ಷೇರು ಮಾರುಕಟ್ಟೆ ಇಂದು: ಸೆನ್ಸೆಕ್ಸ್ 358 & ನಿಫ್ಟಿ 104 ಅಂಕ ಏರಿಕೆ

Closing Bell: ಭಾರತದ ಷೇರು ಮಾರುಕಟ್ಟೆಯು ಗುರುವಾರದ ವಹಿವಾಟಿನಲ್ಲಿ ಏರಿಕೆಯೊಂದಿಗೆ ಕೊನೆಗೊಂಡಿತು.

ಮುಂಬೈ:ಬ್ಯಾಂಕಿಂಗ್ ಮತ್ತು ಇತರ ಹೆವಿವೇಯ್ಟ್ ಷೇರುಗಳಲ್ಲಿನ ಚೇತರಿಕೆಯಿಂದ ಬೆಂಚ್ ಮಾರ್ಕ್ ಷೇರು ಮಾರುಕಟ್ಟೆ ಸೂಚ್ಯಂಕಗಳು ಗುರುವಾರ ಏರಿಕೆ ಕಂಡವು. ಬಿಎಸ್ಇ ಸೆನ್ಸೆಕ್ಸ್ 358.79 ಪಾಯಿಂಟ್ಸ್ ಏರಿಕೆಯಾಗಿ 70,865.10 ಕ್ಕೆ ತಲುಪಿದ್ದರೆ, ಎನ್ಎಸ್ಇ ನಿಫ್ಟಿ-50 104.90 ಪಾಯಿಂಟ್ಸ್ ಏರಿಕೆಯಾಗಿ 21,255.05ಕ್ಕೆ ತಲುಪಿದೆ.

ಪ್ರಮುಖ ವಲಯ ಸೂಚ್ಯಂಕಗಳಾದ ನಿಫ್ಟಿ ಬ್ಯಾಂಕ್ ಮತ್ತು ನಿಫ್ಟಿ ಫೈನಾನ್ಷಿಯಲ್ ಸರ್ವೀಸಸ್ ಕ್ರಮವಾಗಿ ಶೇಕಡಾ 0.8 ಮತ್ತು ಶೇಕಡಾ 0.6 ರಷ್ಟು ಏರಿಕೆ ಕಂಡಿವೆ. ನಿಫ್ಟಿ ಆಯಿಲ್ & ಗ್ಯಾಸ್ ಶೇಕಡಾ 1.73 ರಷ್ಟು ಏರಿಕೆಯಾಗಿದೆ. ನಿಫ್ಟಿ 50 ರಲ್ಲಿ ಪವರ್ ಗ್ರಿಡ್, ಬಿಪಿಸಿಎಲ್, ಬ್ರಿಟಾನಿಯಾ, ಅಪೊಲೊ ಆಸ್ಪತ್ರೆ ಮತ್ತು ಎಚ್​ಡಿಎಫ್​ಸಿ ಬ್ಯಾಂಕ್ ಲಾಭ ಗಳಿಸಿದ ಪ್ರಮುಖ ಐದು ಷೇರುಗಳಾಗಿವೆ. ಬಜಾಜ್ ಆಟೋ, ಬಜಾಜ್ ಫೈನಾನ್ಸ್, ಆಕ್ಸಿಸ್ ಬ್ಯಾಂಕ್, ಎಚ್​ಸಿಎಲ್ ಟೆಕ್ ಮತ್ತು ಸಿಪ್ಲಾ ನಷ್ಟ ಅನುಭವಿಸಿದವು.

ಆರಂಭಿಕ ವಹಿವಾಟಿನಲ್ಲಿ ಬೆಂಚ್ ಮಾರ್ಕ್ ಸೂಚ್ಯಂಕಗಳು ತೀವ್ರವಾಗಿ ಕುಸಿದವು. ಮಧ್ಯಾಹ್ನದವರೆಗೆ ತೀವ್ರ ಏರಿಳಿತ ಕಂಡ ಸೂಚ್ಯಂಕ ಮಧ್ಯಾಹ್ನದ ನಂತರ ಬಲವಾದ ಚೇತರಿಕೆಗೆ ಸಾಕ್ಷಿಯಾಯಿತು. ಹೆಚ್ಚುತ್ತಿರುವ ಕೋವಿಡ್ -19 ಪ್ರಕರಣಗಳು, ವಿದೇಶಿ ಹೂಡಿಕೆದಾರರ ಮಾರಾಟ ಮತ್ತು ಲಾಭದ ಬುಕಿಂಗ್ ನಂತಹ ಹಲವಾರು ಅಂಶಗಳು ನಿನ್ನೆಯಿಂದ ಷೇರು ಮಾರುಕಟ್ಟೆಗಳ ಮೇಲೆ ಒತ್ತಡ ಹೇರಿವೆ.

$-₹: ಇಂದಿನ ಆರಂಭಿಕ ವಹಿವಾಟಿನಲ್ಲಿ ಡಾಲರ್ ಎದುರು ರೂಪಾಯಿ 4 ಪೈಸೆ ಕುಸಿತವಾಗಿ 83.22 ರೂಪಾಯಿಗಳಿಗೆ ತಲುಪಿತ್ತು. ಇಂಟರ್​ ಬ್ಯಾಂಕ್ ವಿದೇಶಿ ವಿನಿಮಯ (ಐಎಫ್ಎಫ್)ದಲ್ಲಿ ರೂಪಾಯಿ 83.19ಕ್ಕೆ ಪ್ರಾರಂಭವಾಯಿತು ಮತ್ತು ಡಾಲರ್ ಎದುರು 83.24 ಕ್ಕೆ ತಲುಪಿತ್ತು. ನಂತರ ಡಾಲರ್ ವಿರುದ್ಧ ರೂಪಾಯಿ 83.22ರಲ್ಲಿ ವಹಿವಾಟು ನಡೆಸಿತು. ಇದು ಹಿಂದಿನ ಮುಕ್ತಾಯಕ್ಕಿಂತ 4 ಪೈಸೆ ಕಡಿಮೆಯಾಗಿದೆ. ರೂಪಾಯಿ ಬುಧವಾರ ಡಾಲರ್ ವಿರುದ್ಧ 83.18 ಕ್ಕೆ ಕೊನೆಗೊಂಡಿತ್ತು.

ಬ್ರೆಂಟ್ ಕಚ್ಚಾ ತೈಲ ಬೆಲೆಗಳು ಬ್ಯಾರೆಲ್​ಗೆ 80 ಡಾಲರ್​ ಹತ್ತಿರದಲ್ಲಿ ವಹಿವಾಟು ನಡೆಸುವುದರೊಂದಿಗೆ ತೈಲ ಬೆಲೆಗಳು ಗುರುವಾರ ಸ್ಥಿರಗೊಂಡವು. ಬ್ರೆಂಟ್ ಕ್ರೂಡ್ ಫ್ಯೂಚರ್ಸ್ 13 ಸೆಂಟ್ಸ್ ಅಥವಾ 0.1% ಏರಿಕೆಯಾಗಿ ಬ್ಯಾರೆಲ್​ಗೆ 79.80 ಡಾಲರ್​ಗೆ ತಲುಪಿದ್ದರೆ, ಯುಎಸ್ ವೆಸ್ಟ್ ಟೆಕ್ಸಾಸ್ ಇಂಟರ್ ಮೀಡಿಯೇಟ್ ಕಚ್ಚಾ ತೈಲ ಬೆಲೆ 4 ಸೆಂಟ್ಸ್ ಏರಿಕೆಯಾಗಿ 74.26 ಡಾಲರ್​ಗೆ ತಲುಪಿದೆ.

ಇದನ್ನೂ ಓದಿ: ಭಾರತದಲ್ಲಿ ಪೆಟ್ರೋಲ್-ಡೀಸೆಲ್ ಬೆಲೆ ಇಳಿಕೆ; ನೆರೆಯ ದೇಶಗಳಲ್ಲಿ ಭಾರಿ ಏರಿಕೆ