ದಾವಣಗೆರೆಯಲ್ಲಿ ನಡುಕ ಹುಟ್ಟಿಸಿದ ಪಿ-533, ಕಲಬುರಗಿಯಲ್ಲಿ 6ನೇ ಬಲಿ

ರಾಜ್ಯದಲ್ಲಿ ಸೋಂಕಿತರ ಸಂಖ್ಯೆ ಏರುತ್ತಲೇ ಇದೆ. ಇಂದು 28 ಮಂದಿಯಲ್ಲಿ ಸೋಂಕು ಪತ್ತೆಯಾಗಿದ್ದು, ದಾವಣಗೆರೆ ಜಿಲ್ಲೆಯೊಂದಲ್ಲೇ 21 ಮಂದಿ ಸೋಂಕಿತರು ಪತ್ತೆಯಾಗಿದ್ದಾರೆ.

ಬೆಂಗಳೂರು: ರಾಜ್ಯದಲ್ಲಿ ಕೊರೊನಾ ಸೋಂಕಿತರ ಸಂಖ್ಯೆ ಏರಿಕೆ ಆಗುತ್ತಲೇ ಇದೆ. ಇಂದು ಒಂದೇ ದಿನ 28 ಸೋಂಕಿತರು ಪತ್ತೆಯಾಗಿದ್ದಾರೆ.‌ ಇಂದು ಪತ್ತೆಯಾದ ಒಟ್ಟು ಸೋಂಕಿತರ ಪೈಕಿ 21 ಸೋಂಕಿತರು ದಾವಣಗೆರೆ ಮೂಲದವರು ಎಂಬುದು ಆತಂಕಕಾರಿ ವಿಚಾರವಾಗಿದೆ.

ಪಿ-533 ಆಗಿರುವ 35 ವರ್ಷದ ಸೋಂಕಿತ ಮಹಿಳೆಯಿಂದಲೇ 18 ಮಂದಿಗೆ ಸೋಂಕು ತಗುಲಿದೆ. ಆದರೆ ಈ ಮಹಿಳೆಗೆ ಯಾರ ಸಂಪರ್ಕ ಇಲ್ಲದೇ ಇದ್ದರೂ ಕೂಡಾ ಸೋಂಕು ಹರಡಿದೆ ಎನ್ನಲಾಗಿದ್ದು, ದಾವಣಗೆರೆಯ ನಿಗದಿತ ಆಸ್ಪತ್ರೆಯಲ್ಲಿ ಚಿಕಿತ್ಸೆ ನೀಡಲಾಗುತ್ತಿದೆ.

ಇದರಿಂದಾಗಿ ರಾಜ್ಯದಲ್ಲಿ ಸೋಂಕಿತರ ಸಂಖ್ಯೆ 642ಕ್ಕೆ ಏರಿಕೆಯಾಗಿದೆ. 304 ಮಂದಿ ಸೋಂಕಿತರು ಗುಣಮುಖರಾಗಿದ್ದು ಆಸ್ಪತ್ರೆಯಿಂದ ಬಿಡುಗಡೆಗೊಂಡಿದ್ದಾರೆ.

ಇದರೊಂದಿಗೆ ಕೊರೊನಾಗೆ ರಾಜ್ಯದಲ್ಲಿ ಮತ್ತೊಂದು ಬಲಿಯಾಗಿದೆ. ಕಲಬುರಗಿಯಲ್ಲಿ ಕೊರೊನಾ ಸೋಂಕಿತ ಸಾವನ್ನಪ್ಪಿದ್ದಾರೆ. ಪಿ-587 ಆಗಿದ್ದ ಈ ವ್ಯಕ್ತಿ ಏಪ್ರಿಲ್ 29ರಂದು ಕೆಮ್ಮು ಮತ್ತು ಜ್ವರದ ತೊಂದರೆಯಿಂದ ಆಸ್ಪತ್ರೆಯಲ್ಲಿ ದಾಖಲಾಗಿದ್ದು ಚಿಕಿತ್ಸೆ ಫಲಕಾರಿಯಾಗದೆ ಮರಣ ಹೊಂದಿದ್ದಾರೆ.