ಮುಂಬೈ:ಮಂಗಳವಾರದ ಕರೆನ್ಸಿ ವಿನಿಮಯ ಮಾರುಕಟ್ಟೆಯಲ್ಲಿ ಡಾಲರ್ ಎದುರು ರೂಪಾಯಿಯ ಮೌಲ್ಯ ಏರಿಕೆಯಾಗಿದೆ.
ದೇಶದ ಪೇಟೆಯಲ್ಲಿ ಕಳೆದ ಒಂದು ತಿಂಗಳಿಂದ ನಡೆಯುತ್ತಿರುವ ಏರಿಳಿತದ ಮೇಲಾಟ, ಜಾಗತಿಕ ಷೇರುಪೇಟೆಗಳ ಮಂದಗತಿಯ ವಹಿವಾಟು, ಅಮೆರಿಕ- ಚೀನಾ ವಾಣಿಜ್ಯ ಸಮರ, ದೇಶಿಯ ಕಂಪನಿಗಳ ತ್ರೈಮಾಸಿಕ ವರಮಾನದಲ್ಲಿನ ಇಳಿಕೆಯಂತಹ ಬೆಳವಣಿಗೆಯಿಂದ ರೂಪಾಯಿ ಮೌಲ್ಯ ಕಳೆದ ವಾರದಿಂದ ಏರಿಳಿತವಾಗುತ್ತಿತ್ತು.
ಸೋಮವಾರದಂದು ರೂಪಾಯಿ ಮೌಲ್ಯ 113 ಪೈಸೆ ಕುಸಿತ ಕಂಡು ಒಂದು ಡಾಲರ್ಗೆ ₹ 70.80ಕ್ಕೆ ಇಳಿಕೆ ಆಗಿತ್ತು. ಇದು ಆರು ವರ್ಷಗಳ ವಹಿವಾಟಿನಲ್ಲಿ ದಿನವೊಂದರಲ್ಲೇ ರೂಪಾಯಿಯ ಗರಿಷ್ಠ ಕುಸಿತ ಇದಾಗಿತ್ತು. ಮಹಾ ಕುಸಿತದ ಮರುದಿನವೇ ರೂಪಾಯಿ ಮೌಲ್ಯದಲ್ಲಿ ಅಲ್ಪ ಚೇತರಿಕೆ ಕಂಡುಬಂದಿದೆ.
ಇಂದು ಡಾಲರ್ ಎದುರು ರೂಪಾಯಿ 26 ಪೈಸೆ ಏರಿಕೆ ಕಂಡು 70.47ರಲ್ಲಿ ವಹಿವಾಟು ನಡೆಸುತ್ತಿದೆ. ದೇಶಿ ಮಾರುಕಟ್ಟೆಯ ಸಕಾರಾತ್ಮಕ ಆರಂಭ ರೂಪಾಯಿ ಚೇತರಿಕೆಗೆ ಬೆಂಬಲವಾಯಿತು. ಇದರ ಜೊತೆಗೆ ವಿದೇಶಿ ಬಂಡವಾಳದ ಹೊರಹರಿವು ಮತ್ತು ಕಚ್ಚಾ ತೈಲ ದರ ಏರಿಕೆ ಪೂರಕವಾಗಿತ್ತು. ಆರ್ಬಿಐನ ವಿತ್ತೀಯ ನೀತಿ ಪರಾಮರ್ಶೆ ಸಭೆಯು ನಾಳೆ (ಬುಧವಾರ) ನಡೆಯಲಿದ್ದು, ಬಡ್ಡಿ ದರ ಇಳಿಕೆಯಾಗುವ ಸಾಧ್ಯತೆ ಇದೆ ಎಂದು ಹೇಳಲಾಗುತ್ತಿದೆ.