ನವದೆಹಲಿ: ಟಿವಿಎಸ್ ಮೋಟಾರ್ ಬೈಕ್ ಕಂಪನಿಯ ಪೈಕಿ ಅಪಾಚೆ ಆರ್ಟಿಆರ್ ಸ್ಪೋರ್ಟ್ಸ್ ಬೈಕ್ ತನ್ನದೇ ಆದ ಛಾಪು ಮೂಡಿಸಿದ್ದು, ಇದೀಗ ಆರ್ಟಿಆರ್-200, 4V ಎಂಬ ಹೊಸ ಆವೃತ್ತಿಯನ್ನು 1.31 ಲಕ್ಷ ರೂ.ಗೆ (ದೆಹಲಿಯ ಎಕ್ಸ್‌ಶೋರೂಂ ಬೆಲೆ) ಬಿಡುಗಡೆ ಮಾಡಲಾಗಿದೆ ಎಂದು ಕಂಪನಿ ತಿಳಿಸಿದೆ.
ಅಪಾಚೆ ಆರ್ಟಿಆರ್ ಬೈಕ್ಗಳ ಪೈಕಿ ಈಗಾಗಲೇ 160, 180, 200 ಸಿಸಿ ಬೈಕ್ಗಳು ಚಾಲ್ತಿಯಲ್ಲಿದ್ದು, ಈ ನೂತನ ಆವೃತ್ತಿಯ 200 - ಸಿಸಿ ಬೈಕ್ ಮೂರು ರೈಡ್ ಮೋಡ್ಗಳನ್ನು ಹೊಂದಿದೆ. ಬೈಕರ್ಗೆ ಅನುಕೂಲವಾಗುವಂತೆ ಸ್ಪೋರ್ಟ್, ಅರ್ಬನ್ ಹಾಗೂ ರೈನ್ ಮೋಡ್ಗಳನ್ನು ಬಳಸಬಹುದಾಗಿದೆ ಎಂದು ಕಂಪನಿ ಹೇಳಿದೆ.
ಅಪಾಚೆ ಆರ್ಟಿಆರ್, ಇದೊಂದು ಸ್ಪೋರ್ಟ್ಸ್ ಸರಣಿಯ ಬೈಕ್ ಆಗಿದ್ದು, 2005 ರಲ್ಲಿ 160 ಸಿಸಿ ಬೈಕ್ಗಳೊಂದಿಗೆ ಪ್ರಾರಂಭಗೊಂಡಿತು. ನಮ್ಮ ಗ್ರಾಹಕರು ಮತ್ತು ಬೈಕ್ ರೇಸಿಂಗ್ ಪ್ರಿಯರು ನಮ್ಮ ಈ ಆರ್ಟಿಆರ್ ಬೈಕ್ಗಳನ್ನು ಅತಿ ಹೆಚ್ಚಾಗಿ ಬಳಸುತ್ತಿರುವುದೇ ನಮ್ಮ ಬೈಕ್ಗಳ ಗುಣಮಟ್ಟಕ್ಕೆ ಸಾಕ್ಷಿಯಾಗಿದೆ ಎಂದು ಟಿವಿಎಸ್ ಮೋಟಾರ್ ಕಂಪನಿಯ ಮಾರ್ಕೆಟಿಂಗ್ ಮುಖ್ಯಸ್ಥ ಮೇಘಶ್ಯಾಮ್ ಡಿಘೋಲ್ ಹೇಳಿದ್ದಾರೆ.
ಅಪಾಚೆ ಪ್ರಾರಂಭಗೊಂಡಾಗಿನಿಂದಲೂ ಇಲ್ಲಿಯವರೆಗೆ, ಒಂದಲ್ಲಾ ಮತ್ತೊಂದು ವಿವಿಧ ರೀತಿಯ ಫೀಚರ್ಗಳನ್ನು ಬೈಕ್ಗಳಲ್ಲಿ ನೀಡಲಾಗುತ್ತಿದೆ. ಅದರಂತೆ ಹೊಸ ಟಿವಿಎಸ್ ಅಪಾಚೆ ಆರ್ಟಿಆರ್ - 200 4V ಬೈಕ್ನಲ್ಲಿಯೂ ಸಹ ವಿಶಿಷ್ಠ ಗುಣ ಲಕ್ಷಣಗಳನ್ನು ಅಳವಡಿಸಲಾಗಿದ್ದು, ಬೈಕ್ ಪ್ರಿಯರಿಗೆ ಇದೊಂದು ಅಚ್ಚುಮೆಚ್ಚಿನ ಬೈಕ್ ಆಗುವುದರಲ್ಲಿ ಯಾವುದೇ ಸಂಶಯವಿಲ್ಲ ಎಂದು ಡಿಘೋಲ್ ತಿಳಿಸಿದ್ದಾರೆ.
ಈ ನೂತನ ಆರ್ಟಿಆರ್ ಬೈಕ್ ಡ್ಯುಯಲ್ ಚಾನೆಲ್ ಎಬಿಎಸ್ ಬ್ರೇಕಿಂಗ್ ಸಿಸ್ಟಮ್ ಹೊಂದಿದ್ದು, ಅತ್ಯಾಧುನಿಕ ಬ್ರೇಕಿಂಗ್ ಕಾರ್ಯಕ್ಷಮತೆಯೊಂದಿಗೆ ಕಾರ್ಯ ನಿರ್ವಹಿಸುತ್ತದೆ, ಆದಲ್ಲದೇ ಹೊಂದಿಸಿಕೊಳ್ಳಬಹುದಾದ ಸಸ್ಪೆನ್ಷನ್ ಕೂಡ ಈ ಬೈಕ್ನಲ್ಲಿ ಅಳವಡಿಸಲಾಗಿದೆ.