ನವದೆಹಲಿ: ಬಿಲಿಯನೇರ್ ಮುಖೇಶ್ ಅಂಬಾನಿ ಒಡೆತನದ ರಿಲಯನ್ಸ್ ಇಂಡಸ್ಟ್ರೀಸ್ನಲ್ಲಿ 1.61 ಲಕ್ಷ ಕೋಟಿ ರೂ. ನಿವ್ವಳ ಸಾಲವಿದ್ದು, ತನ್ನ ಪ್ರಮುಖ ವ್ಯವಹಾರಗಳಲ್ಲಿ ಕಾರ್ಯತಂತ್ರದ ಹೂಡಿಕೆದಾರರನ್ನು ಕರೆತರುವ ಮೂಲಕ ಅದನ್ನು ಶೂನ್ಯಕ್ಕೆ ತಗ್ಗಿಸುವ ಗುರಿ ಇರಿಸಿಕೊಂಡಿದೆ.
ರಿಲಯನ್ಸ್ ಇಂಡಸ್ಟ್ರೀಸ್ ಲಿಮಿಟೆಡ್ನ (ಆರ್ಐಎಲ್) ಅಧ್ಯಕ್ಷ ಮಖೇಶ್ ಅಂಬಾನಿ ಕಳೆದ ವರ್ಷ ಆಗಸ್ಟ್ನಲ್ಲಿ, 'ತೈಲದಿಂದ ದೂರಸಂಪರ್ಕ ಸಂಘಟನೆವರೆಗಿನ ವಹಿವಾಟನ್ನು ನಿವ್ವಳ ಸಾಲ ಮುಕ್ತವಾಗಿಸಲು 2021ರ ಮಾರ್ಚ್ ತಿಂಗಳ ತನಕ ಗುರಿ ನಿಗದಿಪಡಿಸಿಕೊಂಡಿದ್ದಾಗಿ' ಹೇಳಿದ್ದರು.
ಫೇಸ್‌ಬುಕ್‌ನೊಂದಿಗಿನ 5.7 ಬಿಲಿಯನ್ ಡಾಲರ್ (43,547 ಕೋಟಿ ರೂ.) ಒಪ್ಪಂದ ಹಾಗೂ 53,125 ಕೋಟಿ ರೂ. ಹಕ್ಕುಗಳ ವಿತರಣೆ ಮತ್ತು ಸೌದಿ ಅರಾಮ್ಕೊ ಕಂಪನಿಗಳಿಗೆ ಹೆಚ್ಚಿನ ಪಾಲು ಮಾರಾಟದಿಂದ ಡಿಸೆಂಬರ್ ವೇಳೆಗೆ ಈ ಗುರಿ ಸಾಧಿಸುವ ಸಾಧ್ಯತೆಯಿದೆ.
2020ರ ಕ್ಯಾಲೆಂಡರ್ ವರ್ಷದೊಳಗೆ ಶೂನ್ಯ ನಿವ್ವಳ ಸಾಲ ಗುರಿಯನ್ನು ಸಾಧಿಸಲಾಗುವುದು. ಜೂನ್ ವೇಳೆಗೆ ಒಟ್ಟು 1.04 ಲಕ್ಷ ಕೋಟಿ ರೂ. ಬಂಡವಾಳ ಸಂಗ್ರಹಿಸುವ ಯೋಜನೆ ಪೂರ್ಣಗೊಳಿಸುವ ನಿರೀಕ್ಷೆಯಿದೆ ಎಂದು ಆರ್ಐಎಲ್ನ ಜಂಟಿ ಮುಖ್ಯ ಹಣಕಾಸು ಅಧಿಕಾರಿ ಶ್ರೀಕಾಂತ್ ವೆಂಕಟಾಚಾರಿ ಪ್ರಕಟಣೆಯಲ್ಲಿ ಹೇಳಿದರು.
ರಿಲಯನ್ಸ್ ತನ್ನ ತೈಲದಿಂದ ರಾಸಾಯನಿಕ ವ್ಯವಹಾರ ಮರು ಮೌಲ್ಯೀಕರಿಸುತ್ತದೆ. ಇದರಲ್ಲಿ ಗುಜರಾತ್‌ನ ಜಾಮ್ನಗರದಲ್ಲಿ ಸಂಸ್ಕರಣಾಗಾರಗಳು, ಪೆಟ್ರೋಕೆಮಿಕಲ್ ಆಸ್ತಿ, ವಾಹನ ಇಂಧನ ಮತ್ತು ಜೆಟ್ ಇಂಧನದ ಚಿಲ್ಲರೆ ವ್ಯಾಪಾರದಲ್ಲಿ ಶೇ 51ರಷ್ಟು ಪಾಲಿನ 75 ಬಿಲಿಯನ್ ಡಾಲರ್ ಒಳಗೊಂಡಿದೆ. ಈ ಉದ್ಯಮದಲ್ಲಿ ಶೇ 20ರಷ್ಟು ಪಾಲು ಖರೀದಿಸಲು ಸೌದಿ ಅರಾಮ್ಕೊ ಮಾತುಕತೆ ನಡೆಸುತ್ತಿದೆ.