ವಿಸ್ತಾರ ಸಂಸ್ಥೆ ಹಿರಿಯ ಸಿಬ್ಬಂದಿಗೆ ವೇತನ ಇಲ್ಲದ ಕಡ್ಡಾಯ ರಜೆ

ಕೋವಿಡ್​-19 ಸಾಂಕ್ರಾಮಿಕ ರೋಗ ಹರಡುವುದನ್ನು ನಿಯಂತ್ರಿಸಲು ಸರ್ಕಾರ ವಿಧಿಸಿರುವ ಲಾಕ್‌ಡೌನ್‌ನಿಂದಾಗಿ ವಿಮಾನಯಾನ ಸಂಸ್ಥೆಗಳು ಪ್ರಸ್ತುತ ಕಾರ್ಯಾಚರಣೆ ಸ್ಥಗಿತಗೊಳಿಸಿವೆ. ಮಾರ್ಚ್ 25 ರಿಂದ ವಿಮಾನ ನಿಲ್ದಾಣ ಸೇವೆ ಬಂದ್​ ಮಾಡಲಾಗಿದೆ.

ನವದೆಹಲಿ: ಮೇ ಮತ್ತು ಜೂನ್ ತಿಂಗಳಲ್ಲಿ ನಾಲ್ಕು ದಿನಗಳವರೆಗೆ ವೇತನವಿಲ್ಲದೇ (ಎಲ್‌ಡಬ್ಲ್ಯೂಪಿ) ಕಡ್ಡಾಯ ರಜೆ ಹೋಗಬೇಕೆಂದು ವಿಸ್ತಾರ ವಿಮಾನಯಾನ ಸಂಸ್ಥೆಯು ತನ್ನ ಹಿರಿಯ ಉದ್ಯೋಗಿಗಳಿಗೆ ಸೂಚಿಸಿದೆ.

ಮೇ ಮತ್ತು ಜೂನ್ 2020ರವರೆಗೆ ಲೆವೆಲ್ 1 'ಎ' ಮತ್ತು 1 'ಬಿ'ಯಲ್ಲಿ ಪೈಲಟ್‌ ಮತ್ತು ಸಿಬ್ಬಂದಿ ಹೊರತುಪಡಿಸಿ ಉಳಿದ ನೌಕರರಿಗೆ ಕಡ್ಡಾಯವಾಗಿ ಯಾವುದೇ ವೇತನ ಇಲ್ಲದೇ ರಜೆ (ಸಿಎನ್‌ಪಿಎಲ್) ಮುಂದುವರಿಸುತ್ತೇವೆ. 4 ಮತ್ತು 5ನೇ ಹಂತದ ಸಿಬ್ಬಂದಿ ತಿಂಗಳಿಗೆ 4 ದಿನಗಳವರೆಗೆ ಸಿಎನ್‌ಪಿಎಲ್, ಹಂತ 2 ಮತ್ತು 3ರಲ್ಲಿನ ಸಿಬ್ಬಂದಿ ತಿಂಗಳಿಗೆ 3 ದಿನಗಳ ಸಿಎನ್‌ಪಿಎಲ್, ಲೆವೆಲ್ 1 'ಸಿ'ಯಲ್ಲಿರುವ ಸಿಬ್ಬಂದಿ ತಿಂಗಳಿಗೆ 1 ದಿನ ಸಿಎನ್‌ಪಿಎಲ್ ಪಡೆಯುವಂತೆ ಸಂಸ್ಥೆಯ ಸಿಇಒ ಲೆಸ್ಲಿ ಥಂಗ್ ತನ್ನ ಉದ್ಯೋಗಿಗಳಿಗೆ ತಿಳಿಸಿದ್ದಾರೆ.

ಮಾರ್ಚ್ 27ರಂದು ಹಿರಿಯ ಉದ್ಯೋಗಿಗಳಿಗೆ ಏಪ್ರಿಲ್ 1-14ರ ನಡುವೆ ಮೂರು ದಿನಗಳವರೆಗೆ ವೇತನವಿಲ್ಲದೇ ಕಡ್ಡಾಯ ರಜೆ ಪರಿಚಯಿಸಿತ್ತು.

2020ರ ಮೇ 17ರವರೆಗೆ ಲಾಕ್‌ಡೌನ್ ವಿಸ್ತರಣೆ ಆಗಿದ್ದು, ನಮ್ಮ ಕಾರ್ಯಾಚರಣೆ ಸೂಚಿತ ದಿನಾಂಕದವರೆಗೆ ಸ್ಥಗಿತಗೊಳ್ಳುತ್ತಲೇ ಇರುತ್ತದೆ. ಆದಾಯವಿಲ್ಲದ ಅವಧಿ ಹೆಚ್ಚಳವಾಗುತ್ತಿದೆ. ನಗದು ಸಂರಕ್ಷಣೆಗೆ ಕಂಪನಿಯು ಎಲ್ಲ ಪ್ರಯತ್ನಗಳನ್ನು ಮಾಡುತ್ತಿದೆ. ಸಿಬ್ಬಂದಿ ವೆಚ್ಚ ಒಳಗೊಂಡಿರುವ ಕಾರ್ಯಾಚರಣೆ ವೆಚ್ಚಗಳನ್ನು ಕಡಿಮೆ ಮಾಡಲು ಹಾಗೂ 4,000ಕ್ಕೂ ಅಧಿಕ ಜನರ ಉದ್ಯೋಗ ರಕ್ಷಿಸಲು ವೇತನವಿಲ್ಲದೇ ಕಡ್ಡಾಯ ರಜೆ ಅನಿವಾರ್ಯವಾಗಿದೆ ಎಂದು ಸಂಸ್ಥೆಯ ವಕ್ತಾರರು ತಿಳಿಸಿದ್ದಾರೆ.