ನವದೆಹಲಿ:ಭಾರತೀಯ ರೈಲ್ವೆಯ ರೈಲ್ವೆಯ ರಕ್ಷಣಾ ಪಡೆಯಲ್ಲಿ (ಆರ್ಪಿಎಫ್) ಖಾಲಿಯಿದ್ದ 10,537 ಹುದ್ದೆಗಳಿಗೆ ದಾಖಲೆಯ 82 ಲಕ್ಷ ಅರ್ಜಿಗಳು ಬಂದಿದ್ದವು. ಇದು ದೇಶದಲ್ಲಿ ನಿರುದ್ಯೋಗ ಸಮಸ್ಯೆಗೆ ಹಿಡಿದ ಕೈಗನ್ನಡಿಯಂತಿದೆ.
ಕಳೆದ ಮೇ ತಿಂಗಳಲ್ಲಿ ಆರಂಭಗೊಂಡಿದ್ದ ಆರ್ಪಿಎಫ್ ವೃಂದದ ವಿವಿಧ ಹುದ್ದೆಗಳ ನೇಮಕಾತಿ ಪ್ರಕ್ರಿಯೆ ಪೂರ್ಣಗೊಂಡಿದೆ. ಕಾನ್ಸ್ಟೆಬಲ್ ವೃಂದದ ವಿಭಾಗದಲ್ಲಿ ಶೇ 50ರಷ್ಟು ಮಹಿಳೆಯರನ್ನು ನೇಮಕ ಮಾಡಿಕೊಳ್ಳಲಾಗಿದೆ. ಒಟ್ಟು 10,537 ಜವಾನ್‌ ಹುದ್ದೆಗಳಲ್ಲಿ 1,120 ಸಬ್ ಇನ್ಸ್ಪೆಕ್ಟರ್, 8,619 ಕಾನ್ಸ್ಟೆಬಲ್ ಮತ್ತು 798 ಸ್ಟಾಪ್ ನೌಕರರನ್ನು ನೇಮಿಸಿಕೊಳ್ಳಲಾಗಿದೆ ಎಂದು ರೈಲ್ವೆ ಅಧಿಕಾರಿಗಳು ತಿಳಿಸಿದ್ದಾರೆ.
ಆರ್ಪಿಎಫ್ನ ವೃಂದದಲ್ಲಿ ಶೇ 2.25ರಷ್ಟು ಮಾತ್ರವೇ ಮಹಿಳಾ ಕಾನ್ಸ್ಟೆಬಲ್ ಇದ್ದರು. ಮಹಿಳೆಯರ ಸಂಖ್ಯೆಯನ್ನು ಹಂತ- ಹಂತವಾಗಿ ಹೆಚ್ಚಿಸಿ ಸ್ತ್ರೀಯರಿಗೆ ಹೆಚ್ಚಿನ ಆದ್ಯತೆ ನೀಡುವುದಾಗಿ ಅಧಿಕಾರಿಗಳು ಈ ಹಿಂದೆ ತಿಳಿಸಿದ್ದರು. ಅದರಂತೆಯೇ ಮಹಿಳೆಯರನ್ನು ಹೆಚ್ಚಿನ ಸಂಖ್ಯೆಯಲ್ಲಿ ನೇಮಿಸಿಕೊಳ್ಳಲಾಗಿದೆ ಎಂದರು.
ಅತಿದೊಡ್ಡ ಆರ್ಪಿಎಫ್ ನೇಮಕಾತಿಯ ರ್ಯಾಲಿಯ 10,537 ಹುದ್ದೆಗಳಿಗೆ ಆಕಾಂಕ್ಷಿಗಳಿಂದ 82 ಲಕ್ಷ ಅರ್ಜಿಗಳನ್ನು ಸ್ವೀಕರಿಸಲಾಗಿತ್ತು. 1,120 ಸಬ್ ಇನ್ಸ್ಪೆಕ್ಟರ್ ಪೋಸ್ಟ್ಗೆ 14.25 ಲಕ್ಷ, ಕಾನ್ಸ್ಟೆಬಲ್ ಹುದ್ದೆಗೆ 59 ಲಕ್ಷ ಅರ್ಜಿ ಬಂದಿದ್ದವು. 8,619 ಕಾನ್ಸ್ಟೆಬಲ್ ಹುದ್ದೆಗಳಲ್ಲಿ 4,216 ಮಹಿಳೆಯರು ಹಾಗೂ 4,403 ಪುರುಷರು ನೇಮಕವಾಗಿದ್ದಾರೆ.
