2 ವರ್ಷಗಳಲ್ಲಿ 35 ಸಾವಿರ ನೌಕರರನ್ನು ವಜಾ ಮಾಡಿದ ಭಾರತೀಯ ಸ್ಟಾರ್ಟಪ್​ಗಳು

ಕಳೆದ ಎರಡು ವರ್ಷಗಳಲ್ಲಿ ಭಾರತದ ಸ್ಟಾರ್ಟಪ್​ಗಳು 35 ಸಾವಿರಕ್ಕೂ ಅಧಿಕ ನೌಕರರನ್ನು ವಜಾ ಮಾಡಿವೆ.

ನವದೆಹಲಿ:ಕಳೆದ ಎರಡು ವರ್ಷಗಳಲ್ಲಿ ಭಾರತದ ಸ್ಟಾರ್ಟಪ್ ಕಂಪನಿಗಳು 35,000ಕ್ಕೂ ಹೆಚ್ಚು ಉದ್ಯೋಗಿಗಳನ್ನು ಕೆಲಸದಿಂದ ವಜಾ ಮಾಡಿವೆ ಮತ್ತು ಈ ವಜಾ ಪ್ರಕ್ರಿಯೆ 2024ರ ಆರಂಭದಲ್ಲಿಯೂ ಮುಂದುವರಿಯಲಿದೆ ಎಂದು ವರದಿ ಹೇಳಿದೆ. 2022ರಲ್ಲಿ ಬೈಜುಸ್, ಓಲಾ, ಅನ್ಅಕಾಡೆಮಿ, ಬ್ಲಿಂಕಿಟ್ ಮತ್ತು ವೈಟ್ ಹ್ಯಾಟ್ ಜೂನಿಯರ್, ಸ್ಕಿಲ್-ಲಿಂಕ್, ಗೋ ಮೆಕಾನಿಕ್, ಶೇರ್ ಚಾಟ್ ಮತ್ತು ಜೆಸ್ಟ್​ ಮನಿ ಮುಂತಾದ ಭಾರತೀಯ ಸ್ಟಾರ್ಟಪ್ ಕಂಪನಿಗಳು 18,000ಕ್ಕೂ ಹೆಚ್ಚು ಉದ್ಯೋಗಿಗಳನ್ನು ವಜಾಗೊಳಿಸಿವೆ.

2023 ರಲ್ಲಿ 17,000ಕ್ಕೂ ಹೆಚ್ಚು ಜನ ಈಗಾಗಲೇ ಉದ್ಯೋಗ ಕಳೆದುಕೊಂಡಿದ್ದಾರೆ ಮತ್ತು ಈ ಪಟ್ಟಿ ಬೆಳೆಯುತ್ತಿದೆ ಎಂದು ಇಂಕ್ 42 ವರದಿ ತಿಳಿಸಿದೆ. ಸಾಮಾಜಿಕ ಮಾಧ್ಯಮ ಪ್ಲಾಟ್​ಫಾರ್ಮ್ ಶೇರ್ ಚಾಟ್ ಕಂಪನಿಯ ಪುನರ್ರಚನೆಯ ಭಾಗವಾಗಿ 200 ಉದ್ಯೋಗಿಗಳನ್ನು ಅಥವಾ ತನ್ನ ಶೇಕಡಾ 15ರಷ್ಟು ಉದ್ಯೋಗಿಗಳನ್ನು ವಜಾಗೊಳಿಸಿದೆ.

ಗೇಮ್ ಸ್ಟ್ರೀಮಿಂಗ್ ಪ್ಲಾಟ್​ಫಾರ್ಮ್ ಲೋಕೋ ತನ್ನ ಒಟ್ಟು 110 ಸಿಬ್ಬಂದಿಯ ಪೈಕಿ ಸುಮಾರು 36 ಪ್ರತಿಶತ ಅಥವಾ 40 ಉದ್ಯೋಗಿಗಳನ್ನು ವಜಾಗೊಳಿಸಿದೆ. ಗೂಗಲ್ ಬೆಂಬಲಿತ ಎಜುಟೆಕ್ ಪ್ಲಾಟ್​ಫಾರ್ಮ್ ಅಡ್ಡಾ 247 ಸುಮಾರು 250ರಿಂದ 300 ಉದ್ಯೋಗಿಗಳನ್ನು ವಜಾಗೊಳಿಸಿದೆ.

ಮಾನ್ಯತೆ ಪಡೆದ ಸ್ಟಾರ್ಟಪ್​ಗಳ ಸಂಖ್ಯೆ ಹೆಚ್ಚಳ: 2022 ರಲ್ಲಿ ಕೈಗಾರಿಕೆ ಮತ್ತು ಆಂತರಿಕ ವ್ಯಾಪಾರ ಉತ್ತೇಜನ ಇಲಾಖೆ (ಡಿಪಿಐಐಟಿ)ಯು 2,263 ಸ್ಟಾರ್ಟಪ್​ಗಳನ್ನು ಲಿಸ್ಟ್​ ಮಾಡಿದ್ದು, ದೇಶದಲ್ಲಿ ಗುಜರಾತ್ ಐದನೇ ಅತಿ ಹೆಚ್ಚು ಸ್ಟಾರ್ಟಪ್​ಗಳನ್ನು ಹೊಂದಿದೆ ಎಂದು ಲೋಕಸಭೆಗೆ ನೀಡಿದ ಅಂಕಿ ಅಂಶಗಳು ತಿಳಿಸಿವೆ. ಮಹಾರಾಷ್ಟ್ರ (4,768), ಉತ್ತರ ಪ್ರದೇಶ (2,559), ದೆಹಲಿ (2,558) ಮತ್ತು ಕರ್ನಾಟಕ (2,547) ನಂತರದ ಸ್ಥಾನಗಳಲ್ಲಿವೆ. ಎರಡು ವರ್ಷಗಳಲ್ಲಿ ಮಾನ್ಯತೆ ಪಡೆದ ಸ್ಟಾರ್ಟಪ್​ಗಳ ಸಂಖ್ಯೆ ಶೇಕಡಾ 167ರಷ್ಟು ಅಥವಾ ಅದಕ್ಕಿಂತ ಹೆಚ್ಚು ಅಂದರೆ 847 ರಿಂದ 2,263 ಕ್ಕೆ ಹೆಚ್ಚಾಗಿದೆ.

ವರ್ಷವಾರು ಮಾನ್ಯತೆ ಪಡೆದ ಸ್ಟಾರ್ಟಪ್​ಗಳ ಸಂಖ್ಯೆ 2018 ರಲ್ಲಿ 395, 2019 ರಲ್ಲಿ 566, 2020ರಲ್ಲಿ 847, 2021 ರಲ್ಲಿ 1,657 ಮತ್ತು 2022 ರಲ್ಲಿ 2,263 ಆಗಿದೆ. ವಾಣಿಜ್ಯ ಮತ್ತು ಕೈಗಾರಿಕಾ ರಾಜ್ಯ ಸಚಿವ ಸೋಮ್ ಪ್ರಕಾಶ್ ಅವರು ಲೋಕಸಭೆಗೆ ಈ ಅಂಕಿಅಂಶಗಳನ್ನು ನೀಡಿದ್ದಾರೆ.

ಇದನ್ನೂ ಓದಿ: ವಿಂಡೋಸ್​ 10ಗೆ ಮೈಕ್ರೊಸಾಫ್ಟ್​ ಸಪೋರ್ಟ್ ಅಂತ್ಯ: ನಿರುಪಯುಕ್ತವಾಗಲಿವೆ 240 ಮಿಲಿಯನ್ ಪಿಸಿಗಳು