದ್ದ ಕುಟುಂಬವೊಂದರ ಯಜಮಾನ ಹೃದಯಾಘಾತದಿಂದ ಸ್ಥಳದಲ್ಲೇ ಸಾವನ್ನಪ್ಪಿರುವ ಘಟನೆ ನಡೆದಿದೆ.

ನಗರದಲ್ಲಿ ಪೈಟಿಂಗ್ ಕೆಲಸ ಮಾಡುತ್ತಿದ್ದ ಮನೋಜ್ ಕುಮಾರ್ ಸಾವನ್ನಪ್ಪಿದ ವ್ಯಕ್ತಿ. ಅಸ್ಸೋಂನ ಗೋರಖ್​​ಪುರದ ಈತ ಬೆಂಗಳೂರಲ್ಲಿ ಹೆಂಡತಿ ಮಕ್ಕಳ‌ ಸಮೇತ ವಾಸವಾಗಿದ್ದ. ಈತನಿಗೆ‌ ಮೂವರು‌ ಮಕ್ಕಳಿದ್ದಾರೆ.‌ ಕುಟುಂಬದ ಜೊತೆ ಗೋರಖ್​ಪುರಕ್ಕೆ ತೆರಳಲು ಇವರು ರಾತ್ರಿ‌ ಯಶವಂತಪುರ ರೈಲು‌ ನಿಲ್ದಾಣಕ್ಕೆ ಆಗಮಿಸಿದ್ದರು. ಪ್ಲಾಟ್​​ಫಾರ್ಮ್​ 6ರಲ್ಲಿ ಬಂದು ರೈಲಿಗಾಗಿ ಕಾಯುತ್ತಿರುವಾಗ ಮನೋಜ್ ಕುಮಾರ್​ಗೆ ಹೃದಯಾಘಾತವಾಗಿ ಸ್ಥಳದಲ್ಲೇ ಕುಸಿದು ಬಿದ್ದು ಸಾವನ್ನಪ್ಪಿದ್ದಾರೆ.‌ ಮರಣೋತ್ತರ ಪರೀಕ್ಷೆಗಾಗಿ ಮೃತದೇಹವನ್ನು ಎಂ.ಎಸ್.ರಾಮಯ್ಯ ಆಸ್ಪತ್ರೆ ರವಾನಿಸಲಾಗಿದೆ.

ಕಣ್ಮುಂದೆಯೇ ತಂದೆಯನ್ನ ಕಳೆದುಕೊಂಡು ರೋದಿಸುತ್ತಿದ್ದ ಮಕ್ಕಳನ್ನ ನೋಡಿದ್ರೆ ಕಲ್ಲು ಹೃದಯದವರ ಕಣ್ಣುಗಳು ಕೂಡ ಒದ್ದೆಯಾಗುತ್ತವೆ. ಸ್ಥಳಕ್ಕೆ ಯಶವಂತಪುರ ರೈಲ್ವೆ ಪೊಲೀಸರು ಭೇಟಿ ನೀಡಿ ಪ್ರಕರಣ ದಾಖಲಿಸಿಕೊಂಡಿದ್ದಾರೆ.