ನವದೆಹಲಿ: ದೇಶಿ ವಾಹನೋದ್ಯಮದಲ್ಲಿನ ಮಾರಾಟ ಕುಸಿತವು ದ್ವಿಚಕ್ರ ವಾಹನಗಳಿಗೂ ತಟ್ಟಿದೆ. ಸಾಲು - ಸಾಲು ಹಬ್ಬಗಳ ಸೀಸನ್ ಮುಂದಿಟ್ಟುಕೊಂಡ ಬಹುತೇಕ ಬೈಕ್ ಕಂಪನಿಗಳು ವಿಶೇಷ ರಿಯಾಯಿತಿ ನೀಡುವ ಮೂಲಕ ಗ್ರಾಹಕರನ್ನು ಸೆಳೆಯುವ ಪ್ರಯತ್ನ ನಡೆಸುತ್ತಿವೆ.
ಟಿವಿಎಸ್ ತನ್ನ ರೇಡಿಯನ್, ವಿಕ್ಟರ್, ಸ್ಪೋರ್ಟ್ ಮತ್ತು ಸ್ಟಾರ್ ಸಿಟಿ ಪ್ಲಸ್ ಮೋಟರ್ ಸೈಕಲ್ಗಳು ಕನಿಷ್ಠ ಮೊತ್ತದ ಡೌನ್ ಪೇಮೆಂಟ್ಗೆ ಸಿಗಲಿವೆ. ಇದರಲ್ಲಿ ಸರ್ಕಾರಿ ನೌಕರರಿಗೆ ಹೆಚ್ಚುವರಿ ಪ್ರಯೋಜನ ಸಹ ಲಭ್ಯವಾಗಲಿದೆ. ಹೀರೋ ಮೋಟಾರ್ಕಾರ್ಪ್ ತನ್ನ 100-125 ಸಿಸಿ ಬೈಕ್ಗಳಾದ ಸ್ಪ್ಲೆಂಡರ್ ಮತ್ತು ಪ್ಯಾಷನ್ ಪ್ರೊನಲ್ಲಿ ₹ 1,500ಯಷ್ಟು ನಗದು ಲಾಭ ನೀಡುತ್ತಿದೆ.
ಹೋಂಡಾ ಮೋಟರ್ ಕಂಪನಿಯು ₹ 8,900ಯಷ್ಟು ಉಳಿತಾಯ ಹಾಗೂ ₹ 1,100 ಕನಿಷ್ಠ ಡೌನ್ ಪೇಮೆಂಟ್ನಂತಹ ಆಫರ್ಗಳನ್ನು ನೀಡುತ್ತಿದೆ. ಅಪಾಚೆ ಆರ್‌ಟಿಆರ್ 160 4-ವಿ ಬೈಕ್ ಮೇಲೆ ₹ 8,800 ಮೌಲ್ಯದ ಐದು ವರ್ಷಗಳ ಉಚಿತ ವಿಮಾ ಸೌಲಭ್ಯ ಒದಗಿಸುತ್ತಿದೆ. ಹೀರೋ, ತನ್ನ ಎಕ್ಸ್ಟ್ರಿಮ್- 200 ಆರ್ ಮತ್ತು ಎಕ್ಸ್ಟ್ರೀಮ್- 200ಎಸ್ ನಂತಹ 200ಸಿಸಿ ಬೈಕ್ಗಳ ಮೇಲೆ ₹ 2,000 ನಗದು ರಿಯಾಯಿತಿ, ₹ 5000 ಎಕ್ಸ್ಚೆಂಜ್ ಮತ್ತು ₹ 4,000 ಕನಿಷ್ಠ ಡೌನ್ ಪೇಮೆಂಟ್ ಪರಿಚಯಿಸಿದೆ.
ಇತ್ತೀಚೆಗೆ ಬಿಡುಗಡೆಯಾದ ಸುಜುಕಿ ಗಿಕ್ಸ್‌ಸರ್ ಎಸ್‌ಎಫ್- 250 ಬೈಕ್ ಝೀರೋ ಡೌನ್ ಪೇಮೆಂಟ್, ಝೀರೋ ಪ್ರೊಸೆಸಿಂಗ್ ಶುಲ್ಕ, ಪ್ರತಿ ಲಕ್ಷ ರೂ. ಸಾಲಕ್ಕೆ ಮಾಸಿಕ ₹ 3,042 ಇಎಂಐ ವಿಧಿಸಲಿದೆ. ಬಜಾಜ್ ಆಟೋ ತನ್ನ ಎಲ್ಲ ಪ್ರಮುಖ ಉತ್ಪನ್ನಗಳ ಮೇಲೆ ₹ 7,200ವರೆಗೆ ಆಫರ್ಗಳನ್ನು ನೀಡುತ್ತಿದೆ.
ಹೋಂಡಾ ಆಕ್ಟಿವಾ 5ಜಿ ಸ್ಕೂಟರ್ ಮೇಲೆ ₹ 11,000 ವರೆಗೆ ರಿಯಾಯಿತಿ ನೀಡುತ್ತಿದೆ. ಕನಿಷ್ಠ ಡೌನ್ ಪೇಮೆಂಟ್ ಮತ್ತು ಪೇಟಿಎಂ ಕ್ಯಾಶ್ಬ್ಯಾಕ್ ಆಫರ್ ಸಹ ಪ್ರಕಟಿಸಿದೆ. ಕವಾಸಾಕಿ ಇಂಡಿಯಾ, ಟ್ರಯಂಫ್ ಮೋಟರ್ ಸೈಕಲ್ಸ್ ಸೇರಿದಂತೆ ಇತರ ಕೆಲವು ದ್ವಿಚಕ್ರ ವಾಹನ ಕಂಪನಿಗಳು ರಿಯಾಯಿತಿ ನೀಡುತ್ತಿವೆ. ಈ ರಿಯಾಯಿತಿಯು ರಾಜ್ಯದಿಂದ ರಾಜ್ಯಕ್ಕೆ ಹಾಗೂ ಜಿಲ್ಲೆಯಿಂದ ಜಿಲ್ಲೆಗಳಿಗೆ ವ್ಯತ್ಯಾಸ ಕಂಡುಬರಲಿದೆ.