ಹೈದರಾಬಾದ್: ತೆರಿಗೆ ಉಳಿತಾಯ ಮಾಡಲು ಈಗ ಸೂಕ್ತ ಕಾಲ. ನಿಮ್ಮ ಆದಾಯದ ಕೆಲ ಬಾಗ ತೆರಿಗೆ ಉಳಿಸಿ, ಮುಂದಿನ ಭವಿಷ್ಯಕ್ಕೂ ಕಾಪಿಡಲು ಹೂಡಿಕೆ ಮಾಡುವುದು ಅಗತ್ಯ. ಅದಕ್ಕೀಗ ಈ ಸಮಯ ಸಕಾಲವೂ ಹೌದು. ನಾವೀಗ 2022-23 ವಿತ್ತೀಯ ವರ್ಷದ ಕೊನೆಯ ತ್ರೈಮಾಸಿಕದಲ್ಲಿದ್ದು, ತೆರಿಗೆ ಹೊರೆ ತಗ್ಗಿಸುವುದಕ್ಕಾಗಿ ಇಕ್ವಿಟಿ ಲಿಂಕ್ಡ್ ಸೇವಿಂಗ್ಸ್ ಸ್ಕೀಮ್ಸ್ (ELSS) ಫಂಡ್ಗಳು ಲಭ್ಯ ಇವೆ.
ಇಕ್ವಿಟಿ ಲಿಂಕ್ಡ್ ಸೇವಿಂಗ್ಸ್ ಸ್ಕೀಮ್ಸ್ (ELSS) ಕೂಡಾ ಉಳಿತಾಯದ ಒಂದು ಮಹತ್ವದ ಯೋಜನೆಯ ಒಂದು ಭಾಗ. ಷೇರು ಮಾರುಕಟ್ಟೆಯಲ್ಲಿ ಈ ಮೂಲಕ ಲಾಭದಾಯಕ ಹೂಡಿಕೆಗಳನ್ನು ಮಾಡಬಹುದು. ಹಣಕಾಸಿನ ಗುರಿಗಳನ್ನು ಸಾಧಿಸುವಾಗ ದೀರ್ಘಾವಧಿಯ ಹೂಡಿಕೆ ಮಾಡುವುದು ಅಗತ್ಯವಾಗಿರುತ್ತದೆ. ಹಣಕಾಸು ಯೋಜನೆಯಲ್ಲಿ ಪ್ರಮುಖ ಗುರಿಗಳಲ್ಲಿ ಒಂದು ಎಂದರೆ ಅದು ತೆರಿಗೆ ಉಳಿತಾಯ. ನೆನಪಿನಲ್ಲಿಡಬೇಕಾದ ಹಾಗೂ ಮೊದಲು ಮಾಡಬೇಕಾಗಿರುವ ಕೆಲಸ ಎಂದರೆ ಶಿಸ್ತು ಬದ್ಧ ಹೂಡಿಕೆ ಹಾಗೂ ಯೋಜನಾಬದ್ಧ ಉಳಿತಾಯ. ಇದು ಆರ್ಥಿಕ ವರ್ಷದ ಮೊದಲ ತಿಂಗಳಿನಿಂದ ಪ್ರಾರಂಭವಾಗಬೇಕು.
ಆದಾಗ್ಯೂ, ಹೆಚ್ಚಿನ ಜನರು ನಾಲ್ಕನೇ ಮತ್ತು ಕೊನೆಯ ತ್ರೈಮಾಸಿಕದಲ್ಲಿ ಅಂದರೆ ಜನವರಿಯ ನಂತರವೇ ಆ ಬಗ್ಗೆ ಯೋಚಿಸುತ್ತಾರೆ. ಇಂತಹ ಸಮಯದಲ್ಲಿ ತರಾತುರಿಯಲ್ಲಿ ಯಾವುದೇ ನಿರ್ಧಾರ ತೆಗೆದುಕೊಳ್ಳಬಾರದು. ಸಮಯವು ತುಂಬಾ ಸೀಮಿತವಾಗಿದ್ದರೂ ನೀವು ಸರಿಯಾದ ಯೋಜನೆಯನ್ನು ಆರಿಸಿಕೊಳ್ಳಬೇಕು. ಹೀಗೆ ಮಾಡಿದಲ್ಲಿ ನೀವು ಗಣನೀಯ ತೆರಿಗೆ ಪ್ರಯೋಜನ ಪಡೆಯಬಹುದು. ಆದರೆ ಈ ಬಗ್ಗೆ ತಿಳಿವಳಿಕೆ ಅತಿ ಮುಖ್ಯ.
ಇತರ ಯೋಜನೆಗಳಿಗೆ ಹೋಲಿಸಿದರೆ ELSS ಗಳು ವ್ಯಾಪಕ ಶ್ರೇಣಿಯ ಪ್ರಯೋಜನಗಳನ್ನು ನೀಡುತ್ತವೆ. ಆದಾಯ ತೆರಿಗೆ ಕಾಯಿದೆಯ ಸೆಕ್ಷನ್ 80C ಅಡಿಯಲ್ಲಿ ELSS ನಲ್ಲಿ ಮಾಡಿದ ಹೂಡಿಕೆಗೆ ತೆರಿಗೆಯಿಂದ ವಿನಾಯಿತಿ ಸಿಗುತ್ತದೆ. ವರ್ಷಕ್ಕೆ ಸುಮಾರು ಒಂದೂವರೆ ಲಕ್ಷದಷ್ಟು ಹೂಡಿಕೆ ಮಾಡಬಹುದು. ಇದು ಗರಿಷ್ಠ ಮಿತಿಯಾಗಿದೆ. ಈ ಮೇಲಿನ ಹೂಡಿಕೆಗೆ ತೆರಿಗೆ ಉಳಿತಾಯದ ಪ್ರಯೋಜನ ದೊರೆಯುವುದಿಲ್ಲ. ELSS ಗಳು ಸಾಮಾನ್ಯವಾಗಿ ಮ್ಯೂಚುವಲ್ ಫಂಡ್ ಯೋಜನೆಗಳಂತೆ ಕಾರ್ಯನಿರ್ವಹಿಸುತ್ತವೆ.