ಶೀಘ್ರ ಬೆಳವಣಿಗೆಗೆ ಕಾರಣವಾಗುವ ಕ್ರಿಪ್ಟೋ ಕರೆನ್ಸಿಯಿಂದ ಆರ್ಥಿಕ ಅಸ್ಥಿರತೆಯ ಸವಾಲು ಇದೆ: IMF

2021ರ ಆರಂಭದಲ್ಲಿ 65 ಸಾವಿರಕ್ಕಿಂತ ಹೆಚ್ಚು ವಹಿವಾಟು ನಡೆಸುತ್ತಿದ್ದ ಬಿಟ್​ ಕಾಯಿನ್​ನ ವಹಿವಾಟು ಈಗ 30 ಸಾವಿರಕ್ಕೆ ಇಳಿಕೆಯಾಗಿದೆ. ಇದು ಹೆಚ್ಚು ಕಡಿಮೆಯಾಗಬಹುದು ಎಂದು ಟೋಬಿಯಾಸ್ ಆಡ್ರಿಯನ್ ಅಭಿಪ್ರಾಯಪಟ್ಟಿದ್ದಾರೆ.

ವಾಷಿಂಗ್ಟನ್(ಅಮೆರಿಕ):ಇತ್ತೀಚೆಗೆ ಸಾಕಷ್ಟು ಸುದ್ದಿಯಲ್ಲಿರುವಕ್ರಿಪ್ಟೋ ಕರೆನ್ಸಿ ತ್ವರಿತ ಬೆಳವಣಿಗೆಗೆ ಕಾರಣವಾಗುವುದರ ಜೊತೆಗೆ ಹೊಸ ಅವಕಾಶಗಳನ್ನು ಸೃಷ್ಟಿಸುತ್ತದೆ. ಆದರೆ ಆರ್ಥಿಕ ಸ್ಥಿರತೆಯ ವಿಚಾರದಲ್ಲಿ ಅನೇಕ ಸವಾಲುಗಳು ಕಾಣಿಸಿಕೊಳ್ಳುತ್ತವೆ ಎಂದು ಐಎಂಎಫ್(IMF) ಎಚ್ಚರಿಕೆ ನೀಡಿದೆ.

ಕ್ರಿಪ್ಟೋಕರೆನ್ಸಿಗಳು ಡಿಜಿಟಲ್ ಅಥವಾ ವರ್ಚುವಲ್ ಕರೆನ್ಸಿಗಳಾಗಿವೆ. ಕರೆನ್ಸಿಯ ನಿರ್ವಹಣೆಗೆ ಮತ್ತು ಕರೆನ್ಸಿ ವರ್ಗಾವಣೆಗೆ ಗೂಢಲಿಪಿ ತಂತ್ರಗಳನ್ನು ಅಳವಡಿಸಿಕೊಳ್ಳುತ್ತದೆ. ಕೇಂದ್ರ ಬ್ಯಾಂಕ್​ನಿಂದ ಪ್ರತ್ಯೇಕವಾಗಿ ಮತ್ತು ಸ್ವತಂತ್ರವಾಗಿ ಕಾರ್ಯ ನಿರ್ವಹಣೆ ಮಾಡುವ ಈ ಕ್ರಿಪ್ಟೋ ಕರೆನ್ಸಿ ಇದೇ ಕಾರಣಕ್ಕಾಗಿ ಸವಾಲುಗಳನ್ನು ಸೃಷ್ಟಿ ಮಾಡುತ್ತದೆ ಎನ್ನಲಾಗಿದೆ.

ಕ್ರಿಪ್ಟೋ ವ್ಯವಸ್ಥೆ ಮತ್ತು ಹಣಕಾಸು ಸ್ಥಿರತೆ ಸವಾಲುಗಳು ಎಂಬ ಬಗ್ಗೆ ವರದಿ ನೀಡಿರುವ ಐಎಂಎಫ್ ಈ ತಾಂತ್ರಿಕ ಆವಿಷ್ಕಾರವು ಹೊಸ ಯುಗಕ್ಕೆ ನಾಂದಿ ಹಾಡುತ್ತದೆ. ಇದು ಹಣಕಾಸು ಸೇವೆಗಳನ್ನು ಅತ್ಯಂತ ವೇಗವಾಗಿ ಮತ್ತು ಅಗ್ಗವಾಗಿ ಹಾಗೂ ಸುಲಭವಾಗುವಂತೆ ಮಾಡುತ್ತದೆ. ವಿಕೇಂದ್ರೀಕೃತ ಹಣಕಾಸು ವ್ಯವಸ್ಥೆಯಿಂದ ಪಾರದರ್ಶಕತೆಯನ್ನೂ ನಿರೀಕ್ಷೆ ಮಾಡಬಹುದಾಗಿದೆ ವರದಿಯಲ್ಲಿ ಉಲ್ಲೇಖಿಸಿದೆ.

ಹಣಕಾಸು ಸಲಹೆಗಾರ ಮತ್ತು ಐಎಂಎಫ್‌ನ ಹಣಕಾಸು ಮತ್ತು ಬಂಡವಾಳ ಮಾರುಕಟ್ಟೆ ವಿಭಾಗದ ನಿರ್ದೇಶಕರಾದ ಟೋಬಿಯಾಸ್ ಆಡ್ರಿಯನ್ ಪಿಟಿಐಗೆ ಸಂದರ್ಶನ ನೀಡಿದ್ದು, ಬಿಟ್‌ಕಾಯಿನ್ ಅತ್ಯಂತ ಅಸ್ಥಿರತೆಗೆ ಕಾರಣವಾಗಬಹುದು ಎಂದು ಹೇಳಿದ್ದಾರೆ. ಈ ವರ್ಷದ ಆರಂಭದಲ್ಲಿ 65 ಸಾವಿರಕ್ಕಿಂತ ಹೆಚ್ಚು ವಹಿವಾಟು ನಡೆಸುತ್ತಿದ್ದ ಬಿಟ್​ ಕಾಯಿನ್​ನ ವಹಿವಾಟು ಈಗ 30 ಸಾವಿರಕ್ಕೆ ಇಳಿಕೆಯಾಗಿದೆ. ಇದು ಹೆಚ್ಚು ಕಡಿಮೆಯಾಗಬಹುದು ಎಂದಿದ್ದಾರೆ.

ಜೊತೆಗೆ ನೀವು ಬಿಟ್​​ಕಾಯಿನ್ ವ್ಯಾಪಾರಿಯಾಗಿದ್ದರೆ, ಬಿಟ್​​ಕಾಯಿನ್​ನಲ್ಲಿ ಹೂಡಿಕೆ ಮಾಡಿದ್ದರೆ ಹೂಡಿದ ಹಣಕಾಸಿನಲ್ಲಿ ಭಾರಿ ಏರಿಳಿತಕ್ಕೆ ಕಾರಣವಾಗಬಹುದು. ಇದು ತುಂಬಾ ಅಸ್ಥಿರತೆಯಿಂದ ಕೂಡಿದೆ ಎಂದು ಟೋಬಿಯಾಸ್ ಆಡ್ರಿಯನ್ ಅಭಿಪ್ರಾಯಪಟ್ಟಿದ್ದಾರೆ.

ಬಿಟ್​ ಕಾಯಿನ್ ಕ್ರಿಪ್ಟೋ ಕರೆನ್ಸಿಯ ಒಂದು ವಿಧವಾಗಿದ್ದು, ಎಥೆರಿಯಮ್, ಬಿನಾನ್ಸ್ ಕಾಯಿನ್, ಕಾರ್ಡಾನೋ, ಟೇಥರ್, ಎಕ್ಸ್​ ಆರ್​ಪಿ, ಡೋಜ್​​ಕಾಯಿನ್, ಪೊಲ್ಕಾಡಾಟ್, ಸೊಲಾನ ಮುಂತಾದ ಕ್ರಿಪ್ಟೋಕರೆನ್ಸಿಗಳು ಜಗತ್ತಿನಲ್ಲಿ ಅಸ್ಥಿತ್ವದಲ್ಲಿವೆ.

ಇದನ್ನೂ ಓದಿ:ಅಬ್ಬಾ ಏನೀ ಸಂಕಷ್ಟ.. ಈ ಗ್ರಾಮಗಳಲ್ಲಿ ಒಂದು KG ಉಪ್ಪಿಗೆ 130 ರೂ..!!