ಮುಂಬೈ ಷೇರು ಪೇಟೆಯಲ್ಲಿ ಜಾಕ್​​ ಪಾಟ್​: ಭಾರಿ ಏರಿಕೆ ಕಂಡ ಸೆನ್ಸೆಕ್ಸ್​, ನಿಫ್ಟಿ!

ಬಿಹಾರ ವಿಧಾನಸಭೆ ಚುನಾವಣೆ, ಕೊರೊನಾ ಲಸಿಕೆ ಎಫೆಕ್ಟ್​ನಿಂದಾಗಿ ಮುಂಬೈ ಷೇರು ಮಾರುಕಟ್ಟೆಯಲ್ಲಿ ದಾಖಲೆಯ ಏರಿಕೆ ಕಂಡು ಬಂದಿದ್ದು, ಈ ಮೂಲಕ ಹೊಸ ದಾಖಲೆ ನಿರ್ಮಾಣ ಮಾಡಿದೆ.

ಮುಂಬೈ:ಭಾರತೀಯ ಸಂವೇದಿ ಸೂಚ್ಯಂಕದಲ್ಲಿ ಇಂದು ಭಾರಿ ಮಟ್ಟದ ಏರಿಕೆ ಕಂಡು ಬಂದಿದೆ. ಕೊರೊನಾ ವೈರಸ್​ಗೆ ಔಷಧ ಕಂಡು ಹಿಡಿದಿರುವ ಸುದ್ದಿ ಹೊರಬೀಳುತ್ತಿದ್ದಂತೆ ಮುಂಬೈ ಷೇರು ಪೇಟೆಯಲ್ಲಿ ಈ ಏರಿಕೆ ಕಂಡು ಬಂದಿದೆ.

600 ಅಂಕಗಳ ಏರಿಕೆ ಕಂಡು ಬರುತ್ತಿದ್ದಂತೆ ಸೆನ್ಸೆಕ್ಸ್​ 43 ಸಾವಿರ ಅಂಕ ದಾಟಿದ್ದು, ನಿಫ್ಟಿ ಕೂಡ 137 ಅಂಕಗಳ ಏರಿಕೆಯೊಂದಿಗೆ 12,598 ಅಂಕ ದಾಖಲು ಮಾಡಿದೆ. ಕೊರೊನಾ ವೈರಸ್​ಗೆ ಔಷಧ ಅಭಿವೃದ್ಧಿ ಮಾಡಿರುವ ಆಶಾಭಾವನೆ ಮೂಡಿರುವುದು ಈ ಬೆಳವಣಿಗೆಗೆ ಕಾರಣ ಎಂದು ಹೇಳಲಾಗುತ್ತಿದೆ. ಇದರ ಜತೆಗೆ ಬರುವ ದಿನಗಳಲ್ಲಿ ಷೇರು ಮಾರುಕಟ್ಟೆ ಹಾಗೂ ಆರ್ಥಿಕ ಸ್ಥಿತಿಯಲ್ಲಿ ಚೇತರಿಕೆ ಕಂಡು ಬರಲಿದೆ ಎನ್ನಲಾಗಿದೆ.

ಈ ಏರಿಕೆಯೊಂದಿಗೆ ಇಂಡಸ್ಇಂಡ್ ಬ್ಯಾಂಕ್​, ಬಜಾಜ್​ ಫೈನಾನ್ಸ್​, ಎಸ್​ಬಿಐ,ಲಾರ್ಸನ್​, ಹೆಚ್​ಡಿಎಫ್​ಸಿ ಸೇರಿದಂತೆ ಅನೇಕ ಕಂಪನಿ ಷೇರುಗಳು ದಾಖಲೆ ಪ್ರಮಾಣದಲ್ಲಿ ಏರಿಕೆ ಕಂಡಿವೆ. ಪ್ರಮುಖವಾಗಿ ಬ್ಯಾಂಕಿಂಗ್​ ಹಾಗೂ ಹಣಕಾಸು ಕ್ಷೇತ್ರ ಹೆಚ್ಚಿನ ಬೇಡಿಕೆ ಪಡೆದುಕೊಂಡಿವೆ. ಐಸಿಐಸಿಐ ಬ್ಯಾಂಕ್‌, ಆಕ್ಸಿಸ್‌ ಬ್ಯಾಂಕ್‌, ಟಾಟಾ ಸ್ಟೀಲ್‌, ಟೆಕ್‌ ಮಹೀಂದ್ರಾ ಮತ್ತು ಟೈಟಾನ್‌ ಷೇರು ಏರಿಕೆ ಕಂಡಿವೆ.

ಕಳೆದ 8 ತಿಂಗಳ ಬಳಿಕ ಸೆನ್ಸೆಕ್ಸ್​ 43 ಸಾವಿರದ ಗಡಿ ದಾಟಿದ್ದು, ಕೊರೊನಾ ಬಳಿಕ ಚೇತರಿಕೆ ಹಾದಿ ಹಿಡಿದಿದೆ. ಇದು ಹೂಡಿಕೆದಾರರಲ್ಲಿ ಮಂದಹಾಸ ಮೂಡಿಸಿದೆ.