ಸ್ವಂತ ಉದ್ಯೋಗ ಮಾಡುತ್ತಿರುವವರಿಗೆ ಇಲ್ಲಿ ಅತ್ಯುತ್ತಮ ನಿವೃತ್ತಿಯ ಪ್ಲಾನ್​ಗಳು!

ನಿವೃತ್ತಿಯ ನಂತರ ಜೀವನವನ್ನು ಸುಲಭಗೊಳಿಸಲು ಕಂಪನಿಗಳು ಉದ್ಯೋಗಿಗಳಿಗೆ ಇಪಿಎಫ್, ಇಪಿಎಸ್​ನಂತಹ ಅನೇಕ ಸೌಲಭ್ಯಗಳನ್ನು ಒದಗಿಸುತ್ತವೆ. ಇದೇ ರೀತಿ ಸ್ವಂತ ಕೆಲಸ ಮಾಡುತ್ತಿರುವವರಿಗಾಗಿ ನಿವೃತ್ತಿ ಯೋಜನೆ ಬಗ್ಗೆ ಯೋಚಿಸುವವರಿಗಾಗಿ ಕೆಲವು ಯೋಜನೆಗಳಿವೆ. ಅವರು ತಮ್ಮ ನಿವೃತ್ತಿಗಾಗಿ ಈಗಲೇ ಪ್ಲಾನ್​ ಮಾಡಿಕೊಳ್ಳುವುದು ಅವಶ್ಯಕವಾಗಿದೆ.

ನವದೆಹಲಿ : ಕಂಪನಿಯಲ್ಲಿ ಕೆಲಸ ನಿರ್ವಹಿಸುವ ಜನರು ಉದ್ಯೋಗಿ ಭವಿಷ್ಯ ನಿಧಿ (ಇಪಿಎಫ್), ಇಪಿಎಸ್ ಮತ್ತು ಗ್ರಾಚ್ಯುಟಿಯಂತಹ ಸೌಲಭ್ಯಗಳನ್ನು ಪಡೆಯುತ್ತಾರೆ. ನಿವೃತ್ತಿಯ ಸಮಯದಲ್ಲಿ ಅವರ ವೃದ್ಧಾಪ್ಯದಲ್ಲಿ ಇದು ಉಪಯುಕ್ತವಾಗಲಿದೆ. ಆದರೆ, ನಿವೃತ್ತಿ ಉಳಿತಾಯ ಯೋಜನೆಯು ಉದ್ಯೋಗಿಗಳಲ್ಲದವರು ಅಥವಾ ಸ್ವಯಂ ಉದ್ಯೋಗಿಗಳಿಗೆ ಅಗತ್ಯವಾಗಿರಬೇಕು. ಇದರಿಂದ ಅವರು ವೃದ್ಧಾಪ್ಯದಲ್ಲಿ ಆರಾಮವಾಗಿ ಬದುಕಬಹುದು. ಸ್ವಂತ ಉದ್ಯೋಗಿಗಳು ಸ್ವಯಂ ನಿವೃತ್ತಿ ಯೋಜನೆಯನ್ನು ತೆಗೆದುಕೊಂಡು ಮುಂದುವರೆಯಬಹುದು. ಇದು ಅವರ ವೃದ್ಧಾಪ್ಯದ ಅಗತ್ಯಗಳನ್ನು ಪೂರೈಸುತ್ತದೆ. ಈ ವರದಿಯಲ್ಲಿ ಉದ್ಯೋಗೇತರ ವೃತ್ತಿಯವರಿಗೆ ಕೆಲವು ರೀತಿಯ ನಿವೃತ್ತಿ ಉಳಿತಾಯ ಆಯ್ಕೆಗಳ ಬಗ್ಗೆ ತಿಳಿಸಲಿದೆ.

1. ಪಬ್ಲಿಕ್ ಪ್ರಾವಿಡೆಂಟ್ ಫಂಡ್ : ಪಬ್ಲಿಕ್ ಪ್ರಾವಿಡೆಂಟ್ ಫಂಡ್ (ಪಿಪಿಎಫ್) ಖಾತೆ ತೆರೆಯುವುದು ದೀರ್ಘಾವಧಿಯ ಉಳಿತಾಯಕ್ಕೆ ಉತ್ತಮ ಆಯ್ಕೆಯಾಗಿದೆ. ಇದರಲ್ಲಿ ನೀವು ಪ್ರತಿ ವರ್ಷ 1.5 ಲಕ್ಷದವರೆಗೆ ಠೇವಣಿ ಮಾಡಬಹುದು. ಈ ಖಾತೆಯ ಮುಕ್ತಾಯದ ಅವಧಿ 15 ವರ್ಷಗಳು. ಇದು ಆದಾಯ ತೆರಿಗೆ 80C ಅಡಿಯಲ್ಲಿ ತೆರಿಗೆ ಮುಕ್ತವಾಗಿದೆ. ಇದರರ್ಥ ಈ ಠೇವಣಿಯ ಬಡ್ಡಿಯ ಮೇಲೆ ಯಾವುದೇ TDS ಅನ್ನು ಕಡಿತಗೊಳಿಸಲಾಗುವುದಿಲ್ಲ. ಅಲ್ಲದೆ, ನೀವು ಈ PPF ಖಾತೆಯನ್ನು 5 ವರ್ಷಗಳ ಬ್ಲಾಕ್​ನಲ್ಲಿ ವಿಸ್ತರಿಸಬಹುದು.

2. ರಾಷ್ಟ್ರೀಯ ಪಿಂಚಣಿ ವ್ಯವಸ್ಥೆ: ಸ್ವಯಂ ಉದ್ಯೋಗ ಮಾಡುವ ಮೂಲಕ ಆದಾಯ ಗಳಿಸುವ ವ್ಯಕ್ತಿಗಳು ರಾಷ್ಟ್ರೀಯ ಪಿಂಚಣಿ ವ್ಯವಸ್ಥೆಯಲ್ಲಿ (NPS) ತಮ್ಮ ಖಾತೆಯನ್ನು ತೆರೆಯಬಹುದು ಮತ್ತು ಮಾರುಕಟ್ಟೆ ಸಂಬಂಧಿತ ಆದಾಯವನ್ನು ಗಳಿಸಬಹುದು. ಪ್ರತಿ ವರ್ಷ ಈ ಖಾತೆಯಲ್ಲಿ 50,000 ರೂಪಾಯಿಗಳನ್ನು ಠೇವಣಿ ಮಾಡುವ ಮೂಲಕ ನೀವು 80C ಅಡಿಯಲ್ಲಿ ತೆರಿಗೆ ಮುಕ್ತ ಪ್ರಯೋಜನವನ್ನು ಪಡೆಯಬಹುದು.

3.ರಾಷ್ಟ್ರೀಯ ಉಳಿತಾಯ ಪ್ರಮಾಣಪತ್ರ: ರಾಷ್ಟ್ರೀಯ ಉಳಿತಾಯ ಪ್ರಮಾಣಪತ್ರ (NSC) ಖಾತೆಯನ್ನು ಅಂಚೆ ಕಚೇರಿಯಲ್ಲಿ 5 ವರ್ಷಗಳವರೆಗೆ ತೆರೆಯಬಹುದು. 7. 7 ಪ್ರತಿಶತ ಬಡ್ಡಿದರವನ್ನು ನೀಡಲಾಗುತ್ತದೆ. ಇದು ಅನೇಕ ಬ್ಯಾಂಕುಗಳು ನೀಡುವ ಸ್ಥಿರ ಠೇವಣಿಗಳಿಗೆ ಹೋಲಿಸಿದರೆ ಉತ್ತಮ ಲಾಭವಾಗಿದೆ. ಇದರಲ್ಲೂ ನೀವು 80C ಯ ಲಾಭವನ್ನು ಪಡೆಯಬಹುದು. ಅಲ್ಲದೆ, ಯೋಜನೆಯ ಮುಕ್ತಾಯದ ಅವಧಿ ಪೂರ್ಣಗೊಂಡ ನಂತರ ನೀವು ಅದನ್ನು ಮರುಹೂಡಿಕೆ ಮಾಡಬಹುದು.

4. ಕಿಸಾನ್ ವಿಕಾಸ್ ಪತ್ರ : ರಾಷ್ಟ್ರೀಯ ಉಳಿತಾಯ ಪ್ರಮಾಣಪತ್ರದಂತೆ ನೀವು ಅಂಚೆ ಕಚೇರಿಯಲ್ಲಿ ಕಿಸಾನ್ ವಿಕಾಸ್ ಪತ್ರವನ್ನು (ಕೆವಿಪಿ) ಖರೀದಿಸಬಹುದು. KVP ಠೇವಣಿಗಳು ಪ್ರಸ್ತುತ ಶೇಕಡಾ 7.5 ರ ಬಡ್ಡಿದರದಲ್ಲಿ 115 ತಿಂಗಳುಗಳಲ್ಲಿ ದ್ವಿಗುಣಗೊಳ್ಳುತ್ತವೆ. ಆದಾಗ್ಯೂ KVP ಯಲ್ಲಿ ಠೇವಣಿ ಮಾಡಿದ ಮೊತ್ತವು ತೆರಿಗೆಗೆ ಒಳಪಡುತ್ತದೆ. ಅಂದರೆ ನೀವು ಠೇವಣಿ ಮಾಡಿದ ಹಣದ ಬಡ್ಡಿಯ ಮೇಲೆ ತೆರಿಗೆ ಪಾವತಿಸಬೇಕಾಗುತ್ತದೆ.

5. ಮ್ಯೂಚುಯಲ್ ಫಂಡ್ ಯೋಜನೆಗಳು: ಷೇರುಗಳಿಗೆ ಹೋಲಿಸಿದರೆ ಮ್ಯೂಚುವಲ್ ಫಂಡ್‌ಗಳು ತುಲನಾತ್ಮಕವಾಗಿ ಸುರಕ್ಷಿತ ಮತ್ತು ಸಮಸ್ಯೆ ಮುಕ್ತವಾಗಿವೆ. ಆದರೆ ಅವುಗಳು ಬಹಳಷ್ಟು ಅಪಾಯವನ್ನು ಹೊಂದಿರುತ್ತವೆ. ಮ್ಯೂಚುವಲ್ ಫಂಡ್‌ಗಳಲ್ಲಿ ಹೂಡಿಕೆ ಮಾಡುವ ಮೊದಲು ನೀವು ಯಾವಾಗಲೂ ಹಣಕಾಸು ಸಲಹೆಗಾರರನ್ನು ಸಂಪರ್ಕಿಸಬೇಕು.

6. ಚಿನ್ನ: ದೀರ್ಘಾವಧಿಯಲ್ಲಿ ಸಂಪತ್ತನ್ನು ಸಂಗ್ರಹಿಸಲು ಚಿನ್ನವನ್ನು ಸುರಕ್ಷಿತ ಆಯ್ಕೆ ಎಂದು ಪರಿಗಣಿಸಲಾಗುತ್ತದೆ. ಆದಾಗ್ಯೂ ಭೌತಿಕ ಚಿನ್ನವನ್ನು ಸಂಗ್ರಹಿಸುವುದು ಕಷ್ಟ. ದೀರ್ಘಾವಧಿಯಲ್ಲಿ ಹಳದಿ ಲೋಹದಿಂದ ಲಾಭ ಪಡೆಯಲು ಹೂಡಿಕೆದಾರರು ಸಾರ್ವಭೌಮ ಗೋಲ್ಡ್ ಬಾಂಡ್‌ಗಳಲ್ಲಿ ಹೂಡಿಕೆ ಮಾಡಬಹುದು.

7. ಬ್ಯಾಂಕ್ ಠೇವಣಿ : ನಿವೃತ್ತಿ ಉಳಿತಾಯ ಯೋಜನೆಯನ್ನು ಮಾಡುವಾಗ ಉದ್ಯೋಗಿಯಲ್ಲದವರು 5 ವರ್ಷಗಳವರೆಗೆ ಬ್ಯಾಂಕಿನಲ್ಲಿ ಸ್ಥಿರ ಠೇವಣಿ ಮಾಡಬಹುದು. ಆದಾಯ ತೆರಿಗೆ ಸೆಕ್ಷನ್ 80 ಸಿ ಅಡಿಯಲ್ಲಿ ತೆರಿಗೆ ಮುಕ್ತ ಪ್ರಯೋಜನವೂ ಲಭ್ಯವಿದೆ. ಪ್ರಸ್ತುತ ಅನೇಕ ಬ್ಯಾಂಕ್‌ಗಳು ಇದರ ಮೇಲೆ 9% ಉತ್ತಮ ಆದಾಯವನ್ನು ನೀಡುತ್ತಿವೆ. ಯಾವುದೇ ಒಂದು ಬ್ಯಾಂಕ್‌ನಲ್ಲಿ ರೂ 5 ಲಕ್ಷದವರೆಗಿನ ಎಫ್‌ಡಿ ಹೂಡಿಕೆಗಳನ್ನು ಠೇವಣಿ ವಿಮೆ ಮತ್ತು ಕ್ರೆಡಿಟ್ ಗ್ಯಾರಂಟಿ ಕಾರ್ಪೊರೇಷನ್ (ಡಿಐಸಿಜಿಸಿ) ವಿಮೆ ಮಾಡಲಾಗುತ್ತದೆ.

ಇದನ್ನೂ ಓದಿ:ಸೋಮವಾರದ ಷೇರು ಮಾರುಕಟ್ಟೆ: ಲಾಭದಿಂದ ಶುರುವಾದ ವ್ಯವಹಾರ