ಚೀನಾ ಆಮದಿಗೆ ಮತ್ತೊಂದು ಬಿಗ್​ ಬ್ರೇಕ್​: ಸೌರ ವಿದ್ಯುತ್ ಉಪಕರಣ ಮೇಲೆ ಶೇ.20% ಕಸ್ಟಮ್ಸ್ ಸುಂಕ

ಕಳೆದ ಕೆಲವು ವರ್ಷಗಳಲ್ಲಿ ನವೀಕರಿಸಬಹುದಾದ ಇಂಧನ ಕ್ಷೇತ್ರದ ಸಾಮರ್ಥ್ಯ ವೃದ್ಧಿಸಲು ಸರ್ಕಾರ ಹಲವು ಕ್ರಮಗಳನ್ನು ತೆಗೆದುಕೊಂಡಿದೆ. ಸೌರ ಉಪಕರಣ ಮತ್ತು ಘಟಕಗಳ ಆಮದಿನ ಮೇಲಿನ ಅವಲಂಬನೆ, ವಿಶೇಷವಾಗಿ ಚೀನಾದಿಂದ ಕಡಿತಗೊಳಿಸುವ ಸಮಯ ಇದೀಗ ಬಂದಿದೆ ಎಂದು ಕೇಂದ್ರ ಹಣಕಾಸು ಇಲಾಖೆಯ ರಾಜ್ಯ ಸಚಿವ ಅನುರಾಗ್ ಠಾಕೂರ್ ಹೇಳಿದರು.

ನವದೆಹಲಿ: ದೇಶಿಯ ಉತ್ಪಾದಕರಿಗೆ ನೆರವಾಗಲು ಮತ್ತು ಚೀನಾದ ಆಮದಿಗೆ ತಡೆಯೊಡ್ಡಲು ಸೌರ ವಿದ್ಯುತ್​ ಉಪಕರಣಗಳ ಮೇಲೆ ಶೇ.20ರಷ್ಟು ಕಸ್ಟಮ್ಸ್​ ಸುಂಕ ವಿಧಿಸಲಾಗುವುದು ಎಂದು ಕೇಂದ್ರ ಹಣಕಾಸು ಇಲಾಖೆಯ ರಾಜ್ಯ ಸಚಿವ ಅನುರಾಗ್ ಠಾಕೂರ್ ಹೇಳಿದ್ದಾರೆ.

ಶೇ.20ರಷ್ಟು ಕಸ್ಟಮ್ಸ್ ಸುಂಕವನ್ನು ವಿಧಿಸುವ ಹೊಸ ಮತ್ತು ನವೀಕರಿಸಬಹುದಾದ ಇಂಧನ ಸಚಿವಾಲಯದ (ಎಂಎನ್‌ಆರ್‌ಇ) ಪ್ರಸ್ತಾವನೆಯನ್ನು ಕೇಂದ್ರ ಸರ್ಕಾರ ಪರಿಗಣನೆಗೆ ತೆಗೆದುಕೊಳ್ಳಲಿದೆ ಎಂದರು.

ಕಳೆದ ಕೆಲವು ವರ್ಷಗಳಲ್ಲಿ ನವೀಕರಿಸಬಹುದಾದ ಇಂಧನ ಕ್ಷೇತ್ರದ ಸಾಮರ್ಥ್ಯ ವೃದ್ಧಿಸಲು ಸರ್ಕಾರ ಹಲವು ಕ್ರಮಗಳನ್ನು ತೆಗೆದುಕೊಂಡಿದೆ. ಸೌರ ಉಪಕರಣ ಮತ್ತು ಘಟಕಗಳ ಆಮದಿನ ಮೇಲಿನ ಅವಲಂಬನೆ, ವಿಶೇಷವಾಗಿ ಚೀನಾದಿಂದ ಕಡಿತಗೊಳಿಸುವ ಸಮಯ ಇದೀಗ ಬಂದಿದೆ ಎಂದು ಸಚಿವರು ಹೇಳಿದರು.

ಪ್ರಸ್ತುತ, ಚೀನಾದ ಸಂಸ್ಥೆಗಳು ಭಾರತೀಯ ಮಾರುಕಟ್ಟೆಯಲ್ಲಿ ಶೇ.80ರಷ್ಟು ಸೌರ ಕೋಶಗಳು ಮತ್ತು ಮಾಡ್ಯೂಲ್‌ಗಳನ್ನು ಪೂರೈಸುತ್ತವೆ.

ಎಂಎನ್‌ಆರ್‌ಇ ಸೂಚಿಸಿದಂತೆ ಸುಂಕ ವಿಧಿಸಲು ಯೋಜಿಸುತ್ತಿದ್ದೇವೆ. ಅವರು ನಮ್ಮೊಂದಿಗೆ (ಹಣಕಾಸು ಸಚಿವಾಲಯ), ಇತರ ದೇಶಗಳಿಂದ ಆಮದು ಮಾಡಿಕೊಳ್ಳುವುದನ್ನು ತಗ್ಗಿಸಲು ಸೌರ ಮಾಡ್ಯೂಲ್‌ಗಳ ಮೇಲೆ ಶೇ.20ರಷ್ಟು ಕಸ್ಟಮ್ಸ್ ಸುಂಕ ಹೇರಲಾಗುವುದು ಎಂದು ಸಿಐಐ ಆಯೋಜಿಸಿದ್ದ ವೆಬ್‌ನಾರ್​ನಲ್ಲಿ ಮಾಹಿತಿ ನೀಡಿದರು.

2019ರ ಏಪ್ರಿಲ್-ಡಿಸೆಂಬರ್ ಅವಧಿಯಲ್ಲಿ ಭಾರತ 1.2 ಬಿಲಿಯನ್ ಡಾಲರ್ ಮೌಲ್ಯದ ಸೌರ ವಿದ್ಯುತ್ ಉಪಕರಣಗಳನ್ನು ಆಮದು ಮಾಡಿಕೊಂಡಿದೆ ಎಂದು ಠಾಕೂರ್ ಹೇಳಿದರು.