ಬಿಸಿಲೂರು ಬಳ್ಳಾರಿ ರೈಲು ನಿಲ್ದಾಣಕ್ಕೆ ಬಂತು ಸೋಲಾರ್ ಸಿಸ್ಟಮ್... ತಿಂಗಳಿಗೆ ಲಕ್ಷ, ಲಕ್ಷ ಉಳಿತಾಯ!

ಬಿಸಿಲೂರು ಬಳ್ಳಾರಿ ರೈಲ್ವೆ ನಿಲ್ದಾಣದಲ್ಲಿ ಸೋಲಾರ್ ಸಿಸ್ಟಮ್ ಅಳವಡಿಸಲಾಗಿದೆ. ಇನ್ಮುಂದೆ ರೈಲು ನಿಲ್ದಾಣದ ವಿದ್ಯುತ್ ದೀಪ, ಸೀಲಿಂಗ್ ಫ್ಯಾನ್ ಹಾಗೂ ಎಸಿ ಎಲ್ಲವೂ ಈ ಸೋಲಾರ್ ವಿದ್ಯುತ್ತಿನಿಂದಲೇ ಚಲಿಸಲಿವೆ. ವಿದ್ಯುತ್ ಪೂರೈಕೆಗಾಗಿ ಪಾವತಿಸಬೇಕಿದ್ದ 3-4 ಲಕ್ಷ ರೂ. ಹಣವು ಉಳಿತಾಯವಾಗಲಿದೆ.‌

ಬಳ್ಳಾರಿ:ಗಣಿನಾಡು ಬಳ್ಳಾರಿ ನಗರದ ರೈಲು ನಿಲ್ದಾಣದಲ್ಲಿ ಸೋಲಾರ್ ಸಿಸ್ಟಮ್ ಅಳವಡಿಸಲಾಗಿದ್ದು, ಇನ್ಮುಂದೆ ರೈಲು ನಿಲ್ದಾಣದ ವಿದ್ಯುತ್ ದೀಪ, ಸೀಲಿಂಗ್ ಫ್ಯಾನ್ ಹಾಗೂ ಎಸಿ ಈ ಸೋಲಾರ್ ವಿದ್ಯುತ್ತಿನಿಂದಲೇ ನಡೆಯಲಿವೆ.

ಹೌದು, ಬಳ್ಳಾರಿ ರೈಲು ನಿಲ್ದಾಣಕ್ಕೆ ಜೆಸ್ಕಾಂ ಕಂಪನಿಯಿಂದ ವಿದ್ಯುತ್ ಸಂಪರ್ಕವನ್ನು ಕಲ್ಪಿಸಲಾಗಿತ್ತು.‌ ಅದರಿಂದ ತಿಂಗಳಿಗೆ ಸುಮಾರು 3-4 ಲಕ್ಷ ರೂ. ಗಳವರೆಗೆ ವಿದ್ಯುತ್ ಬಿಲ್ ಪಾವತಿಸಲಾಗುತ್ತಿತ್ತು. ಅದರಿಂದ ಈ ರೈಲು ನಿಲ್ದಾಣಕ್ಕೆ ಹೆಚ್ಚುವರಿ ಆರ್ಥಿಕ ಹೊರೆಯಾಗುತ್ತಿತ್ತು. ಈಗ ಸೋಲಾರ್ ವ್ಯವಸ್ಥೆಯನ್ನ ಅಳವಡಿಸಿದ್ದರಿಂದ ವಿದ್ಯುತ್ ಪೂರೈಕೆಗಾಗಿ ಪಾವತಿಸಬೇಕಿದ್ದ ಹಣವು ಉಳಿತಾಯವಾಗಲಿದೆ.‌ ಆ ಹಣವನ್ನ ಬೇರೊಂದು ಅಭಿವೃದ್ಧಿ ಕಾರ್ಯಕ್ಕೆ ಬಳಸಿಕೊಳ್ಳಲು ಸಹಕಾರಿಯಾಗಲಿದೆ. ಅಂದಾಜು 170 ಕೆಬಿ ವ್ಯಾಟ್ ಸಾಮರ್ಥ್ಯವುಳ್ಳ ಈ ಸೋಲಾರ್ ಸಿಸ್ಟಮ್ ಅನ್ನು ರೈಲು ನಿಲ್ದಾಣದ ಶೆಲ್ಟರ್​ಗಳ ಮೇಲೆ ಅಳವಡಿಸಲಾಗಿದೆ. ಬಿಸಿಲ ನಾಡೆಂದೇ ಖ್ಯಾತಿಯಾಗಿರುವ ಈ ಬಳ್ಳಾರಿ ಜಿಲ್ಲೆಯಲ್ಲಿ ಸೋಲಾರ್ ಸಿಸ್ಟಮ್​ನಿಂದ ಅಗತ್ಯಕ್ಕಿಂತಲೂ ಹೆಚ್ಚು ವಿದ್ಯುತ್ ಶೇಖರಣೆಯಾಗುತ್ತೆ. ಶೂನ್ಯ ಬಂಡವಾಳ ಹೂಡಿಕೆಯಲ್ಲೇ ವಿದ್ಯುತ್​ನ್ನು ಸದುಪಯೋಗ ಪಡಿಸಿಕೊಳ್ಳಬಹುದಾಗಿದೆ.

ಪ್ರತಿದಿನ 5-6 ಸಾವಿರ ಪ್ರಯಾಣಿಕರು ಪ್ರಯಾಣ:

ಪ್ರತಿದಿನ ಅಂದಾಜು 5-6 ಸಾವಿರ ಮಂದಿ ಪ್ರಯಾಣಿಕರು ಈ ರೈಲು ನಿಲ್ದಾಣ ಮಾರ್ಗವಾಗಿ ಸಂಚರಿಸುತ್ತಿರುವ ವಿವಿಧ ರೈಲುಗಳಲ್ಲಿ ಪ್ರಯಾಣಿಸುತ್ತಾರೆ. ಪ್ರತಿದಿನ ತಡರಾತ್ರಿವರೆಗೂ ಅನೇಕ ರೈಲುಗಳು ಸಂಚರಿಸುತ್ತವೆ. ಈ ಸೋಲಾರ್ ಪದ್ಧತಿ ಅಳವಡಿಕೆಯಿಂದ ಸಾವಿರಾರು ಪ್ರಯಾಣಿಕರ ಜೊತೆಗೆ ರೈಲ್ವೆ ಇಲಾಖೆ ಸಿಬ್ಬಂದಿಗೂ ಅನುಕೂಲ ಆಗಿದೆ. ಅಲ್ಲದೇ, ದಿನದ 24 ನಾಲ್ಕು ಗಂಟೆಯೂ ವಿದ್ಯುತ್ ದೀಪ, ಫ್ಯಾನ್ ಹಾಗೂ ಎಸಿಯನ್ನ ಬಳಸಿದರೂ ವಿದ್ಯುತ್ ಬಿಲ್ ಪಾವತಿಸುವ ಆತಂಕ ದೂರ ಮಾಡಿದಂತಾಗಿದೆ.