ನವದೆಹಲಿ: ದೇಶದ ಅತಿದೊಡ್ಡ ಸಾಲದಾತ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ (ಎಸ್ಬಿಐ)ನ ಎಲ್ಲಾ ಉಳಿತಾಯ ಖಾತೆಗಳ (ಎಸ್ಬಿ) ಬಡ್ಡಿದರವನ್ನು ಶೇ. 3ಕ್ಕೆ ತರ್ಕಬದ್ಧಗೊಳಿಸಿದ್ದು, 44.51 ಕೋಟಿ ಖಾತೆದಾರರ ಮೇಲೆ ಪರಿಣಾಮ ಬೀರಲಿದೆ.
ಎಸ್ಬಿ ಖಾತೆಗಳ ಕನಿಷ್ಠ ಮೊತ್ತ ತೆಗೆದು ಹಾಕಿ ಎಸ್ಎಂಎಸ್ ಶುಲ್ಕವನ್ನು ಮನ್ನಾ ಮಾಡಲಾಗಿದೆ ಎಂದು ಬ್ಯಾಂಕ್ ಹೇಳಿದೆ.
ಉಳಿತಾಯ ಖಾತೆಗಳ (ಎಸ್ಬಿ) ಮೇಲೆ ಶೇ. 3ರಷ್ಟು ಬಡ್ಡಿದರ ವಿಧಿಸಲಾಗುವುದು. ಪ್ರಸ್ತುತ 1 ಲಕ್ಷ ರೂ.ವರೆಗಿನ ಎಸ್ಬಿ ಖಾತೆಗಳ ಮೇಲಿನ ಬಡ್ಡಿದರ ಶೇ. 3.25ರಷ್ಟಿದೆ. 1 ಲಕ್ಷ ರೂ.ಗೂ ಮೇಲ್ಪಟ್ಟ ಖಾತೆಗಳ ಬಡ್ಡಿಯು ಶೇ. 3ರಷ್ಟಿದೆ. ಇನ್ನು ಮುಂದೆ ಎಲ್ಲ ವಿಧದ ಎಸ್ಬಿ ಖಾತೆಗಳಿಗೆ ಏಕರೂಪದ ಬಡ್ಡಿದರ ಅನ್ವಯವಾಗಲಿದೆ.
ಎಲ್ಲ ಎಸ್ಬಿ ಖಾತೆದಾರರ ಮಾಸಿಕ ಕನಿಷ್ಠ ಉಳಿತಾಯವನ್ನು (ಎಎಂಬಿ) ಮನ್ನಾ ಮಾಡಲು ನಿರ್ಧರಿಸಲಾಗಿದೆ. ಇದು ಬ್ಯಾಂಕ್ನ 45.51 ಕೋಟಿ ಗ್ರಾಹಕರ ಮೇಲಿನ ಹೊರೆಯನ್ನು ತಗ್ಗಿಸಲಿದೆ. ಮೆಟ್ರೋ, ಅರೆ ನಗರ ಹಾಗೂ ಗ್ರಾಮೀಣ ಭಾಗದ ಗ್ರಾಹಕರು ಎಎಂಬಿ ಪ್ರಮಾಣ ಕ್ರಮವಾಗಿ ₹ 3,000, ₹ 2,000 ಹಾಗೂ ₹ 1,000 ಇರಿಸಬೇಕಿತ್ತು. ಕನಿಷ್ಠ ಠೇವಣಿ ಇರಿಸದ್ದಕ್ಕೆ ₹ 5 ರಿಂದ ₹ 15 ದಂಡದ ಜತೆಗೆ ತೆರಿಗೆ ಕೂಡ ಹಾಕಲಾಗುತ್ತಿತ್ತು. ಆದ್ರೆ ಈ ಎಲ್ಲ ಶುಲ್ಕಗಳನ್ನು ತೆಗೆದುಹಾಕಲಾಗಿದೆ.
