ನವದೆಹಲಿ:ದೇಶದ ಅತಿದೊಡ್ಡ ಸಾರ್ವಜನಿಕ ವಲಯದ ಬ್ಯಾಂಕ್ ಆದ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ (ಎಸ್ಬಿಐ) ಮತ್ತೊಮ್ಮೆ ಠೇವಣಿಗಳ ಮೇಲಿನ ಬಡ್ಡಿ ದರವನ್ನು ಕಡಿತ ಮಾಡಿದೆ.
ಜನವರಿ 10ರಿಂದ ಅನ್ವಯ ಆಗುವಂತೆ ದೀರ್ಘಾವಧಿಯ ₹ 2 ಕೋಟಿವರೆಗಿನ ಉಳಿತಾಯ ಖಾತೆಗಳ ಠೇವಣಿ ಮತ್ತು ಸ್ಥಿರ ಠೇವಣಿಗಳ ಮೇಲಿನ ಬಡ್ಡಿ ದರವನ್ನು ಇಳಿಕೆ ಮಾಡಿದೆ. ಈ ಹಿಂದೆ ಆರ್ಬಿಐ ರೆಪೋ ದರ ತಗ್ಗಿಸಿದ್ದ ತತ್ಪರಿಣಾಮ ಅದಕ್ಕೆ ಅನ್ವಯವಾಗುವಂತೆ ಬಡ್ಡಿ ದರಗಳನ್ನು ಎಸ್ಬಿಐ ಕೂಡ ಇಳಿಕೆ ಮಾಡಿತ್ತು.
ಚಿಲ್ಲರೆ ದೀರ್ಘಾವಧಿ ಠೇವಣಿ ಮೇಲಿನ ಬಡ್ಡಿ ದರ 15 ಬೇಸಿಸ್ ಪಾಯಿಂಟ್ಗಳಷ್ಟು ಇಳಿಕೆ ಮಾಡಿದೆ. ಒಂದು ವರ್ಷದಿಂದ 10 ವರ್ಷದವರೆಗಿನ ನಿಶ್ಚಿತ ಠೇವಣಿಗಳ ಮೇಲಿನ ಬಡ್ಡಿ ದರವನ್ನು ಶೇ 6.25ರಿಂದ ಶೇ 6.10ಕ್ಕೆ ತಗ್ಗಿಸಲಾಗಿದೆ ಎಂದು ತನ್ನ ವೆಬ್ಸೈಟ್ನಲ್ಲಿ ತಿಳಿಸಿದೆ.
7 ದಿನದಿಂದ 45 ದಿನದವರೆಗೆ ಹಾಗೂ 469 ದಿನಗಳಿಂದ 179 ದಿನಗಳವರೆಗಿನ ನಿಶ್ಚಿತ ಠೇವಣಿ ಮೇಲೆ ಕ್ರಮವಾಗಿ ಶೇ 4.50ರಷ್ಟು ಮತ್ತು ಶೇ 5.50ರಷ್ಟು ಬಡ್ಡಿ ನಿಗದಿಪಡಿಸಿದೆ. 180 ದಿನಗಳಿಂದ 1 ವರ್ಷದವರೆಗಿನ ಠೇವಣಿಯ ಮೇಲೆ ಶೇ 5.80ರಷ್ಟು ಹಾಗೂ ಹಿರಿಯ ನಾಗರಿಕರಿಗೆ 50 ಬೇಸಿಸ್ ಪಾಯಿಂಟ್ಗಳ ಬಡ್ಡಿಯ ಕೊಡಿಗೆ ನೀಡಿದೆ.
