ಲಾಕ್​ಡೌನ್ ಎಫೆಕ್ಟ್: ಸಂಕಷ್ಟದಲ್ಲಿ ಕುಬೇರರ ನಾಡಿನ ಜೀನ್ಸ್ ಕಾರ್ಮಿಕರು

ಬಳ್ಳಾರಿಯ ಜೀನ್ಸ್ ಉತ್ಪನ್ನಗಳು ದೇಶ -ವಿದೇಶಗಳಲ್ಲಿ ಕೂಡ ಸದ್ದು‌ ಮಾಡಿದೆ. ಆದರೆ ಕಳೆದೊಂದು ತಿಂಗಳಿಂದ ಕೊರೊನಾ ವೈರಸ್​ ಹಿನ್ನಲೆ ಜೀನ್ಸ್ ಉದ್ಯಮ ಬಂದ್​ ಆಗಿದ್ದು ಸಾವಿರಾರು ಕಾರ್ಮಿಕರಿಗೆ ಕುಟುಂಬ ನಿರ್ವಹಣೆ ಕಷ್ಟಕರವಾಗಿದೆ.

ಬಳ್ಳಾರಿ: ಲಾಕ್​ಡೌನ್ ಎಫೆಕ್ಟ್​ನಿಂದ ಗಣಿನಾಡಿನ ಜೀನ್ಸ್ ಉದ್ಯಮ ಸಂಪೂರ್ಣವಾಗಿ ನೆಲಕಚ್ಚಿದೆ. ಜಿಲ್ಲೆಯ ಜೀನ್ಸ್ ಘಟಕಗಳಲ್ಲಿ ಕಾರ್ಯನಿರ್ವಹಿಸುವ ಸಾವಿರಾರು ಕಾರ್ಮಿಕರ ಜೀವನ ಇದೀಗ ದುಸ್ತರವಾಗಿದೆ.

ಬಳ್ಳಾರಿಯ ಜೀನ್ಸ್ ಉತ್ಪನ್ನಗಳು ದೇಶ - ವಿದೇಶಗಳಲ್ಲಿ ಕೂಡ ಸದ್ದು‌ ಮಾಡಿದೆ. ಆದರೆ ಕಳೆದೊಂದು ತಿಂಗಳಿಂದ ಕೊರೊನಾ ವೈರಸ್​ ಹಿನ್ನೆಲೆ ಜೀನ್ಸ್ ಉದ್ಯಮ ಸ್ತಬ್ಧವಾಗಿದೆ. ಇದರಿಂದ ಜೀನ್ಸ್ ಘಟಕಗಳನ್ನೇ ನೆಚ್ಚಿಕೊಂಡು ಕೆಲಸ ಮಾಡುತ್ತಿರುವ ಸಾವಿರಾರು ಕಾರ್ಮಿಕರಿಗೆ ಕುಟುಂಬ ನಿರ್ವಹಣೆ ಕಷ್ಟಕರವಾಗಿದೆ.

ಟೈಲರ್, ಬಟ್ಟೆ ಕಟ್ ಮಾಡುವ ಕಾರ್ಮಿಕರಿಂದ ಹಿಡಿದು ಇನ್ನಿತರೆ ವಲಯದ ಕಾರ್ಮಿಕರ ಗೋಳು ಹೇಳತೀರದಾಗಿದೆ. ಈ ಜೀನ್ಸ್ ಉತ್ಪನ್ನಗಳು ದೇಶದ ನಾನಾ ರಾಜ್ಯ ಹಾಗೂ ವಿದೇಶಗಳಲ್ಲಿ ಕೂಡ ಮಾರಾಟ ಆಗುತ್ತಿದ್ದವು. ಅಂತಾರಾಷ್ಟ್ರೀಯ ಮಟ್ಟದ ಖ್ಯಾತಿಯನ್ನು ಈ ಜೀನ್ಸ್ ಉದ್ಯಮ ಗಳಿಸಿತ್ತಾದ್ರು ಕೂಡ ಇದನ್ನೇ ನೆಚ್ಚಿಕೊಂಡಿರುವ ಕಾರ್ಮಿಕರ ಜೀವನ ಮೂರಾಬಟ್ಟೆ ಆಗಿರುವುದಂತು ಸತ್ಯ.

ಕಾರ್ಮಿಕರ ಸಂಖ್ಯೆ ಎಷ್ಟಿದೆ?:

ಈ ಜೀನ್ಸ್ ಘಟಕಗಳಲ್ಲಿ ಅಂದಾಜು 20 ರಿಂದ 30 ಸಾವಿರ ಕಾರ್ಮಿಕರು ಕೆಲಸ ಮಾಡುತ್ತಿದ್ದಾರೆ. ನೆರೆಯ ಆಂಧ್ರಪ್ರದೇಶ ನಾನಾ ಗ್ರಾಮಗಳಿಂದ ಸಹ ಕೆಲ ಕಾರ್ಮಿಕರು ಈ ಜೀನ್ಸ್ ಘಟಕಕ್ಕೆ ಕೆಲಸ ಮಾಡಲು‌ ಬರುತ್ತಿದ್ದರು. ಆದ್ರೆ ‌ಲಾಕ್ ಡೌನ್​ನಿಂದಾಗಿ ಕಾರ್ಮಿಕರಿಗೆ ಕೆಲಸದ ಜೊತೆ ಹಣವೂ ಇಲ್ಲದಂತಾಗಿದೆ.

ಈ ಸಂಬಂಧ ಈಟಿವಿ ಭಾರತದೊಂದಿಗೆ ಜೀನ್ಸ್ ಘಟಕದ ಕಾರ್ಮಿಕ ಗೋವಿಂದ ಅವರು ಮಾತನಾಡಿ, ಜೀನ್ಸ್ ಘಟಕ ಲಾಕ್​ಡೌನ್ ಆದಾಗಿನಿಂದ ನಮ್ಮ ನೆರವಿಗೆ ರಾಜ್ಯ ಸರ್ಕಾರ ಬಂದಿಲ್ಲ, ಅಂದಾಜು 30,000 ಕಾರ್ಮಿಕರು ಕೆಲಸ ಮಾಡುತ್ತಿದ್ದು, ನಮ್ಮಗಳ ಬದುಕು ದುಸ್ತರವಾಗಿದೆ ಎಂದ್ರು.