ಕಾಣೆಯಾದ ತಂದೆಯನ್ನು ಹುಡುಕಲು ಹೋದ ಮಗ ರಸ್ತೆ ಅಪಘಾತದಲ್ಲಿ ಸಾವು

ನಾಪತ್ತೆಯಾಗಿದ್ದ ತನ್ನ ತಂದೆಯನ್ನು ಹುಡುಕುವ ನಿಟ್ಟಿನಲ್ಲಿ ಸ್ವಾಮೀಜಿಯೊಬ್ಬರನ್ನು ಭೇಟಿಯಾಗಿ ಮರಳಿ ಮನೆಯತ್ತ ತೆರಳುತ್ತಿದ್ದ ಮಗನೋರ್ವ ಅಪಘಾತದಲ್ಲಿ ಲಾರಿಯ ಚಕ್ರಕ್ಕೆ ಸಿಲುಕಿ ಸಾವನ್ನಪ್ಪಿದ್ದಾನೆ.

ಬಳ್ಳಾರಿ: ಕಾಣೆಯಾಗಿದ್ದ ತನ್ನ ತಂದೆಯನ್ನು ಹುಡುಕಲು ಹೋಗಿ ಮಗ ರಸ್ತೆ ಅಪಘಾತದಲ್ಲಿ ಮೃತಪಟ್ಟಿರುವ ದಾರುಣ ಘಟನೆ ತಾಲೂಕಿನ ಕೊಳಗಲ್ ಗ್ರಾಮದ ಬಳಿ ನಡೆದಿದೆ.

ಬಳ್ಳಾರಿ 35ನೇ ವಾರ್ಡ್​ನ ನಿವಾಸಿ ತಿಪ್ಪೇಸ್ವಾಮಿ (40) ಮೃತ ದುರ್ದೈವಿ. ತಿಪ್ಪೇಸ್ವಾಮಿಯವರ ತಂದೆ ದೊರೆಸ್ವಾಮಿ ಮನೆಯಿಂದ ಕಾಣೆಯಾಗಿದ್ದರು. ತನ್ನ ತಂದೆಯ ಜಾಡು ಪತ್ತೆ ಹಚ್ಚಲು ಕೊಳಗಲ್​ ಗ್ರಾಮದ ಸ್ವಾಮೀಜಿಯೊಬ್ಬರನ್ನು ಭೇಟಿಯಾಗಿ ಮರಳಿ ಬೈಕ್​ನಲ್ಲಿ ಬಳ್ಳಾರಿಗೆ ಆಗಮಿಸುತ್ತಿರುವಾಗ ಅಪಘಾತ ಸಂಭವಿಸಿದೆ. ಲಾರಿ ಟೈಯರ್ ಕೆಳಗೆ ಸಿಲುಕಿರುವ ಅವರು ಸ್ಥಳದಲ್ಲೇ ಮೃತಪಟ್ಟಿದ್ದಾರೆ.

ಅದೃಷ್ಟವಶಾತ್, ಹಿಂಬದಿ ಕುಳಿತಿದ್ದ ಪತ್ನಿ ಚಂದ್ರೇಶ್ವರಿಗೆ ಸಣ್ಣಪುಟ್ಟ ಗಾಯಗಳಾಗಿದ್ದು, ಪ್ರಾಣಾಪಾಯದ ಪಾರಾಗಿದ್ದಾರೆ. ಗ್ರಾಮೀಣ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ಘಟನೆ ನಡೆದಿದೆ.