ಅಥಣಿ: ಕೊರೊನಾ ವೈರಸ್ನಿಂದ ರಕ್ಷಿಸಿಕೊಳ್ಳಲು ರುಬೊಲ ಎಂಬ ಹಳೇ ರೋಗದ ಚುಚ್ಚುಮದ್ದು ಉಪಯೋಗವಾಗಲಿದೆ. ಹೀಗಾಗಿ, ಅದನ್ನು ಕೊರೊನಾ ವಾರಿಯರ್ಸ್ ಹಾಗೂ ಎಸ್ಎಸ್ಎಲ್ಸಿ ಮಕ್ಕಳಿಗೆ ತಕ್ಷಣ ನೀಡಬೇಕು ಎಂದು ಅಥಣಿ ಗುಳ್ಳ ಆಸ್ಪತ್ರೆಯ ವೈದ್ಯ ರಮೇಶ್ ಗುಳ್ಳ ಸರ್ಕಾರಕ್ಕೆ ಸಲಹೆ ನೀಡಿದರು.
ಈಟಿವಿ ಭಾರತ ಜೊತೆ ಮಾತನಾಡಿದ ಅವರು, ರುಬೊಲ ಎಂಬ ಹಳೇ ವೈರಾಣು ಶೇ.30ರಷ್ಟು ಕೊರೊನಾ ವೈರಸ್ ಹೋಲಿಕೆ ಇರುವುದು ಗೊತ್ತಾಗಿದೆ. ರುಬೊಲ ರೋಗ ತಡೆಗೆ ಲಭ್ಯವಿರುವ 'ಎಮ್ಆರ್ ಅಥವಾ ಎಮ್ಎಮ್ಆರ್' ಲಸಿಕೆಯನ್ನು ಹೊಸ ಬಳಕೆಯಾಗಿ ಕೋವಿಡ್ ರೋಗಿಗಳಿಗೆ ನೀಡಬೇಕು ಎಂದು ಅಭಿಪ್ರಾಯಪಟ್ಟರು.
ಕೊರೊನಾ ವೈರಸ್ ರೋಗಿಗಳಿಗೆ ಈ ಲಸಿಕೆ ನೀಡಿದರೆ, ಸಾವನ್ನಪ್ಪುವ ಪ್ರಮಾಣ ನಿಸ್ಸಂದೇಹವಾಗಿ ಕಡಿಮೆಯಾಗುತ್ತದೆ. ಇದಕ್ಕೆ ಸಾಕಷ್ಟು ಪುರಾವೆಗಳು ನಮ್ಮ ಕಣ್ಣ ಮುಂದೆಯೇ ಇವೆ. ಈ ಲಸಿಕೆ ನೀಡುವ ಮಡಗಾಸ್ಕರ್ ಮತ್ತು ಹಾಂಗ್ಕಾಂಗ್ ದೇಶಗಳಲ್ಲಿ ಕೋವಿಡ್ ಮರಣಗಳು ಇಲ್ಲವೇ ಇಲ್ಲ ಎಂದರು.
ಎರಡೂವರೆ ಕೋಟಿಗಿಂತ ಹೆಚ್ಚು ಜನರಿರುವ ಮಡಗಾಸ್ಕರ್ ದೇಶದಲ್ಲಿ ಈ ಲಸಿಕೆಯನ್ನು ಸಾರ್ವತ್ರಿಕವಾಗಿ ನೀಡಲಾಗುತ್ತಿದೆ. ಕಳೆದ ವರ್ಷ ಕಾರಣಾಂತರದಿಂದ ಕಾಲು ಭಾಗದ ಜನರಿಗೆ ಹೆಚ್ಚುವರಿಯಾಗಿ ಲಸಿಕೆಯನ್ನು ನೀಡಿತ್ತು. ಈಗ ಅಲ್ಲಿ ಒಂದು ಕೋವಿಡ್ ಮರಣ ದಾಖಲಾಗಿಲ್ಲ. ಇದು ಆಶ್ಚರ್ಯಕರ ವಿಷಯವಾದರೂ ನಿಜ. ಅಲ್ಲಿ 4 ಪ್ರಕರಣಗಳು ಮಾತ್ರ ದಾಖಲಾಗಿವೆ ಎಂದರು.
ಈ ಲಸಿಕೆಯಿಂದ ಅಡ್ಡ ಪರಿಣಾಮಗಳು ಸಂಭವಿಸುವುದಿಲ್ಲ. ಹೀಗಾಗಿ ಭಾರತ ಸರ್ಕಾರ ಅದರ ಬಳಕೆಗೆ ಅವಕಾಶ ನೀಡಬೇಕು. ಅಥಣಿ ತಹಶೀಲ್ದಾರ್ ಮೂಲಕ ಸರ್ಕಾರಕ್ಕೆ ಮನವಿ ಸಲ್ಲಿಸಿದ್ದೇನೆ. ಕೋವಿಡ್ನಿಂದ ರಕ್ಷಿಸಲು ಸ್ವತಃ ತಮ್ಮ ಕುಟುಂಬದವರು ಈ ಲಸಿಕೆ ತೆಗೆದುಕೊಂಡಿದ್ದೇವೆ. ಇದರಿಂದ ಅಡ್ಡಪರಿಣಾಮ ಇಲ್ಲ. ಆರೋಗ್ಯ ಇಲಾಖೆ ಇದನ್ನು ಆಯೋಜಿಸಿ ಮುಂದಿನ ತೀರ್ಮಾನ ತೆಗೆದುಕೊಳ್ಳಬೇಕು ಎಂಬುದು ನನ್ನ ಸಲಹೆ ಎಂದು ತಿಳಿಸಿದರು.