ಮುಂಬೈ: ಜಗತ್ತಿನ ಎಲ್ಲ ರಾಷ್ಟ್ರಗಳನ್ನು ಬೆಂಬಿಡದೆ ಕಾಡುತ್ತಿರುವ ಕೊರೊನಾ ವೈರಸ್, ರಿಲಾಯನ್ಸ್ ಇಂಡಸ್ಟ್ರೀಸ್ ಲಿಮಿಟೆಡ್ನ ಉದ್ಯಮ ದಿಗ್ಗಜ ಮುಖೇಶ್ ಅಂಬಾನಿ ಖಜಾನೆಗೂ ಲಗ್ಗೆ ಇಟ್ಟಿದೆ.
ಗುರುವಾರದ ವಹಿವಾಟಿನಂದು ರಿಲಾಯನ್ಸ್ ಇಂಡಸ್ಟ್ರೀಸ್ ಷೇರು ಮೌಲ್ಯದಲ್ಲಿ ಶೇ 9ರಷ್ಟು ಇಳಿಕೆಯಾಗಿದೆ. ಈ ದರವು ಕಳೆದ 52 ವಾರಗಳಲ್ಲಿ ಅತ್ಯಂತ ಕನಿಷ್ಠ ಮಟ್ಟದ್ದಾಗಿದೆ.
ಮಧ್ಯಾಹ್ನ 12.32ರ ವೇಳೆಗೆ ಷೇರು ಮೌಲ್ಯದಲ್ಲಿ ಶೇ 5.83ರಷ್ಟು ಕುಸಿದು ₹ 1,086ಕ್ಕೆ ತಲುಪಿತು. ಇದು ಕಳೆದ 52 ವಾರಗಳಲ್ಲಿನ ತೀರಾ ಕೆಳಮಟ್ಟದ ದರವಾಗಿದೆ.
ಪ್ರಸಕ್ತ ಕ್ಯಾಲೆಂಡರ್ ವರ್ಷದಲ್ಲಿ ಒಟ್ಟಾರೆ ಷೇರು ಮೌಲ್ಯದ ಕುಸಿತವು ಶೇ 28ರಷ್ಟಿದ್ದು, 15 ಬಿಲಿಯನ್ ಡಾಲರ್ನಷ್ಟು (₹ 1.11 ಲಕ್ಷ ಕೋಟಿ) ಸಂಪತ್ತನ್ನು ಮುಖೇಶ್ ಅಂಬಾನಿ ಕಳೆದುಕೊಂಡಿದ್ದಾರೆ. ಕಳೆದ ಎರಡು ದಿನಗಳ ಹಿಂದೆಯಷ್ಟು ಏಷ್ಯಾದ ಶ್ರೀಮಂತ ಉದ್ಯಮಿ ಎಂಬ ಹಣೆಪಟ್ಟಿಯನ್ನು ಚೀನಾದ ಉದ್ಯಮಿ ಜಾಕ್ ಮಾ ಅವರಿಗೆ ಬಿಟ್ಟುಕೊಟ್ಟರು.
