ನಿಮ್ಮ ಕುಟುಂಬದ ಆರ್ಥಿಕ ಭದ್ರತೆಗೆ ಅವಶ್ಯವಾಗಿ ಬೇಕು 'ಮನೆ ಬಜೆಟ್': ಏನಿದು?

ಪ್ರತಿಯೊಬ್ಬ ನಾಗರಿಕರ ಬದುಕಿನ ಮೇಲೂ ಪರಿಣಾಮ ಬೀರುತ್ತದೆ ಮುಂಬರುವ ಕೇಂದ್ರ ಬಜೆಟ್‌. ಆದರೆ ನಿಮ್ಮ ಮನೆಯ ಬಜೆಟ್ ಹೇಗಿದೆ? ಎಂದು ಎಂದಾದರೂ ಯೋಚಿಸಿದ್ದೀರಾ? ಇಲ್ಲಿವೆ ನಿಮಗೆ ಉಪಯುಕ್ತ ಸಲಹೆಗಳು..

ಆದಾಯ ಮತ್ತು ಖರ್ಚು ಇವೆರಡರ ನಡುವೆ ಸಮತೋಲನ ಬೇಕೇ ಬೇಕು. ಇಂದಿನ ಅಗತ್ಯಗಳನ್ನು ಪೂರೈಸುವಾಗ, ಭವಿಷ್ಯದ ವೆಚ್ಚಗಳನ್ನು ಕೂಡಾ ಅಂದಾಜಿಸಬೇಕು. ಇದು ಪ್ರತಿಯೊಂದು ಬಜೆಟ್​ನ ಮಾರ್ಗದರ್ಶಿ ತತ್ವ. ಈ ವಿಚಾರವು ಒಂದು ರಾಷ್ಟ್ರ ಅಥವಾ ವೈಯಕ್ತಿಕ ಕುಟುಂಬಕ್ಕೆ ಸಂಬಂಧಿಸಿರುತ್ತದೆ. ಫೆಬ್ರವರಿ 1ಕ್ಕೆ ಕೇಂದ್ರ ಹಣಕಾಸು ಸಚಿವರು ಪ್ರಸಕ್ತ ಸಾಲಿನ ಕೇಂದ್ರ ಬಜೆಟ್ ಮಂಡಿಸಲಿದ್ದಾರೆ. ಈ ನಿಟ್ಟಿನಲ್ಲಿ ನಿಮ್ಮ ಮನೆಯ ಬಜೆಟ್‌ ಬಗ್ಗೆ ಒಂದಿಷ್ಟು ಮಹತ್ವದ ವಿಚಾರಗಳನ್ನು ತಿಳಿಯೋಣ.

ಕೇಂದ್ರ ಬಜೆಟ್‌ ಪ್ರತ್ಯಕ್ಷ ಅಥವಾ ಪರೋಕ್ಷವಾಗಿ ಪ್ರತಿಯೊಬ್ಬ ನಾಗರಿಕನ ಜೀವನದ ಮೇಲೂ ಪ್ರಭಾವ ಬೀರುತ್ತದೆ. ಅಭಿವೃದ್ಧಿ ಮತ್ತು ಕಲ್ಯಾಣದತ್ತ ಹೆಜ್ಜೆಗಳನ್ನಿರಿಸಲು ಸಾಮಾನ್ಯ ತತ್ವಗಳನ್ನು ಆಧರಿಸಿ ಬಜೆಟ್ ಸಿದ್ಧಪಡಿಸಲಾಗುತ್ತದೆ. ಮನೆ ಬಜೆಟ್ ಅನ್ನು ತಯಾರಿಸುವಾಗಲೂ ನಾವು ಈ ಮೂಲ ಅಂಶಗಳನ್ನು ನೆನಪಿನಲ್ಲಿಟ್ಟುಕೊಳ್ಳಬೇಕು. ಮೊದಲಿಗೆ, ಒಟ್ಟಾರೆ ಕುಟುಂಬದ ಆರ್ಥಿಕ ಗುರಿಗಳನ್ನು ಯೋಚಿಸಬೇಕು. ಇದಕ್ಕೆ ಹೊಂದಿಸಿ ಮನೆಯ ಬಜೆಟ್ ಸಿದ್ಧಪಡಿಸಿಕೊಳ್ಳಬೇಕಿದೆ.

ಹೀಗಿರಲಿ ನಿಮ್ಮ ಮನೆ ಬಜೆಟ್:ನಿಮ್ಮ ಜೊತೆಗೊಂದು ಬಜೆಟ್ ಪುಸ್ತಕವಿರಲಿ. ಇದರಲ್ಲಿ ನಿಮ್ಮೆಲ್ಲ ಗುರಿಗಳನ್ನು ಬರೆಯಿರಿ. ಅಲ್ಪಾವಧಿ ಮತ್ತು ದೀರ್ಘಾವಧಿ ಗುರಿಗಳನ್ನು ಪ್ರತ್ಯೇಕವಾಗಿ ನಮೂದಿಸಿ. ಗೃಹೋಪಯೋಗಿ ವಸ್ತುಗಳನ್ನು ಖರೀದಿಸುವುದು ಅಲ್ಪಾವಧಿಯ ಅವಶ್ಯಕತೆ ಅನ್ನೋದು ನಿಮಗೆ ತಿಳಿದಿರಲಿ. ಮನೆ ಹಾಗೂ ಕಾರ್​ ಖರೀದಿಸುವುದು ಮಧ್ಯಮಾವಧಿಯ ಗುರಿಯಾಗುತ್ತದೆ. ನಿಮ್ಮ ನಿವೃತ್ತಿ, ನಿಮ್ಮ ಮಕ್ಕಳ ವಿವಾಹ ದೀರ್ಘಾವಧಿಯ ಯೋಜನೆಗಳಾಗಿವೆ. ಈ ವಿಷಯಗಳ ಬಗ್ಗೆ ನಿಮಗೆ ಸ್ಪಷ್ಟತೆ ಇದ್ದರೆ ಮಾತ್ರ, ಮುಂದೆ ಏನು ಮಾಡಬೇಕೆಂದು ನಿಮಗೆ ತಿಳಿಯುತ್ತದೆ. ಗಳಿಸಿದ ಹಣವನ್ನು ವಿವಿಧ ಉದ್ದೇಶಗಳಿಗೆ ಯಾವ ರೀತಿ ಹೊಂದಿಸಬೇಕು, ಎಷ್ಟು ಬಳಸಬೇಕು ಎನ್ನುವುದು ತಿಳಿಯದೇ ಇರುವುದು ಹಲವು ಹಣಕಾಸಿನ ಸಮಸ್ಯೆಗಳಿಗೆ ಮುಖ್ಯ ಕಾರಣವಾಗುತ್ತದೆ.

ನಿಮ್ಮ ಗುರಿಗಳನ್ನು ಸಾಧಿಸಲು ನಿಮಗೆ ಲಭ್ಯವಿರುವ ಹಣಕಾಸಿನ ಸಂಪನ್ಮೂಲಗಳನ್ನು ನೀವು ಎಷ್ಟು ಪರಿಣಾಮಕಾರಿಯಾಗಿ ಬಳಸಬಹುದು ಎಂಬುದನ್ನು ಅರ್ಥಮಾಡಿಕೊಳ್ಳಲು ನಿಮ್ಮ ಮನೆಯ ಬಜೆಟ್ ನಿಮಗೆ ಹೆಚ್ಚು ಸಹಾಯ ಮಾಡುತ್ತದೆ. ಪ್ರತಿ ತಿಂಗಳು ಒಂದು ನಿರ್ದಿಷ್ಟ ಮೊತ್ತವನ್ನು ಉಳಿಸಿದರೆ ಸಾಕು ಎಂದು ಹಲವರು ಭಾವಿಸುತ್ತಾರೆ. ಅವರು ಅದನ್ನು ಉತ್ತಮ ಆರ್ಥಿಕ ಯೋಜನೆ ಎಂದೇ ಭಾವಿಸುತ್ತಾರೆ. ಇದು ವಾಸ್ತವವಾಗಿ ತಪ್ಪು. ನೀವು ಎಷ್ಟು ಉಳಿತಾಯ ಮಾಡುತ್ತಿದ್ದೀರಿ ಎನ್ನುವುದರ ಹೊರತಾಗಿ, ನಿಮ್ಮ ಹಣಕಾಸಿನ ಗುರಿಯನ್ನು ಸಾಕಾರಗೊಳಿಸಲು ನೀವು ಎಷ್ಟು ಹೂಡಿಕೆ ಮಾಡಬೇಕೆಂದು ನೀವು ತಿಳಿದಿರಬೇಕು. ಈ ಮೊತ್ತವನ್ನು ಹೂಡಿಕೆ ಮಾಡಲು ನೀವು ಎಚ್ಚರಿಕೆಯಿಂದ ಯೋಜನೆ ಸಿದ್ಧಪಡಿಸಬೇಕಾಗುತ್ತದೆ.

ಆಕಸ್ಮಿಕ ನಿಧಿಗೆ ಹೆಚ್ಚಿನ ಆದ್ಯತೆ ಕೊಡಿ:ಸಮಸ್ಯೆಗಳು ಯಾವಾಗ ಬರುತ್ತವೆಯೋ ಗೊತ್ತಿಲ್ಲ. ಹಾಗಾಗಿ, ಪ್ರತಿಯೊಬ್ಬರೂ ಆಕಸ್ಮಿಕ ನಿಧಿಯನ್ನು ಹೊಂದಿರಲೇ ಬೇಕು. ನಿಮ್ಮ ಕುಟುಂಬದ ಬಜೆಟ್‌ನಲ್ಲಿ ಈ ವಿಚಾರಕ್ಕೆ ಹೆಚ್ಚಿನ ಆದ್ಯತೆ ಕೊಡಿ. ಕನಿಷ್ಠ 6 ತಿಂಗಳ ವೆಚ್ಚಗಳು ಮತ್ತು ಕಂತುಗಳಿಗೆ ನೀವು ಯಾವಾಗಲೂ ಸಾಕಷ್ಟು ಹಣವನ್ನು ಹೊಂದಿರುವಿರಾ ಎಂದು ಖಚಿತಪಡಿಸಿಕೊಳ್ಳಿ. ನಿರುದ್ಯೋಗ, ಅಪಘಾತ ಇತ್ಯಾದಿ ಅನಿರೀಕ್ಷಿತ ಸಂದರ್ಭಗಳಲ್ಲಿ ಖರ್ಚುಗಳನ್ನು ಪೂರೈಸಲು ಮಾತ್ರ ಇದನ್ನು ಬಳಸಿ.

ಸಾಕಷ್ಟು ಹಂಚಿಕೆಗಳು:ನಿಮ್ಮ ಗುರಿಗಳನ್ನು ಇಟ್ಟುಕೊಂಡ ನಂತರ ಮಾಡಬೇಕಾದ ಮುಂದಿನ ವಿಷಯವೆಂದರೆ, ನೀವು ಪಡೆಯುವ ಪ್ರತಿಪೈಸೆಗೂ ಲೆಕ್ಕಹಾಕಬೇಕು. ಆದಾಯದ ಹರಿವು ಹೇಗಿದೆ? ಹಾಗೂ ಎಷ್ಟು ಖರ್ಚಾಗುತ್ತದೆ ಎಂಬ ನಿಖರವಾದ ಲೆಕ್ಕಾಚಾರ ಮಾಡಬೇಕಾಗುತ್ತದೆ. ಸಂಬಳ, ಇತರ ಆದಾಯ, ಬಡ್ಡಿ ಮತ್ತು ಹೂಡಿಕೆಯ ಮೇಲಿನ ಆದಾಯದಂತಹ ನೀವು ಪಡೆಯುವ ಎಲ್ಲಾ ಆದಾಯವನ್ನು ಸೇರಿಸಬೇಕು. ವಾರ್ಷಿಕ ಆದಾಯ ಮತ್ತು ಮಾಸಿಕ ವೆಚ್ಚವನ್ನು ಅಂದಾಜಿಸಿ. ಪ್ರತಿ ಮೂರು, ಆರು ತಿಂಗಳಿಗೊಮ್ಮೆ ಅಥವಾ ವರ್ಷಕ್ಕೊಮ್ಮೆ ನೀವು ದೊಡ್ಡ ಖರ್ಚುಗಳನ್ನು ಮಾಡುತ್ತಿರಬಹುದು. ನೀವು ಸಾಕಷ್ಟು ಹಂಚಿಕೆಗಳನ್ನು ಹೊಂದಿಸಬೇಕಾಗುತ್ತದೆ.

ವೆಚ್ಚಕ್ಕೆ ಹಾಕಿ ಕಡಿವಾಣ: ಕುಟುಂಬದ ಸದಸ್ಯರು ಮಾಡುವ ಪ್ರತಿಯೊಂದು ಖರ್ಚಿನ ಬಗ್ಗೆ ಲೆಕ್ಕ ಹಾಕಲೇ ಬೇಕು. ಪ್ರತಿ ಎರಡು ತಿಂಗಳಿಗೊಮ್ಮೆ ಅವುಗಳನ್ನು ಪರಿಶೀಲಿಸಬೇಕಾಗುತ್ತದೆ. ಪ್ರತಿಯೊಬ್ಬರೂ ವೆಚ್ಚ ನಿಯಂತ್ರಣ ತತ್ವವನ್ನು ಅನುಸರಿಸಬೇಕು. ನಿಶ್ಚಿತ ಆದಾಯವನ್ನು ಹೊಂದಿರದವರು ಕೂಡಾ ಆದಾಯ ಮತ್ತು ವೆಚ್ಚಗಳಿಗಾಗಿ ಎರಡು ಪ್ರತ್ಯೇಕ ಖಾತೆಗಳನ್ನು ನಿರ್ವಹಿಸಬೇಕು. ಎಲ್ಲಾ ಆದಾಯವನ್ನು ಒಂದೇ ಸ್ಥಳದಲ್ಲಿ ಠೇವಣಿ ಮಾಡಬೇಕು ಹಾಗೂ ಸ್ವಲ್ಪ ಮೊತ್ತವನ್ನು ಖರ್ಚು ಖಾತೆಯಲ್ಲಿ ಇರಿಸಬೇಕು.

ಆರ್ಥಿಕ ಭವಿಷ್ಯಕ್ಕೆ ಬೇಕು ಯೋಜನೆ:ಆದಾಯ ಮತ್ತು ವೆಚ್ಚದ ದಾಖಲೆಗಳು ನಮ್ಮ ಆರ್ಥಿಕ ಭವಿಷ್ಯಕ್ಕೆ ಮಾರ್ಗದರ್ಶಿಯಾಗಿರಬೇಕು. ನಾವು ಬಜೆಟ್‌ಗೆ ಅಂಟಿಕೊಂಡಿದ್ದೇವೆಯೇ ಅಥವಾ ಇಲ್ಲವೇ ಎಂಬುದನ್ನು ನಾವು ಕಾಲಕಾಲಕ್ಕೆ ಪರಿಶೀಲಿಸಬೇಕು. ಲೋಪವಾದರೆ ಒಂದೆರಡು ತಿಂಗಳೊಳಗೆ ಗೊತ್ತಾಗಲಿದೆ. ನೀವು ಆದಾಯವನ್ನು ಸರಿಯಾಗಿ ಲೆಕ್ಕ ಹಾಕುತ್ತಿದ್ದೀರಾ? ವೆಚ್ಚದ ಅಂದಾಜುಗಳು ನಿರೀಕ್ಷೆಯಂತೆ ಇದೆಯೇ? ಇಂತಹ ವಿಷಯಗಳನ್ನು ವಿಶ್ಲೇಷಿಸಬೇಕು. ಖರ್ಚು ಹೆಚ್ಚಾದರೆ ಸಾಲದ ಹೊರೆ ಬೀಳುತ್ತದೆ. ಬಳಿಕ ಹಣಕಾಸಿನ ಗುರಿಗಳನ್ನು ಸಾಧಿಸುವುದು ಕೂಡಾ ಕಷ್ಟವಾಗಬಹುದು.

ಹಳಿ ತಪ್ಪದಿರಲಿ ಹಣಕಾಸಿನ ಯೋಜನೆ:ಹೆಚ್ಚಿನ ಜನರು ಹಣದ ಬಗ್ಗೆ ಕಾಳಜಿ ವಹಿಸುವುದಿಲ್ಲ. ಆದಾಯ ಮತ್ತು ವೆಚ್ಚಗಳ ಲೆಕ್ಕಾಚಾರಗಳನ್ನು ಮಾಡಲು ಅವರು ಇಷ್ಟಪಡುವುದಿಲ್ಲ. ಐಷಾರಾಮಿ ಮತ್ತು ಅಗತ್ಯಗಳ ನಡುವೆ ವ್ಯತ್ಯಾಸವನ್ನೂ ಮಾಡುವುದಿಲ್ಲ. ಬಜೆಟ್ ಬಗ್ಗೆ ಪ್ರಾಯೋಗಿಕ ವಿಧಾನವನ್ನು ಹೊಂದಲೇ ಬೇಕು ಹಾಗೂ ನಿಮ್ಮ ಐಷಾರಾಮಿ ಜೀವನ ನಡೆಸಲು ಎಷ್ಟು ಖರ್ಚು ಮಾಡಬಹುದು ಎಂದು ಯೋಚಿಸಿ. ಅಂತಹ ವೆಚ್ಚಗಳಿಂದ ನಿಮ್ಮ ಹಣಕಾಸಿನ ಯೋಜನೆ ಹಳಿತಪ್ಪಬಾರದು ಎಂಬುದನ್ನು ನೆನಪಿನಲ್ಲಿಡಬೇಕಾತ್ತದೆ.

ಇದನ್ನೂ ಓದಿ:ಸ್ಥಿರ ಠೇವಣಿಗಳಿಂದ ನಿರ್ದಿಷ್ಟ ಪ್ರಮಾಣದ ಆದಾಯ ಪಡೆಯಿರಿ