FCI: ಇ-ಹರಾಜು ಮೂಲಕ ಮಾತ್ರ ಅಕ್ಕಿ, ಗೋಧಿ ಮಾರಾಟ- ಎಫ್​ಸಿಐಗೆ ಕೇಂದ್ರ ಸರ್ಕಾರ ಸೂಚನೆ

ಗೋಧಿ ಮತ್ತು ಅಕ್ಕಿಗಳನ್ನು ಇ-ಹರಾಜು ಮೂಲಕ ಮಾತ್ರ ಮಾರಾಟ ಮಾಡುವಂತೆ ಎಫ್​ಸಿಐಗೆ ಕೇಂದ್ರ ಸರ್ಕಾರ ಸೂಚನೆ ನೀಡಿದೆ.

ನವದೆಹಲಿ : ಗೋಧಿ ಮತ್ತು ಅಕ್ಕಿಗಳನ್ನು ಕೇವಲ ಇ-ಹರಾಜು ಮೂಲಕವೇ ವಿತರಣೆ ಮಾಡುವಂತೆ ಕೇಂದ್ರ ಸರ್ಕಾರವು ಫುಡ್ ಕಾರ್ಪೊರೇಶನ್ ಆಫ್ ಇಂಡಿಯಾಗೆ ನಿರ್ದೇಶನ ನೀಡಿದೆ ಎಂದು ನಿಗಮದ ಅಧ್ಯಕ್ಷ ಮತ್ತು ವ್ಯವಸ್ಥಾಪಕ ನಿರ್ದೇಶಕ ಅಶೋಕ್ ಕೆ. ಕೆ ಮೀನಾ ಹೇಳಿದ್ದಾರೆ. ಹಣದುಬ್ಬರದ ಮೇಲೆ ನಿಯಂತ್ರಣ ಸಾಧಿಸಲು ಮತ್ತು ಅಂಥ ಪ್ರಮುಖ ಆಹಾರ ಧಾನ್ಯಗಳ ಬೆಲೆಯನ್ನು ನಿಯಂತ್ರಿಸುವ ಉದ್ದೇಶದಿಂದ ಈ ನಿರ್ದೇಶನ ನೀಡಲಾಗಿದೆ.

ಈ ಇ-ಹರಾಜಿನಲ್ಲಿ ಖರೀದಿದಾರರು ಬಿಡ್ ಮಾಡಬಹುದಾದ ಗರಿಷ್ಠ ಪ್ರಮಾಣವು 100 ಟನ್‌ಗಳಿಗೆ ಸೀಮಿತವಾಗಿರುತ್ತದೆ. ಸಣ್ಣ ಗೋಧಿ ಸಂಸ್ಕರಣೆದಾರರು ಮತ್ತು ವ್ಯಾಪಾರಿಗಳಿಗೆ ಅನುಕೂಲ ಕಲ್ಪಿಸಲು ಕನಿಷ್ಠ ಬಿಡ್ ಪ್ರಮಾಣವನ್ನು 10 ಟನ್‌ಗಳಿಗೆ ನಿಗದಿಪಡಿಸಲಾಗಿದೆ. ಬಿಡ್​ದಾರರಿಗೆ ಸ್ಟಾಕ್‌ಗಳನ್ನು ಬಿಡುಗಡೆ ಮಾಡುವ ಮೊದಲು ರಾಜ್ಯದ ಜಿಎಸ್‌ಟಿ ನೋಂದಣಿಯನ್ನು ಮ್ಯಾಪ್ ಮಾಡಲಾಗಿರುವುದನ್ನು ಪರಿಶೀಲನೆ ಮಾಡಲಾಗುತ್ತದೆ. ಸ್ಥಳೀಯ ಖರೀದಿದಾರರಿಗೆ ಮಾತ್ರ ಬಿಡ್ಡಿಂಗ್​ನಲ್ಲಿ ಅವಕಾಶ ನೀಡಲು ಈ ವಿಧಾನ ಅನುಸರಿಸಲಾಗುವುದು. ನಿರ್ದಿಷ್ಟ ರಾಜ್ಯದಲ್ಲಿ ನೀಡಲಾದ ಸ್ಟಾಕ್‌ಗಳಿಗೆ ವ್ಯಾಪಕ ಸ್ಥಳೀಯ ವ್ಯಾಪ್ತಿಯನ್ನು ಖಚಿತಪಡಿಸಿಕೊಳ್ಳಲು ಈ ಕ್ರಮಗಳನ್ನು ತೆಗೆದುಕೊಳ್ಳಲಾಗಿದೆ ಎಂದು ಆಹಾರ ಸಚಿವಾಲಯದ ಪ್ರಕಟಣೆ ತಿಳಿಸಿದೆ.

ದೇಶಾದ್ಯಂತ 457 ಡಿಪೋಗಳಿಂದ 1ನೇ ಇ-ಹರಾಜಿನಲ್ಲಿ ಸುಮಾರು 4 ಲಕ್ಷ ಟನ್ ಗೋಧಿಯನ್ನು ನೀಡಲಾಗುತ್ತಿದೆ. ಗೋಧಿಯ ಮೂಲ ಬೆಲೆಯನ್ನು ಹಿಂದಿನ ಮಟ್ಟದಲ್ಲಿ ಅಂದರೆ 100 ಕೆಜಿಗೆ 2150 ರೂ. ನಿಗದಿ ಮಾಡಲಾಗಿದೆ. ಅಕ್ಕಿಯ ಮೂಲ ಬೆಲೆ 100 ಕೆಜಿಗೆ 3100 ರೂ. ಆಗಿದೆ. ಮುಕ್ತ ಮಾರುಕಟ್ಟೆ ಮಾರಾಟ ಯೋಜನೆ (ದೇಶೀಯ) ಅಡಿಯಲ್ಲಿ ಅಕ್ಕಿಗಾಗಿ ಇ-ಹರಾಜು ಜುಲೈ 5, 2023ರಂದು ಪ್ರಾರಂಭವಾಗುತ್ತದೆ.

"ಎಫ್​ಸಿಐ 15.03.2023 ರವರೆಗೆ 6 ಸಾಪ್ತಾಹಿಕ ಇ-ಹರಾಜುಗಳನ್ನು ನಡೆಸಿದೆ. ಈ ಮೂಲಕ ಒಟ್ಟು 33.7 LMT ಗೋಧಿಯನ್ನು ಆಫ್‌ಲೋಡ್ ಮಾಡಲಾಗಿದೆ ಮತ್ತು 45 ದಿನಗಳ ಅವಧಿಯಲ್ಲಿ ಈ ಬೃಹತ್ ಪ್ರಕ್ರಿಯೆಯಿಂದಾಗಿ ಗೋಧಿಯ ಬೆಲೆಗಳು ಶೇಕಡಾ 19ರಷ್ಟು ಕಡಿಮೆಯಾಗಿವೆ ಎಂದು ಸಚಿವಾಲಯದ ಪ್ರಕಟಣೆ ಹೇಳಿದೆ.

ಒಟ್ಟಾರೆ ಆಹಾರ ಭದ್ರತೆಯನ್ನು ನಿರ್ವಹಿಸಲು ಮತ್ತು ಸಂಗ್ರಹಣೆ ಮತ್ತು ಬೆಲೆಗಳ ಮೇಲಿನ ಊಹಾಪೋಹಗಳನ್ನು ತಡೆಗಟ್ಟಲು, ಸರ್ಕಾರವು ಈ ತಿಂಗಳ ಆರಂಭದಲ್ಲಿ ವ್ಯಾಪಾರಿಗಳು, ಸಗಟು ವ್ಯಾಪಾರಿಗಳು, ಚಿಲ್ಲರೆ ವ್ಯಾಪಾರಿಗಳು, ದೊಡ್ಡ ಸರಪಳಿ ಚಿಲ್ಲರೆ ವ್ಯಾಪಾರಿಗಳು ಮತ್ತು ಪ್ರೊಸೆಸರ್‌ಗಳಿಗೆ ಗೋಧಿಯ ಮೇಲೆ ಸ್ಟಾಕ್ ಮಿತಿಗಳನ್ನು ವಿಧಿಸಲು ನಿರ್ಧರಿಸಿತು. ಆದೇಶವು ತಕ್ಷಣದಿಂದ ಜಾರಿಗೆ ಬಂದಿದ್ದು, ಮಾರ್ಚ್ 31, 2024ರವರೆಗೆ ಅನ್ವಯಿಸುತ್ತದೆ.

ಕಳೆದ ವರ್ಷ ರಬಿ ಹಂಗಾಮಿನ ಮೊದಲು ಭಾರತದಲ್ಲಿ ಗೋಧಿ ಬೆಳೆಯುವ ಹಲವಾರು ಪ್ರದೇಶಗಳಲ್ಲಿನ ಅತಿಯಾದ ಬಿಸಿಲಿನ ಹೊಡೆತದಿಂದ ಬೆಳೆಗಳ ಮೇಲೆ ಪರಿಣಾಮವಾಗಿತ್ತು. ಗೊನೆ ಬಿಡುವ ಹಂತದಲ್ಲಿ ಗೋಧಿ ಕಾಳುಗಳು ಶಾಖಕ್ಕೆ ಅತಿಯಾಗಿ ಒಡ್ಡಿಕೊಂಡರೆ ಅವು ಕುಗ್ಗಿ ಹೋಗುತ್ತವೆ. ಈ ವರ್ಷವೂ, ಅಕಾಲಿಕ ಮಳೆಯಿಂದ ಕೆಲ ಪ್ರದೇಶಗಳಲ್ಲಿ ಬೆಳೆದಿರುವ ಬೆಳೆಗಳು ನೆಲಸಮವಾಗಿವೆ ಎಂದು ವಿವಿಧ ರಾಜ್ಯಗಳಿಂದ ವರದಿಯಾಗಿದೆ. ರಬಿ ಹಂಗಾಮು ಬೆಳೆಯಾಗಿರುವ ಗೋಧಿ ಪಕ್ವತೆಯ ಹಂತದಲ್ಲಿತ್ತು ಮತ್ತು ಹದಿನೈದು ದಿನಗಳೊಳಗೆ ಮಾರುಕಟ್ಟೆಗೆ ಬರುವ ನಿರೀಕ್ಷೆಯಿತ್ತು.

ಇದನ್ನೂ ಓದಿ : Ukraine Russia war: 200 ರಷ್ಯಾ ಸೈನಿಕರ ಸಾವು: ಉಕ್ರೇನ್ ಮಿಲಿಟರಿ ಪ್ರತಿಪಾದನೆ