2011ರ ನಂತರ ಜಾಗತಿಕವಾಗಿ ಅತ್ಯಧಿಕ ಮಟ್ಟಕ್ಕೇರಿದ ಅಕ್ಕಿ ಬೆಲೆ

ಜಾಗತಿಕವಾಗಿ ಅಕ್ಕಿ ದರ ಭಾರಿ ಹೆಚ್ಚಳವಾಗುತ್ತಿದೆ. ಭಾರತವು ತನ್ನ ದೇಶದಿಂದ ಅಕ್ಕಿ ರಫ್ತು ನಿಷೇಧಿಸಿದ ನಂತರ ಮತ್ತು ಅಕ್ಕಿ ಬೆಳೆ ಕಡಿಮೆಯಾಗಿರುವುದರಿಂದ ಬೆಲೆಗಳು ಹೆಚ್ಚಾಗುತ್ತಿವೆ.

ನವದೆಹಲಿ : ವಿಶ್ವಸಂಸ್ಥೆಯ ಆಹಾರ ಮತ್ತು ಕೃಷಿ ಸಂಘಟನೆಯ (ಎಫ್ಎಒ) ಎಲ್ಲಾ ಅಕ್ಕಿ ಬೆಲೆ ಸೂಚ್ಯಂಕವು (All Rice Price Index) ತಿಂಗಳಲ್ಲಿ ಶೇಕಡಾ 2.8 ರಷ್ಟು ಹೆಚ್ಚಾಗಿ ಶೇ 19.7ಕ್ಕೆ ತಲುಪಿದೆ. ಸೆಪ್ಟೆಂಬರ್ 2011 ರ ನಂತರ ಆಲ್ ರೈಸ್ ಪ್ರೈಸ್​ ಇಂಡೆಕ್ಸ್​ನ ಅತ್ಯಧಿಕ ಮಟ್ಟ ಇದಾಗಿದೆ. ಜುಲೈ 20ರಂದು ಭಾರತವು ಸ್ಟೀಮ್​ ಮಾಡದ ಭಾರತೀಯ ಅಕ್ಕಿಯ ರಫ್ತನ್ನು ನಿಷೇಧಿಸಿದ್ದರಿಂದ ಇತರ ಮಾದರಿಯ ಅಕ್ಕಿಯ ಬೆಲೆಗಳು ಹೆಚ್ಚಾಗಬಹುದು ಎಂಬ ನಿರೀಕ್ಷೆಯಿಂದ ಮತ್ತು ಈಗಾಗಲೇ ಕೆಟ್ಟ ಹವಾಮಾನದ ಕಾರಣದಿಂದ ಅಕ್ಕಿ ಇಳುವರಿ ಕಡಿಮೆಯಾಗಿರುವುದರಿಂದ ಜಾಗತಿಕವಾಗಿ ಅಕ್ಕಿ ಬೆಲೆಗಳು ಹೆಚ್ಚಾಗುತ್ತಿವೆ.

ಅಕ್ಕಿ ಬೆಲೆಗಳು ತೀರಾ ಏರಿಕೆ ಮಟ್ಟಕ್ಕೆ ತಲುಪುತ್ತಿರುವುದರಿಂದ ಜಾಗತಿಕವಾಗಿ ಬಹುದೊಡ್ಡ ಜನಸಂಖ್ಯೆಯ ಆಹಾರ ಭದ್ರತೆಯ ಮೇಲೆ ವ್ಯತಿರಿಕ್ತ ಪರಿಣಾಮ ಬೀರಲಿದೆ. ಅದರಲ್ಲೂ ತೀರಾ ಬಡವರು ಹಾಗೂ ತಮ್ಮ ಆದಾಯದ ಬಹುತೇಕ ಎಲ್ಲವನ್ನೂ ಆಹಾರ ಖರೀದಿಗೇ ಬಳಸುವವರ ಮೇಲೆ ಬಹಳ ದೊಡ್ಡ ಆಘಾತ ಉಂಟು ಮಾಡಲಿದೆ ಎಂದು ಎಫ್​ಎಒ ಎಚ್ಚರಿಸಿದೆ.

ರಫ್ತು ನಿರ್ಬಂಧಗಳಿಂದ ಉತ್ಪಾದನೆ, ಬಳಕೆ ಮತ್ತು ಬೆಲೆಗಳ ಮೇಲೆ ಪ್ರತಿಕೂಲ ಪರಿಣಾಮಗಳು ಉಂಟಾಗಬಹುದು ಮತ್ತು ಈ ಪರಿಣಾಮಗಳು ಅನುಷ್ಠಾನದ ಅವಧಿಯನ್ನು ಮೀರಿ ಉಳಿಯುತ್ತವೆ ಮತ್ತು ಅನೇಕ ದೇಶಗಳಲ್ಲಿ ಆಹಾರ ಹಣದುಬ್ಬರವನ್ನು ಉಲ್ಬಣಗೊಳಿಸುವ ಅಪಾಯವಿದೆ ಎಂದು ಯುಎನ್ ಏಜೆನ್ಸಿ ಹೇಳಿದೆ. ಕಪ್ಪು ಸಮುದ್ರದ ಧಾನ್ಯ ಉಪಕ್ರಮದ ಅಂತ್ಯ (Black Sea Grain Initiative) ಮತ್ತು ಅಕ್ಕಿಯ ಮೇಲಿನ ಹೊಸ ವ್ಯಾಪಾರ ನಿರ್ಬಂಧಗಳಿಂದ ಜಾಗತಿಕ ಆಹಾರ ಸರಕುಗಳ ಬೆಲೆಗಳು ಜುಲೈನಲ್ಲಿ ಏರಿಕೆಯಾಗಿವೆ.

ಜಾಗತಿಕವಾಗಿ ವ್ಯಾಪಾರವಾಗುವ ಆಹಾರ ಸರಕುಗಳ ಅಂತರರಾಷ್ಟ್ರೀಯ ಬೆಲೆಗಳಲ್ಲಿನ ಮಾಸಿಕ ಬದಲಾವಣೆಗಳ ಅಂಕಿ ಅಂಶಗಳನ್ನು ದಾಖಲಿಸುವ ಎಫ್ಎಒ ಆಹಾರ ಬೆಲೆ ಸೂಚ್ಯಂಕವು ಜುಲೈನಲ್ಲಿ ಸರಾಸರಿ 123.9 ಪಾಯಿಂಟ್​ಗಳನ್ನು ಸರಾಸರಿಯಾಗಿ ದಾಖಲಿಸಿದೆ. ಇದು ಹಿಂದಿನ ತಿಂಗಳಿಗೆ ಹೋಲಿಸಿದರೆ ಶೇಕಡಾ 1.3 ರಷ್ಟು ಹೆಚ್ಚಾಗಿದೆ ಮತ್ತು ಜುಲೈ 2022 ರ ಮಟ್ಟಕ್ಕಿಂತ ಶೇಕಡಾ 11.8 ರಷ್ಟು ಕಡಿಮೆಯಾಗಿದೆ. ಎಫ್ಎಒ ತರಕಾರಿ ತೈಲ ಬೆಲೆ ಸೂಚ್ಯಂಕದಲ್ಲಿ ತೀವ್ರ ಜಿಗಿತವು ಈ ಹೆಚ್ಚಳಕ್ಕೆ ಕಾರಣವಾಗಿದೆ. ಇದು ಏಳು ತಿಂಗಳ ಸತತ ಕುಸಿತದ ನಂತರ ಜೂನ್​ನಿಂದ ಶೇಕಡಾ 12.1 ರಷ್ಟು ಏರಿಕೆಯಾಗಿದೆ.

ಕಪ್ಪು ಸಮುದ್ರ ಧಾನ್ಯ ಉಪಕ್ರಮದ ಅನುಷ್ಠಾನವನ್ನು ಕೊನೆಗೊಳಿಸುವ ರಷ್ಯಾದ ನಿರ್ಧಾರದ ನಂತರ ರಫ್ತು ಮಾಡಬಹುದಾದ ಸರಕುಗಳ ಪೂರೈಕೆಯಲ್ಲಿನ ಅನಿಶ್ಚಿತತೆಗಳಿಂದಾಗಿ ಅಂತಾರಾಷ್ಟ್ರೀಯ ಸೂರ್ಯಕಾಂತಿ ಎಣ್ಣೆ ಬೆಲೆಗಳು ತಿಂಗಳಲ್ಲಿ ಶೇಕಡಾ 15 ಕ್ಕಿಂತ ಹೆಚ್ಚಾಗಿವೆ. ತಾಳೆ, ಸೋಯಾ ಮತ್ತು ರೇಪ್ಸೀಡ್ ಎಣ್ಣೆಗಳನ್ನು ಉತ್ಪಾದಿಸುವ ಪ್ರಮುಖ ದೇಶಗಳಲ್ಲಿ ಇವುಗಳ ಬೆಲೆಗಳು ಹೆ್ಚ್ಚಾಗಿವೆ. ಉಕ್ರೇನ್​​ನಿಂದಾಗುವ ರಫ್ತುಗಳ ಬಗ್ಗೆ ಅನಿಶ್ಚಿತತೆ ಮತ್ತು ಉತ್ತರ ಅಮೆರಿಕಾದಲ್ಲಿ ನಿರಂತರ ಶುಷ್ಕ ಪರಿಸ್ಥಿತಿಗಳಿಂದಾಗಿ ಅಂತರರಾಷ್ಟ್ರೀಯ ಗೋಧಿ ಬೆಲೆಗಳು ಶೇಕಡಾ 1.6 ರಷ್ಟು ಏರಿಕೆಯಾಗಿದ್ದು, ಒಂಬತ್ತು ತಿಂಗಳಲ್ಲಿ ಇದು ಮೊದಲ ಮಾಸಿಕ ಹೆಚ್ಚಳವಾಗಿದೆ.

ಇದನ್ನೂ ಓದಿ :Zomato ಆದಾಯ 2,416 ಕೋಟಿ; ಲಾಭ 2 ಕೋಟಿ ರೂ.