ನವದೆಹಲಿ : ಆರ್ಥಿಕ ಚಟುವಟಿಕೆಗಳು ಮತ್ತು ಹವಾಮಾನ ಪರಿಸ್ಥಿತಿಗಳಲ್ಲಿನ ಸುಧಾರಣೆಯಿಂದಾಗಿ ಈ ಹಣಕಾಸು ವರ್ಷದ ಏಪ್ರಿಲ್-ಅಕ್ಟೋಬರ್ ಅವಧಿಯಲ್ಲಿ ಭಾರತದ ವಿದ್ಯುತ್ ಬಳಕೆಯು ಶೇ 9.4ರಷ್ಟು ಏರಿಕೆಯಾಗಿ ಸುಮಾರು 984.39 ಶತಕೋಟಿ ಯೂನಿಟ್ಗಳಿಗೆ ತಲುಪಿದೆ. 2022-23ರ ಆರ್ಥಿಕ ವರ್ಷದ ಏಪ್ರಿಲ್-ಅಕ್ಟೋಬರ್ ಅವಧಿಯಲ್ಲಿ ವಿದ್ಯುತ್ ಬಳಕೆ 899.95 ಬಿಲಿಯನ್ ಯುನಿಟ್ ಆಗಿತ್ತು ಎಂದು ಇಂಧನ ಸಚಿವಾಲಯದ ಅಂಕಿ ಅಂಶಗಳು ತಿಳಿಸಿವೆ.
ಹಾಗೆಯೇ ಗರಿಷ್ಠ ವಿದ್ಯುತ್ ಬೇಡಿಕೆಯು ಈ ಹಣಕಾಸು ವರ್ಷದ ಏಪ್ರಿಲ್-ಅಕ್ಟೋಬರ್ ಅವಧಿಯಲ್ಲಿ ಸುಮಾರು 241 ಗಿಗಾವ್ಯಾಟ್ಗೆ ಏರಿದೆ. ಇದು 2022 ರ ಇದೇ ಅವಧಿಯಲ್ಲಿ 215.88 ಗಿಗಾವ್ಯಾಟ್ ಆಗಿತ್ತು.
ದೇಶದ ವಿದ್ಯುತ್ ಬಳಕೆಯು ಅಕ್ಟೋಬರ್ನಲ್ಲಿ ಸುಮಾರು 22 ಪ್ರತಿಶತದಷ್ಟು ಏರಿಕೆಯಾಗಿ 138.94 ಬಿಲಿಯನ್ ಯೂನಿಟ್ಗಳಿಗೆ (ಬಿಯು) ತಲುಪಿದೆ. ಹಬ್ಬಗಳು ಮತ್ತು ಹೆಚ್ಚಿದ ಆರ್ಥಿಕ ಚಟುವಟಿಕೆಗಳಿಂದಾಗಿ ವಿದ್ಯುತ್ ಬೇಡಿಕೆಯಲ್ಲಿನ ಹೆಚ್ಚಳವನ್ನು ಇದು ಬಿಂಬಿಸುತ್ತದೆ. ಒಂದು ವರ್ಷದ ಹಿಂದೆ ಇದೇ ತಿಂಗಳಲ್ಲಿ, ವಿದ್ಯುತ್ ಬಳಕೆ 113.94 ಬಿಯು ಆಗಿತ್ತು. ಇದು 2021 ರ ಅಕ್ಟೋಬರ್ನಲ್ಲಿ ದಾಖಲಾದ 112.79 ಬಿಲಿಯನ್ ಯೂನಿಟ್ಗಳಿಗಿಂತ ಹೆಚ್ಚಾಗಿತ್ತು ಎಂದು ಸರ್ಕಾರದ ಅಂಕಿ ಅಂಶಗಳು ತಿಳಿಸಿವೆ.
ಕಳೆದ ಎರಡು ತಿಂಗಳಲ್ಲಿ ವಿದ್ಯುತ್ ಬಳಕೆ ಗಣನೀಯವಾಗಿ ಹೆಚ್ಚಾಗಿದೆ ಎಂದು ಟಾಟಾ ಪವರ್ ದೆಹಲಿ ಡಿಸ್ಟ್ರಿಬ್ಯೂಷನ್ ಲಿಮಿಟೆಡ್ನ ವಕ್ತಾರರು ತಿಳಿಸಿದ್ದಾರೆ. ಅಕ್ಟೋಬರ್ 2023 ರಲ್ಲಿ, ಟಾಟಾ ಪವರ್-ದೆಹಲಿ ಡಿಸ್ಟ್ರಿಬ್ಯೂಷನ್ ಲಿಮಿಟೆಡ್ ಕಾರ್ಯಾಚರಣೆಯ ಪ್ರದೇಶದಲ್ಲಿ ವಿದ್ಯುತ್ ಬಳಕೆಯು ಸುಮಾರು 10.16 ಪ್ರತಿಶತದಷ್ಟು ಏರಿಕೆಯಾಗಿ 845 ಎಂಯುಗಳಿಗೆ (ಮಿಲಿಯನ್ ಯೂನಿಟ್ಗಳಿಗೆ) ತಲುಪಿದೆ.
ಬೇಸಿಗೆಯಲ್ಲಿ ದೇಶದ ವಿದ್ಯುತ್ ಬೇಡಿಕೆ 229 ಗಿಗಾವ್ಯಾಟ್ ತಲುಪಲಿದೆ ಎಂದು ಇಂಧನ ಸಚಿವಾಲಯ ಅಂದಾಜಿಸಿತ್ತು. ಅಕಾಲಿಕ ಮಳೆಯಿಂದಾಗಿ ಏಪ್ರಿಲ್-ಜುಲೈನಲ್ಲಿ ಬೇಡಿಕೆಯು ನಿರೀಕ್ಷಿತ ಮಟ್ಟವನ್ನು ತಲುಪಲಿಲ್ಲ. ಆದಾಗ್ಯೂ, ಗರಿಷ್ಠ ವಿದ್ಯುತ್ ಪೂರೈಕೆ ಜೂನ್ನಲ್ಲಿ 224.1 ಗಿಗಾವ್ಯಾಟ್ಗೆ ತಲುಪಿ ಜುಲೈನಲ್ಲಿ 209.03 ಗಿಗಾವ್ಯಾಟ್ಗೆ ಇಳಿದಿದೆ. ಆಗಸ್ಟ್ನಲ್ಲಿ ಗರಿಷ್ಠ ಬೇಡಿಕೆ 238.19 ಗಿಗಾವ್ಯಾಟ್ ತಲುಪಿದೆ. ಈ ವರ್ಷದ ಸೆಪ್ಟೆಂಬರ್ನಲ್ಲಿ ಇದು ಸುಮಾರು 241 ಗಿಗಾವ್ಯಾಟ್ ಆಗಿತ್ತು.
ಈ ವರ್ಷದ ಮಾರ್ಚ್, ಏಪ್ರಿಲ್, ಮೇ ಮತ್ತು ಜೂನ್ನಲ್ಲಿ ವ್ಯಾಪಕ ಮಳೆಯಿಂದಾಗಿ ವಿದ್ಯುತ್ ಬಳಕೆಯ ಮೇಲೆ ಪರಿಣಾಮ ಬೀರಿದೆ ಎಂದು ಉದ್ಯಮ ತಜ್ಞರು ತಿಳಿಸಿದ್ದಾರೆ. ಹಬ್ಬಗಳು ಮತ್ತು ಆರ್ಥಿಕ ಚಟುವಟಿಕೆಗಳ ಸುಧಾರಣೆಯಿಂದಾಗಿ ಮುಂಬರುವ ತಿಂಗಳುಗಳಲ್ಲಿ ವಿದ್ಯುತ್ ಬಳಕೆಯ ಬೆಳವಣಿಗೆ ಸ್ಥಿರವಾಗಿ ಉಳಿಯುತ್ತದೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.
ಇದನ್ನೂ ಓದಿ : ಗೂಗಲ್ ಆಡ್ಸೆನ್ಸ್ ನಿಯಮ ಬದಲು; 'ಪೇ ಪರ್ ಕ್ಲಿಕ್' ಬದಲಿಗೆ 'ಪೇ ಪರ್ ಇಂಪ್ರೆಷನ್'
