ಹೊಸಪೇಟೆಯಲ್ಲಿ 29 ನೂತನ ಲೋಕೋ ಪೈಲಟ್​ಗಳಿಗೆ ಕೊರೊನಾ: ಹೆಚ್ಚಿದ ಆತಂಕ

ಕಳೆದ ಎರಡು ದಿನಗಳಲ್ಲಿ ಹೊಸಪೇಟೆಯ 29 ನೂತನ ಲೋಕೋ ಪೈಲಟ್​ಗಳಿಗೆ ಕೊರೊನಾ ಸೋಂಕು ದೃಢಪಟ್ಟಿದ್ದು, ಲೋಕೋ ಪೈಲಟ್​ಗಳು ತಂಗಿದ್ದ ಕಟ್ಟಡವನ್ನು ಶೀಲ್​ ಡೌನ್​ ಮಾಡಲಾಗಿದೆ.

ಹೊಸಪೇಟೆ:ಹಲವು ತಿಂಗಳಿಂದ ಇಳಿಮುಖವಾಗಿದ್ದ ಕೊರೊನಾ ಪ್ರಕರಣಗಳು ಇದೀಗ ಮತ್ತೆ ಹೆಚ್ಚಾಗುತ್ತಿದ್ದು, ಎರಡನೇಯ ಅಲೆಯ ಆತಂಕ ಶುರುವಾಗಿದೆ.

ಕಳೆದ ಎರಡು ದಿನಗಳಲ್ಲಿ 29 ಲೋಕೋ ಪೈಲಟ್​ಗಳಿಗೆ ಕೊರೊನಾ ಸೋಂಕು ದೃಢಪಟ್ಟಿದ್ದು, ಈ ಪೈಕಿ ಐವರುಟ್ರಾಮಾ ಕೇರ್ ಸೆಂಟರ್​ನಲ್ಲಿ, ಮೂವರು ಹುಬ್ಬಳ್ಳಿಯಲ್ಲಿ ಹಾಗೂ 21 ಸಿಬ್ಬಂದಿ ಹೋಂ ಐಸೋಲೇಶನ್​​ಗೆ ಒಳಗಾಗಿದ್ದಾರೆ. ಲೋಕೋ ಪೈಲಟ್​ಗಳು ತಂಗಿದ್ದ ಹೊಸಪೇಟೆಯಲ್ಲಿನ ಕಟ್ಟಡವನ್ನು ಶೀಲ್​ ಡೌನ್​ ಮಾಡಲಾಗಿದ್ದು, ಈ ಪ್ರದೇಶವನ್ನು ಕಂಟೋನ್ಮೆಂಟ್ ಝೋನ್ ಆಗಿ ಪರಿವರ್ತಿಸಲಾಗಿದೆ. ​

ರೈಲು ಸಿಬ್ಬಂದಿಗೆ ಕೊರೊನಾ ಬಂದಿದ್ದು ಹೇಗೆ?: ನೂತನ ಲೋಕೋ ಪೈಲಟ್​​ಗಳು ಮಾ. 3ರಂದು ನಗರಕ್ಕೆ ಆಗಮಿಸಿದ್ದು, ಬಳಿಕ ಅವರನ್ನು ಬೇರೆ ಬೇರೆ ಕೆಲಸಗಳಿಗೆ ನಿಯೋಜಿಸಲಾಗಿತ್ತು.‌ ಎರಡು ದಿನದ ಬಳಿಕ ಒಬ್ಬರಲ್ಲಿ ಕೊರೊನಾ ಗುಣಲಕ್ಷಣ ಕಂಡುಬಂದಿದ್ದು, ಅವರನ್ನು ಪರೀಕ್ಷೆಗೊಳಪಡಿಸಿದಾಗ ಕೊರೊನಾ ಸೋಂಕು ಪತ್ತೆಯಾಗಿದೆ. ಬಳಿಕ ಅವರ ಪ್ರಾಥಮಿಕ ಸಂಪರ್ಕದಲ್ಲಿವರನ್ನು ಪರೀಕ್ಷೆಗೆ ಒಳಪಡಿಸಲಾಗಿದ್ದು, ಒಟ್ಟು 29 ಮಂದಿಗೆ ಸೋಂಕು ದೃಢಪಟ್ಟಿದೆ. ಇನ್ನೂ 50 ಜನರ ಪರೀಕ್ಷೆಯ ವರದಿ ಬರಬೇಕಾಗಿದೆ.

ಟ್ರಾವೆಲ್ ಹಿಸ್ಟರಿ: ಹೊಸಪೇಟೆಗೆ ಬರುವುದಕ್ಕೂ ಮುನ್ನ ಲೋಕೋ ಪೈಲಟ್​ಗಳು‌‌ ಹುಬ್ಬಳ್ಳಿ ಹಾಗೂ ಬೆಂಗಳೂರಿನಲ್ಲಿ ತರಬೇತಿ ಪಡೆದುಕೊಂಡು ಬಂದಿದ್ದಾರೆ. 29 ಸಿಬ್ಬಂದಿ ಬೇರೆ ಬೇರೆ ರಾಜ್ಯಗಳಿಂದ ಬಂದವರು. ಅವರು ಐದು ತಿಂಗಳಿಂದ ಒಂದೇ ಕಡೆ ಇರಲಿಲ್ಲ, ಬದಲಾಗಿ ಬೇರೆ ಬೇರೆ ಕಡೆ ಪ್ರಯಾಣಿಸಿದ್ದಾರೆ. ಹೀಗಾಗಿ ‌‌ಯಾವ ಸಂದರ್ಭದಲ್ಲಿ ಸೋಂಕು ತಗುಲಿದೆ ಎಂಬುದು ನಿಗೂಢವಾಗಿದೆ.

ನಿರಂತರ ತಪಾಸಣೆ:ಸೋಂಕಿತರನ್ನು ಪ್ರತಿ‌ನಿತ್ಯ ತಪಾಸಣೆಗೆ ಒಳಪಡಿಸಲಾಗುತ್ತಿದ್ದು, ಬೆಳಗ್ಗೆ ಹಾಗೂ ಸಂಜೆ ಹಾರ್ಟ್ ಮತ್ತು ಪಲ್ಸ್ ಪರೀಕ್ಷೆಗೆ ಒಳಪಡಿಸಲಾಗುತ್ತಿದೆ. ಈ ಪರೀಕ್ಷೆಯಲ್ಲಿ 94ಕ್ಕಿಂತ ಕಡಿಮೆ ಬಂದವರಿಗೆ ‌ಹೆಚ್ಚಿನ ಚಿಕಿತ್ಸೆಗಾಗಿ ಬಳ್ಳಾರಿಗೆ ರವಾನಿಸಲಾಗುತ್ತಿದೆ.

396 ಮನೆಗಳ ಜನರಿಗೆ ತಪಾಸಣೆ: ಮುನ್ನೆಚ್ಚರಿಕೆ ಕ್ರಮವಾಗಿ ಲೋಕೋ ಪೈಲಟ್​​ ತಂಗಿದ್ದ ಪ್ರದೇಶದಲ್ಲಿನ 396 ಮನೆಗಳಜನರನ್ನು ತಪಾಸಣೆಗೆ ಒಳಪಡಿಸಲಾಗುತ್ತಿದೆ.‌