ಜೈಸಲ್ಮೇರ್(ರಾಜಸ್ಥಾನ):ಒಂದೂರು ಅಥವಾ ಜಿಲ್ಲೆಯಲ್ಲಿ ಒಬ್ಬ ಐಎಎಸ್ ಅಧಿಕಾರಿ ಇರುವುದೇ ದೊಡ್ಡ ವಿಷಯ.. ಮನೆಯಲ್ಲಿ ಇಬ್ಬರಿದ್ದಾರಂತೆ. ಅದು ಇಬ್ಬರೂ ಹುಡುಗಿಯರೇ ಆಗಿರುವುದು ಇನ್ನೂ ವಿಶೇಷ. ಹೆಣ್ಣುಮಕ್ಕಳನ್ನು ಡಿಸಿ ಮಾಡುವವರೆಗೂ ಓದಿಸಲು ಅವರ ತಾಯಿ ಮಾಡಿದ ತ್ಯಾಗವೇನೂ ಸಣ್ಣದಲ್ಲ ಬಿಡಿ! ಅವರು ಯುಪಿಎಸ್ ಸಿ ಟಾಪರ್ ಕೂಡ ಹೌದು. ಹಾಗಾದರೆ ತಾಯಿ ಮತ್ತು ಮಗಳು ಯಾರು? ಅವಳ ತ್ಯಾಗವಾದರೂ ಏನು? ಯಾರಿವರು ಟೀನಾ ದಾಬಿ, ರಿಯಾ ದಾಬಿ.. ಅವರ ತಾಯಿ ಹಿಮಾನಿ ಕಾಂಬಳೆ ಎಷ್ಟೋ ಜನರಿಗೆ ಸ್ಪೂರ್ತಿಯಾಗಿದ್ದಾರೆ.
ಟೀನಾ ದಾಬಿ ರಾಜಸ್ಥಾನದ ಜೈಸಲ್ಮೇರ್ ಡಿಸಿ ಆಗಿದ್ದರೆ, ರಿಯಾ ದಾಬಿ ಅದೇ ರಾಜ್ಯದ ಅಲ್ವಾರ್‌ನ ಕಲೆಕ್ಟರ್ ಆಗಿ ಕೆಲಸ ಮಾಡುತ್ತಿದ್ದಾರೆ. ಟೀನಾ 2016ರ ಟಾಪರ್ ಆಗಿ ಎಲ್ಲರ ಗಮನ ಸೆಳೆದಿದ್ದರು. ಆ ಸಮಯದಲ್ಲಿ ರಿಯಾ ಹೈಸ್ಕೂಲ್ ವಿದ್ಯಾರ್ಥಿನಿ ಆಗಿದ್ದರು. ಅಕ್ಕನ ಯಶಸ್ಸು ಅವರಲ್ಲಿಯೂ ಐಎಎಸ್ ಆಗುವ ಉತ್ಸಾಹವನ್ನು ಇಮ್ಮಡಿಗೊಳಿಸಿತು. ರಿಯಾ ಕೂಡ 2020 ರಲ್ಲಿ ಸಿವಿಲ್ ಪರೀಕ್ಷೆ ಪಾಸ್ ಮಾಡಿ ಅಕ್ಕನ ಹಾದಿಯನ್ನು ಹಿಡಿದು, ಗುರಿ ಸಾಧಿಸಿದ್ದಾರೆ.
ಈ ಇಬ್ಬರೂ ಸಹೋದರಿಯರು ಈಗ ಯುವ ಜನರ ಕಣ್ಮಣಿಗಳಾಗಿದ್ದಾರೆ. ಲಕ್ಷಾಂತರ ಜನರು Instagram ಮತ್ತು Twitter ನಲ್ಲಿ ಈ ಇಬ್ಬರು ಐಎಎಸ್ ಸಹೋದರಿಯರನ್ನು ಅನುಸರಿಸುತ್ತಿದ್ದಾರೆ. ಟೀನಾ ಇನ್‌ಸ್ಟಾಗ್ರಾಮ್‌ನಲ್ಲಿ 16 ಲಕ್ಷ ಮತ್ತು ಟ್ವಿಟರ್‌ನಲ್ಲಿ 4 ಲಕ್ಷ ಅನುಯಾಯಿಗಳನ್ನು ಹೊಂದಿದ್ದಾರೆ. ಸಹೋದರಿ ರಿಯಾ ಇನ್‌ಸ್ಟಾಗ್ರಾಮ್‌ನಲ್ಲಿ ಐದೂವರೆ ಮಿಲಿಯನ್‌ಗಿಂತಲೂ ಹೆಚ್ಚು ಅಭಿಮಾನಿಗಳನ್ನು ಹೊಂದಿದ್ದಾರೆ. ಅದಕ್ಕಾಗಿಯೇ ಅವರು ಪ್ರಸಿದ್ಧ ಡಿಸಿಗಳಾಗಿ ಜನಪ್ರಿಯರಾಗಿದ್ದಾರೆ. ಅವರ ಯಶಸ್ಸಿನ ಹಿಂದೆ ತಾಯಿ ಹಿಮಾನಿ ಕಾಂಬಳೆ ಇದ್ದಾರೆ. ಮಕ್ಕಳಿಗಾಗಿ ತಮ್ಮ ವೃತ್ತಿಜೀವನವನ್ನು ತ್ಯಜಿಸಿದ ಹಿಮಾನಿ, ಮಕ್ಕಳು ಅತಿ ಎತ್ತರಕ್ಕೆ ಏರುವಂತೆ ಮಾಡಿದ್ದಾರೆ.
ತಮ್ಮ ಕನಸನ್ನು ತ್ಯಾಗ ಮಾಡಿದ ಮಹಾತಾಯಿ:ಟೀನಾ ಮತ್ತು ರಿಯಾ ತಮ್ಮ ಅಧ್ಯಯನದಲ್ಲಿ ಯಶಸ್ಸು ಗಳಿಸಲಿ ಎಂಬ ಕಾರಣಕ್ಕೆ ಹಿಮಾನಿ ಕಾಂಬ್ಳೆ ತಮ್ಮ ವೃತ್ತಿಜೀವನವನ್ನು ತ್ಯಾಗ ಮಾಡಿದರು. ಅವರು ಭೋಪಾಲ್‌ನ ಮೌಲಾನಾ ಆಜಾದ್ ನ್ಯಾಷನಲ್ ಇನ್‌ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿಯ ಟಾಪರ್ ಆಗಿದ್ದರು. UPSC ಪರೀಕ್ಷೆ ತೆಗೆದುಕೊಂಡಿದ್ದ ಅವರು, ಭಾರತೀಯ ಎಂಜಿನಿಯರಿಂಗ್ ಸೇವೆ (IES) ಅಧಿಕಾರಿಯಾಗಿ ಸೇವೆಗೆ ಸೇರ್ಪಡೆಗೊಂಡಿದ್ದರು. ಅನೇಕ ಕನಸುಗಳು ಮತ್ತು ಮಹತ್ವಾಕಾಂಕ್ಷೆಗಳೊಂದಿಗೆ ಐಇಎಸ್ ಆಗಿದ್ದ ಅವರು, ತಮ್ಮ ಮಕ್ಕಳ ಭವಿಷ್ಯ ರೂಪಿಸುವುದಕ್ಕಾಗಿ ಆದ್ಯತೆ ನೀಡಿದರು. ಕೆಲಸ ಮಾಡುವಾಗಲೂ ಮಕ್ಕಳಿಗೆ ಶಿಕ್ಷಣ ಕೊಡಿಸಬಹುದು. ಆದರೆ, ಹಿಮಾನಿ ತಮ್ಮ ಪೂರ್ಣ ಸಮಯವನ್ನು ಇಬ್ಬರು ಹೆಣ್ಣು ಮಕ್ಕಳಿಗಾಗಿ ಮೀಸಲಿಟ್ಟರು.
''ಯುಪಿಎಸ್‌ಸಿ ಪರೀಕ್ಷೆ ಪಾಸ್ ಮಾಡುವುದು ಎಷ್ಟು ಕಷ್ಟ ಎಂಬುದು ಪರೀಕ್ಷೆ ಎದುರಿಸಿದವರಿಗೆ ಚನ್ನಾಗಿಯೇ ಗೊತ್ತಿರುತ್ತದೆ. ಹೀಗೆ ಪರೀಕ್ಷೆ ಎದುರಿಸಿ ಅದು ಎಷ್ಟು ಕಷ್ಟ ಎಂದು ಅರಿತಿದ್ದ ನನಗೆ, ಮಕ್ಕಳ ಕನಸು ನನಸು ಮಾಡುವುದಕ್ಕಾಗಿ ನಾನು ಕೆಲಸ ಬಿಟ್ಟೆ ಎನ್ನುತ್ತಾರೆ ಹಿಮಾನಿ ಕಾಂಬ್ಳೆ.