ಸ್ಯಾನ್ ಫ್ರಾನ್ಸಿಸ್ಕೋ:ಜನಪ್ರಿಯ ಮೈಕ್ರೋಬ್ಲಾಗಿಂಗ್ ಸಾಮಾಜಿಕ ಜಾಲತಾಣ ವೇದಿಕೆ ಟ್ವಿಟರ್ ದಿನಕ್ಕೊಂದು ನಿಯಮಗಳನ್ನು ಹೊರತರುತ್ತಿದೆ. ಜಗತ್ತಿನ ಶ್ರೀಮಂತ ವ್ಯಕ್ತಿ ಎಲಾನ್ ಮಸ್ಕ್ ಅವರು ಟ್ವಿಟರ್ ಖರೀದಿಸಿದ ಬಳಿಕ ಹತ್ತಾರು ನಿರ್ಬಂಧಗಳನ್ನು ವಿಧಿಸುತ್ತಲೇ ಇದ್ದಾರೆ. ಇದೀಗ ಹೊಸದಾಗಿ 'ಪರಿಶೀಲಿಸಿದ ಖಾತೆಗಳಿಗೆ ದಿನಕ್ಕೆ 6,000, ಪರಿಶೀಲಿಸದ ಅಕೌಂಟ್ಗಳಿಗೆ ಕೇವಲ 600 ಟ್ವೀಟ್ಗಳನ್ನು ಮಾತ್ರ ನೋಡುವ ಮಿತಿ' ಹೇರಲಾಗಿದೆ. ಇದರಿಂದ ಬಳಕೆದಾರರು ತೊಂದರೆಗೆ ಒಳಗಾಗಿದ್ದಾರೆ.
ಶನಿವಾರ ಟ್ವಿಟರ್ ಹಲವು ಗಂಟೆಗಳ ಕಾಲ ಸ್ಥಗಿತಗೊಂಡಿತ್ತು. ಭಾನುವಾರ ಕೂಡ ಬಳಕೆಗೆ ಲಭ್ಯವಿರಲಿಲ್ಲ. ಈ ಬಗ್ಗೆ ಸಾವಿರಾರು ಬಳಕೆದಾರರು ದೂರು ಸಲ್ಲಿಸಿದ್ದಾರೆ. ಇದಾದ ಬಳಿಕವೇ ಹೊಸ ಮಿತಿ ಹೇರಿದ್ದು ಗೊತ್ತಾಗಿದೆ. ಖಾತೆಗೆ ವಿಧಿಸಲಾದ ತಿಂಗಳ ಮೊತ್ತ ಪಾವತಿಸದೇ ಉಚಿತವಾಗಿ ಬಳಕೆ ಮಾಡುತ್ತಿರುವ ಜನರಿಗೆ ಹೆಚ್ಚಿನ ಟ್ವೀಟ್ಗಳು ಲಭ್ಯವಾಗದಂತೆ ನಿರ್ಬಂಧ ಹಾಕಲಾಗಿದೆ. ಕೇವಲ 600 ಟ್ವೀಟ್ ಮಾತ್ರ ನೋಡುವ, ಪೋಸ್ಟ್ ಮಾಡುವ ಅವಕಾಶವಿದೆ.
ವಿಶ್ವಾದ್ಯಂತ 200 ಮಿಲಿಯನ್‌ಗಿಂತಲೂ ಹೆಚ್ಚು ಟ್ವಿಟರ್ ಬಳಕೆದಾರರು ಇದ್ದಾರೆ. ನಿನ್ನೆಯಿಂದ ಪ್ರಪಂಚದ ಹಲವು ಭಾಗಗಳಲ್ಲಿ ಸಾಮಾಜಿಕ ಮಾಧ್ಯಮ ಸ್ಥಗಿತಗೊಂಡಿದೆ. ಇದರಿಂದ TwitterDown ಹ್ಯಾಶ್‌ಟ್ಯಾಗ್ ಟ್ರೆಂಡ್ ಆಗಿತ್ತು. ಟ್ವೀಟ್ಗಳು ಮತ್ತು ಪೋಸ್ಟ್ ವೀಕ್ಷಿಸಲು ಜನರು ಲಾಗ್‌ ಇನ್ ಆಗಲು ಪರದಾಡಿದರು.
ಇದನ್ನೂ ಓದಿ:Twitter New Rule: ಖಾತೆ ಇಲ್ಲದೇ ಇನ್ಮುಂದೆ ಟ್ವಿಟರ್ ಜಾಲಾಡಲು ಸಾಧ್ಯವಿಲ್ಲ; ಹೊಸ ನಿಯಮ ತಂದ ಮಸ್ಕ್
ಡೇಟಾ ಕಳವು ತಡೆಗೆ ಕ್ರಮ:ಹೊಸ ನಿರ್ಬಂಧದ ಬಗ್ಗೆ ಎಲಾನ್ ಮಸ್ಕ್ ಟ್ವೀಟ್ ಮಾಡಿ ಮಾಹಿತಿ ನೀಡಿದ್ದು, ಡೇಟಾ ಕಳ್ಳತನವನ್ನು ತಡೆಯುವ ಭಾಗವಾಗಿ ಈ ತಾತ್ಕಾಲಿಕ ಕ್ರಮವನ್ನು ಜಾರಿ ಮಾಡಲಾಗಿದೆ. ಪರಿಶೀಲಿಸದ ಖಾತೆಗಳ ಮೇಲೆ ಹೆಚ್ಚಿನ ನಿರ್ಬಂಧಗಳನ್ನು ವಿಧಿಸಿದ ಬಗ್ಗೆಯೂ ವಿವರಿಸಿದ್ದು, ದಿನಕ್ಕೆ 600 ಪೋಸ್ಟ್‌ಗಳನ್ನು ಓದಲು ಸೀಮಿತಗೊಳಿಸಲಾಗಿದೆ. ಹಣ ಪಾವತಿಸಿ ಪರಿಶೀಲಿಸಿಕೊಂಡ ಖಾತೆಗಳು ದಿನಕ್ಕೆ 6,000 ಪೋಸ್ಟ್‌ಗಳವರೆಗೆ ನೋಡಲು ಅವಕಾಶವಿದೆ. ಈ ನಿಯಮ ತಾತ್ಕಾಲಿಕ ಎಂದು ಮಸ್ಕ್ ಹೇಳಿದ್ದಾರೆ. ಹೊಸದಾಗಿ ನಿಗದಿ ಮಾಡಲಾದ ನಿಯಮದಂತೆ 600 ಟ್ವೀಟ್ ಸ್ಕ್ರಾಲ್ ಮಾಡಿದ ಬಳಿಕ ಖಾತೆ ತನ್ನಿಂದತಾನೇ ಲಾಗೌಟ್ ಆಗಲಿದೆ. ಇದು ವಿಶ್ವದ ಎಲ್ಲ ಬಳಕೆದಾರರಿಗೆ ಅನ್ವಯ ಎಂದು ಕಂಪನಿ ಹೇಳಿದೆ.
ಹೊಸ ಹೊಸ ನಿಯಮ..:ವಿಶ್ವದ ಸಿರಿವಂತ ವ್ಯಕ್ತಿಯಾದ ಎಲಾನ್ ಮಸ್ಕ್ ಟ್ವಿಟರ್ ಅನ್ನು 44 ಮಿಲಿಯನ್ ಡಾಲರ್ಗೆ ಖರೀದಿ ಮಾಡಿದ ಬಳಿಕ ಖಾತೆಗಳ ವೆರಿಫೈಡ್ಗೆ ತಿಂಗಳಿಗೆ 8 ಡಾಲರ್ ಚಂದಾದಾರಿಕೆ ತಂದಿದ್ದರು. ಇದು ಟ್ವಿಟರ್ ಆದಾಯವನ್ನು ಹೆಚ್ಚಿಸುವ ಪ್ರಯತ್ನವಾಗಿತ್ತು. ಇದರ ಜಾರಿಯ ಬಳಿಕ ಕಂಪನಿಯ ಆದಾಯ ತೀವ್ರವಾಗಿ ಕುಸಿದಿತ್ತು. ಸರಿಸುಮಾರು ಮುಕ್ಕಾಲು ಭಾಗದಷ್ಟು ಆದಾಯ ಖೋತಾ ಆಗಿತ್ತು ಇದನ್ನು ತಡೆಯಲು ಅಲ್ಲಿನ ಸಿಬ್ಬಂದಿಯನ್ನು ಮಸ್ಕ್ ಕೈಬಿಟ್ಟಿದ್ದರು.
ಇದಲ್ಲದೇ, ಟ್ವಿಟರ್ ಜಾಲಾಡಬೇಕಾದರೆ ಸ್ವತಃ ಅಕೌಂಟ್ ಹೊಂದಿರಬೇಕು. ನಿಗದಿತ ಖಾತೆ ಮೂಲಕವೇ ಟ್ವೀಟ್ಗಳ ಓದಲು ಸಾಧ್ಯವಾಗುವಂತೆ ಮಾಡಲಾಗಿದೆ. ಯಾವುದೇ ಟ್ವೀಟ್ ಓದಬೇಕು ಎಂದರೂ ಟ್ವಿಟರ್ ಖಾತೆಯಿಂದ ಲಾಗಿನ್ ಆಗುವುದು ಕಡ್ಡಾಯ.
ಇದನ್ನೂ ಓದಿ:ಹಲವು ಗಂಟೆಗಳ ಕಾಲ ಸ್ಥಗಿತಗೊಂಡಿದ್ದ ಟ್ವಿಟರ್.. ಸಂಕಷ್ಟ ಎದುರಿಸಿದ ಬಳಕೆದಾರರು
