ಪೇಟಿಎಂಗೆ ಶೆಡ್ಯೂಲ್ಡ್‌ ಬ್ಯಾಂಕ್‌ ಸ್ಟೇಟಸ್‌ ಕೊಟ್ಟ ಆರ್‌ಬಿಐ

ಇತ್ತೀಚೆಗೆ ಷೇರುಮಾರಕಟ್ಟೆ ಪ್ರವೇಶಿಸಿದ್ದ ಡಿಜಿಟಲ್‌ ಪೇಮೆಂಟ್‌ ಪ್ಲಾಟ್‌ ಫಾರ್ಮ್‌ ಸಂಸ್ಥೆ ಪೇಟಿಎಂ ಪೇಮೆಂಟ್‌ಗೆ ಆರ್‌ಬಿಐ ಶೆಡ್ಯೂಲ್ಡ್‌ ಬ್ಯಾಂಕ್‌ ಸ್ಟೇಟಸ್‌ ನೀಡಿದೆ. ಇನ್ಮುಂದೆ ಪೇಟಿಎಂ ಮತ್ತಷ್ಟು ಹಣಕಾಸು ಸೇವೆಗಳಿಗೆ ಇದು ಅನುಕೂಲವಾಗಲಿದೆ.

ನವದೆಹಲಿ: ಆರ್‌ಬಿಐ ತಮಗೆ ಶೆಡ್ಯೂಲ್ಡ್‌ ಬ್ಯಾಂಕ್‌ ಸ್ಟೇಟಸ್‌ ನೀಡಿದೆ ಎಂದು ಡಿಜಿಟಲ್‌ ಪೇಮೆಂಟ್‌ ಪ್ಲಾಟ್‌ ಫಾರ್ಮ್‌ ಸಂಸ್ಥೆ ಪೇಟಿಎಂ ತಿಳಿಸಿದೆ. ಭಾರತೀಯ ರಿಸರ್ವ್ ಬ್ಯಾಂಕ್ ಕಾಯಿದೆ-1934ರ ಎರಡನೇ ವೇಳಾಪಟ್ಟಿಯಲ್ಲಿ ಪೇಟಿಎಂ ಅನ್ನು ಸೇರಿಸಲಾಗಿದೆ. ಈ ಅನುಮತಿಯಿಂದ ಪೇಟಿಎಂ ಮತ್ತಷ್ಟು ಹಣಕಾಸು ಸೇವೆಗಳು ನೀಡಲು ಸಹಾಯ ಮಾಡುತ್ತದೆ ಎಂದು ಹೇಳಿದೆ.

ಶೆಡ್ಯೂಲ್ಡ್‌ ಬ್ಯಾಂಕ್ ಸ್ಟೇಟಸ್‌ನಿಂದ ಪ್ರಾಥಮಿಕ ಹರಾಜುಗಳು, ಸ್ಥಿರ ದರಗಳು, ಸರ್ಕಾರ ಹಾಗೂ ಇತರ ದೊಡ್ಡ ನಿಗಮಗಳಲ್ಲಿ ಭಾಗವಹಿಸುವಿಕೆ ಸೇರಿದಂತೆ ಹೊಸ ವ್ಯಾಪಾರ ಅವಕಾಶಗಳನ್ನು ಪೇಟಿಎಂ ಬ್ಯಾಂಕ್‌ ಅನ್ವೇಷಿಸಬಹುದಾಗಿದೆ. ಇದರ ಜೊತೆಗೆ ಮಾರ್ಜಿನಲ್ ಸ್ಟ್ಯಾಂಡಿಂಗ್ ಫೆಸಿಲಿಟಿಯಲ್ಲಿ ಭಾಗವಹಿಸಬಹುದಾಗಿದ್ದು, ಸರ್ಕಾರ ನಡೆಸುವ ಹಣಕಾಸು ಸೇರ್ಪಡೆ ಯೋಜನೆಗಳಲ್ಲಿ ಪಾಲುದಾರರಾಗಲು ಅರ್ಹವಾಗಿರುತ್ತದೆ.

ನಾವು ಡಿಜಿಟಲ್ ಬ್ಯಾಂಕಿಂಗ್ ಸೇವೆಗಳ ತ್ವರಿತ ಅಳವಡಿಕೆಗೆ ಸಾಕ್ಷಿಯಾಗಿದ್ದೇವೆ. ಬಳಕೆದಾರರು ಭಾರತದಲ್ಲಿ ಬ್ಯಾಂಕಿಂಗ್‌ನ ಹೊಸ ಯುಗವನ್ನು ಶ್ಲಾಘಿಸುತ್ತಿದ್ದಾರೆ.

ಭಾರತೀಯ ರಿಸರ್ವ್ ಬ್ಯಾಂಕ್ ಕಾಯಿದೆ, 1934ರ ಎರಡನೇ ಶೆಡ್ಯೂಲ್‌ನಲ್ಲಿ ಪೇಟಿಎಂ ಪೇಮೆಂಟ್ಸ್ ಬ್ಯಾಂಕ್ ಅನ್ನು ಸೇರಿಸಿದೆ. ಇದರಿಂದ ಹೆಚ್ಚಿನ ಹಣಕಾಸು ಸೇವೆಗಳು ಮತ್ತು ಉತ್ಪನ್ನಗಳನ್ನು ತರಲು ನಮಗೆ ಸಹಾಯ ಮಾಡುತ್ತದೆ ಎಂದು ಪೇಟಿಎಂ ಪೇಮೆಂಟ್ಸ್ ಬ್ಯಾಂಕ್ ಎಂಡಿ ಹಾಗೂ ಸಿಇಒ ಸತೀಶ್ ಕುಮಾರ್ ಗುಪ್ತಾ ಹೇಳಿದ್ದಾರೆ.

ಈ ಬ್ಯಾಂಕ್ 33.3 ಕೋಟಿ ಪೇಟಿಎಂ ವ್ಯಾಲೆಟ್‌ಗಳನ್ನು ಬೆಂಬಲಿಸುತ್ತದೆ. 87,000 ಆನ್‌ಲೈನ್ ವ್ಯಾಪಾರಿಗಳೊಂದಿಗೆ ಗ್ರಾಹಕರು ಪಾವತಿಗಳನ್ನು ಮಾಡಬಹುದು. 2.11 ಕೋಟಿ ಇನ್ - ಸ್ಟೋರ್ ವ್ಯಾಪಾರಿಗಳಲ್ಲೂ ಪಾವತಿಗೆ ಅನುವು ಮಾಡಿಕೊಡುತ್ತದೆ. 15.5 ಕೋಟಿಗೂ ಅಧಿಕ ಯುಪಿಐ ಬಳಕೆದಾರರನ್ನು ಪೇಟಿಎಂ ಹೊಂದಿದೆ.

ಇದನ್ನೂ ಓದಿ:ಆರ್‌ಬಿಐ ಹಣಕಾಸು ನೀತಿ: ಬಡ್ಡಿ ದರಗಳು ಯಥಾಸ್ಥಿತಿಯಲ್ಲೇ ಮುಂದುವರಿಕೆ