ಮುಂಬೈ:ಜಿಯೋ ಪ್ಲಾಟ್‌ಫಾರ್ಮ್‌ಗಳಲ್ಲಿ ಶೇ7.7ರಷ್ಟು ಪಾಲು ಪಡೆಯಲು ಗೂಗಲ್ 33,737 ಕೋಟಿ ರೂ. ಹೂಡಿಕೆ ಮಾಡಲಿದೆ ಎಂದು ರಿಲಯನ್ಸ್ ಇಂಡಸ್ಟ್ರೀಸ್ ಮುಖ್ಯಸ್ಥ ಮುಖೇಶ್ ಅಂಬಾನಿ ಹೇಳಿದ್ದಾರೆ.
ರಿಲಯನ್ಸ್ ಇಂಡಸ್ಟ್ರೀಸ್ ತನ್ನ ಮೊದಲ ಆನ್‌ಲೈನ್ ವಾರ್ಷಿಕ ಸಾಮಾನ್ಯ ಸಭೆ (ಎಜಿಎಂ) ಬುಧವಾರ ನಡೆಸಿದ್ದು, 500 ಸ್ಥಳಗಳಿಂದ 1 ಲಕ್ಷಕ್ಕೂ ಅಧಿಕ ಷೇರುದಾರರನ್ನು ಏಕಕಾಲದಲ್ಲಿ ಭಾಗವಹಿಸಿದ್ದಾರೆ. ನೂತನ ವರ್ಚುವಲ್ ಪ್ಲಾಟ್‌ಫಾರ್ಮ್‌ ಜತೆಗೆ ಅತಿ ದೊಡ್ಡ ವ್ಯವಹಾರಿಕ ಸಭೆ ಇದಾಗಿದೆ.
43ನೇ ವಾರ್ಷಿಕ ಸಭೆಯಲ್ಲಿ ಮಾತನಾಡಿದ ಆರ್ಐಎಲ್ ಮುಖ್ಯಸ್ಥ, ರಿಲಯನ್ಸ್ ಈಗ ಶೂನ್ಯ ನಿವ್ವಳ ಸಾಲ ಕಂಪನಿಯಾಗಿದೆ. ಜಿಯೋ ಆರಂಭದಿಂದಲೂ 5ಜಿ ಸೇವೆಯನ್ನು ಅಭಿವೃದ್ಧಿಗೆ ರಿಲಯನ್ಸ್ ಯತ್ನಿಸುತ್ತಿದೆ. ಇದು ಭಾರತದಲ್ಲಿ ವಿಶ್ವ ದರ್ಜೆಯ 5ಜಿ ಸೇವೆಯನ್ನು ಪ್ರಾರಂಭಿಸಲು ಅನುವು ಮಾಡಿಕೊಡುತ್ತದೆ. ಈ ಸೇವೆಗಳ ಪ್ರಯೋಗಗಳು ಶೀಘ್ರದಲ್ಲೇ ಪ್ರಾರಂಭವಾಗಲಿದ್ದು, ಮುಂದಿನ ವರ್ಷದ ವೇಳೆಗೆ ನಿಯೋಜನೆಗೆ ಸಿದ್ಧವಾಗಲಿದೆ ಎಂದು ಭರವಸೆ ನೀಡಿದರು.
14ನೇ ಜಾಗತಿಕ ಒಪ್ಪಂದ :ಗೂಗಲ್ ಜತೆಗಿನ ಒಪ್ಪಂದ ಮೂಲಕ ಜಿಯೋ ಸಂಸ್ಥೆ ಜಾಗತಿಕ ಒಟ್ಟು 14 ಕಂಪನಿಗಳು ಹೂಡಿಕೆಯ ಒಪ್ಪಂದ ಮಾಡಿಕೊಂಡಂತೆ ಆಗಿದೆ. ಫೇಸ್ಬುಕ್- 43,573.62 ಕೋಟಿ ರೂ., ಸಿಲ್ವರ್ ಲೇಕ್ ಪಾಟ್ನರ್ಸ್- 6,655.75 ಕೋಟಿ ರೂ., ವಿಸ್ಟಾ ಈಕ್ವಿಟಿ ಪಾಟ್ನರ್ಸ್-11,367 ಕೋಟಿ ರೂ., ಜನರಲ್ ಅಟ್ಲಾಂಟಿಕ್- 6,598.38 ಕೋಟಿ ರೂ., ಕೆಕೆಆರ್- 11,367 ಕೋಟಿ ರೂ., ಮುಬದಲಾ- 9,093.60 ಕೋಟಿ ರೂ., ಸಿಲ್ವರ್ ಲೇಕ್ ಪಾಟ್ನರ್ಸ್ 2ನೇ ಹೂಡಿಕೆ- 4,546.80 ಕೋಟಿ ರೂ., ಅಬುಧಾಬಿ ಇನ್ವೆಸ್ಟ್ಮೆಂಟ್ ಅಥಾರಿಟಿ- 5,683.50 ಕೋಟಿ ರೂ., ಟಿಪಿಜಿ- 4,546.80 ಕೋಟಿ ರೂ., ಎಲ್ ಕಾಟರ್ಟನ್- 1,894.50 ಕೋಟಿ ರೂ., ಪಿಐಎಫ್- 11,367ಕೋಟಿ ರೂ., ಇಂಟೆಲ್ ಕ್ಯಾಪಿಟಲ್- 1,894.50 ಕೋಟಿ ರೂ., ಕ್ವಾಲ್ಕಾಮ್ ವೆಂಚರ್ಸ್- 730 ಕೋಟಿ ರೂ ಹಾಗೂ ಇತ್ತೀಚಿನ ಗೂಗಲ್ ಸಂಸ್ಥೆ 33,737 ಕೋಟಿ ರೂ. ಹೂಡಿಕೆ ಮಾಡಲಿದೆ.
