ದಾಖಲೆಯ ಏರಿಕೆ ಕಂಡ ಷೇರು ಮಾರುಕಟ್ಟೆ; ಸೆನ್ಸೆಕ್ಸ್​ 1383 & ನಿಫ್ಟಿ 418 ಪಾಯಿಂಟ್ ಹೆಚ್ಚಳ

ಮೂರು ರಾಜ್ಯ ವಿಧಾನಸಭಾ ಚುನಾವಣೆಗಳಲ್ಲಿ ಬಿಜೆಪಿ ಗೆಲುವಿನ ನಂತರ ಭಾರತದ ಷೇರು ಮಾರುಕಟ್ಟೆಗಳು ಸಾರ್ವಕಾಲಿಕ ಏರಿಕೆಯೊಂದಿಗೆ ಕೊನೆಗೊಂಡಿವೆ.

ಮುಂಬೈ: ಈಕ್ವಿಟಿ ಬೆಂಚ್ ಮಾರ್ಕ್ ಸೂಚ್ಯಂಕಗಳಾದ ಸೆನ್ಸೆಕ್ಸ್ ಮತ್ತು ನಿಫ್ಟಿ ಸೋಮವಾರ ಶೇಕಡಾ 2 ಕ್ಕಿಂತ ಹೆಚ್ಚು ಏರಿಕೆ ಕಂಡು ಸಾರ್ವಕಾಲಿಕ ದಾಖಲೆಯ ಗರಿಷ್ಠ ಮಟ್ಟದಲ್ಲಿ ಕೊನೆಗೊಂಡವು. ಮೂರು ರಾಜ್ಯಗಳ ವಿಧಾನಸಭಾ ಚುನಾವಣೆಯಲ್ಲಿ ಬಿಜೆಪಿಯ ಗೆಲುವು ಹೂಡಿಕೆದಾರರಲ್ಲಿ ಸಕಾರಾತ್ಮಕ ಭಾವನೆ ಮೂಡಿಸಿದ್ದರಿಂದ ಮಾರುಕಟ್ಟೆ ಸತತ ಐದನೇ ದಿನ ಲಾಭ ಗಳಿಸಿದೆ.

ಮಧ್ಯಪ್ರದೇಶ, ರಾಜಸ್ಥಾನ ಮತ್ತು ಛತ್ತೀಸಗಢ ರಾಜ್ಯಗಳ ಚುನಾವಣೆಗಳಲ್ಲಿ ಬಿಜೆಪಿಯ ಸ್ಪಷ್ಟ ಬಹುಮತವು ದೃಢವಾದ ಸ್ಥೂಲ ಆರ್ಥಿಕ ಪರಿಸ್ಥಿತಿ ಮತ್ತು ಅಡೆತಡೆಯಿಲ್ಲದ ವಿದೇಶಿ ನಿಧಿಯ ಒಳಹರಿವಿನ ಸಕಾರಾತ್ಮಕ ಭಾವನೆಯನ್ನು ಬಲಪಡಿಸಿದೆ ಎಂದು ವಿಶ್ಲೇಷಕರು ಹೇಳಿದ್ದಾರೆ. ಇದಲ್ಲದೆ, ಕಚ್ಚಾ ತೈಲ ಬೆಲೆಗಳು ಬ್ಯಾರೆಲ್​ಗೆ 80 ಡಾಲರ್​ಗಿಂತ ಕಡಿಮೆ ಇರುವುದು ಕೂಡ ಹೂಡಿಕೆದಾರರಲ್ಲಿ ಆಶಾಭಾವನೆ ಮೂಡಿಸಿದೆ.

30 ಷೇರುಗಳ ಬಿಎಸ್ಇ ಸೆನ್ಸೆಕ್ಸ್ 1,383.93 ಪಾಯಿಂಟ್ಸ್ ಅಥವಾ ಶೇಕಡಾ 2.05 ರಷ್ಟು ಏರಿಕೆ ಕಂಡು 68,865.12 ಕ್ಕೆ ತಲುಪಿದೆ. ಇದು ದಿನದ ವಹಿವಾಟಿನಲ್ಲಿ 68,918.22 ರ ಇಂಟ್ರಾ-ಡೇ ದಾಖಲೆಯ ಗರಿಷ್ಠ ಮಟ್ಟವನ್ನು ಮುಟ್ಟಿತ್ತು. ಬಿಎಸ್ಇ ಸೆನ್ಸೆಕ್ಸ್ ಮೇ 20, 2022 ರ ನಂತರ ತನ್ನ ಅತಿದೊಡ್ಡ ಏಕ ದಿನದ ಜಿಗಿತವನ್ನು ದಾಖಲಿಸಿದೆ.

ವಿಶಾಲ ನಿಫ್ಟಿ ಸಹ 418.90 ಪಾಯಿಂಟ್ ಅಥವಾ ಶೇಕಡಾ 2.07 ರಷ್ಟು ಏರಿಕೆ ಕಂಡು ಸಾರ್ವಕಾಲಿಕ ಗರಿಷ್ಠ 20,686.80 ಕ್ಕೆ ತಲುಪಿದೆ. 50 ಷೇರುಗಳ ಬೆಂಚ್ ಮಾರ್ಕ್ ನಿಫ್ಟಿಯಲ್ಲಿ 44 ಷೇರುಗಳು ಲಾಭದೊಂದಿಗೆ ಕೊನೆಗೊಂಡವು.

ಸೆನ್ಸೆಕ್ಸ್ ನಲ್ಲಿ ಐಸಿಐಸಿಐ ಬ್ಯಾಂಕ್ ಮತ್ತು ಎಸ್​ಬಿಐ ಕ್ರಮವಾಗಿ ಶೇಕಡಾ 4.68 ಮತ್ತು ಶೇಕಡಾ 3.99 ರಷ್ಟು ಗರಿಷ್ಠ ಲಾಭದೊಂದಿಗೆ ಸೂಚ್ಯಂಕದಲ್ಲಿ ಮುಂಚೂಣಿಯಲ್ಲಿವೆ. ಲಾರ್ಸನ್ ಆಂಡ್ ಟೂಬ್ರೊ, ಕೊಟಕ್ ಮಹೀಂದ್ರಾ ಬ್ಯಾಂಕ್ ಮತ್ತು ಎಚ್ ಡಿಎಫ್ ಸಿ ಬ್ಯಾಂಕ್ ಲಾಭ ಗಳಿಸಿದ ಇತರ ಪ್ರಮುಖ ಷೇರುಗಳಾಗಿವೆ. ಮತ್ತೊಂದೆಡೆ, ವಿಪ್ರೋ ಮತ್ತು ಟಾಟಾ ಮೋಟಾರ್ಸ್ ನಷ್ಟ ಅನುಭವಿಸಿದವು.

ವಿದೇಶಿ ಸಾಂಸ್ಥಿಕ ಹೂಡಿಕೆದಾರರು ಶುಕ್ರವಾರ 1,589.61 ಕೋಟಿ ರೂಪಾಯಿ ಮೌಲ್ಯದ ಷೇರುಗಳನ್ನು ಖರೀದಿಸಿದ್ದಾರೆ ಎಂದು ವಿನಿಮಯ ಕೇಂದ್ರದ ಅಂಕಿ ಅಂಶಗಳು ತಿಳಿಸಿವೆ. ಏಷ್ಯಾದ ಮಾರುಕಟ್ಟೆಗಳಲ್ಲಿ, ಹಾಂಗ್ ಸೆಂಗ್ ಶೇಕಡಾ 1.10 ರಷ್ಟು ಕುಸಿದರೆ, ಜಪಾನ್ ನ ನಿಕೈ 225 ಶೇಕಡಾ 0.70 ಮತ್ತು ಚೀನಾದ ಶಾಂಘೈ ಕಾಂಪೊಸಿಟ್ ಶೇಕಡಾ 0.29 ರಷ್ಟು ಕುಸಿದಿದೆ.

ಇದನ್ನೂ ಓದಿ : ಆರೇ ದಿನದಲ್ಲಿ ಗೌತಮ್ ಅದಾನಿ ಸಂಪತ್ತು 46 ಸಾವಿರ ಕೋಟಿ ರೂ. ಹೆಚ್ಚಳ!