ಫೋರ್ಬ್ಸ್ ಬಿಲಿಯನೇರ್​ ಪಟ್ಟಿ; ಜೆಫ್ ಬೆಜೋಸ್​ ನಂ.1 ಸ್ಥಾನ ಅಬಾಧಿತ

34ನೇ ವಾರ್ಷಿಕ ಫೋರ್ಬ್ಸ್​ ಬಿಲಿಯನೇರ್​ಗಳ ಪಟ್ಟಿಯಲ್ಲಿ ಅಮೆಜಾನ್​ ಸಂಸ್ಥಾಪಕ ಹಾಗೂ ಸಿಇಓ ಜೆಫ್ ಬೆಜೋಸ್ ವಿಶ್ವದ ನಂ.1 ಶ್ರೀಮಂತ ವ್ಯಕ್ತಿಯಾಗಿ ಮುಂದುವರೆದಿದ್ದಾರೆ. ಜೆಫ್​ ಬೆಜೋಸ್​ ಅವರ ಮಾಜಿ ಪತ್ನಿಯೂ ಈ ಬಾರಿ ಫೋರ್ಬ್ಸ್​ ಶ್ರೀಮಂತರ ಪಟ್ಟಿಗೆ ಸೇರ್ಪಡೆಯಾಗಿದ್ದು, ಕುತೂಹಲ ಮೂಡಿಸಿದೆ.

ಹೊಸದಿಲ್ಲಿ: ಕೋವಿಡ್​-19 ನಿಂದಾಗಿ ವಿಶ್ವಾದ್ಯಂತ ಲಾಕ್​ಡೌನ್​ ಇದ್ದರೂ ಅಮೆಜಾನ್ ಸಂಸ್ಥಾಪಕ ಹಾಗೂ ಸಿಇಒ ಜೆಫ್​ ಬೆಜೋಸ್​ ಫೋರ್ಬ್ಸ್​ ಬಿಲಿಯನೇರ್​ಗಳ ಪಟ್ಟಿಯಲ್ಲಿ ನಂ.1 ಸ್ಥಾನದಲ್ಲಿ ಮುಂದುವರೆದಿದ್ದಾರೆ. ಇತ್ತೀಚಿನ 34ನೇ ವಾರ್ಷಿಕ ಫೋರ್ಬ್ಸ್​ ಜಾಗತಿಕ ಬಿಲಿಯನೇರ್​ಗಳ ಪಟ್ಟಿಯ ಪ್ರಕಾರ 113 ಬಿಲಿಯನ್​ ಡಾಲರ್​ ಸಂಪತ್ತು ಹೊಂದಿರುವ ಜೆಫ್​ ಬೆಜೋಸ್​ ವಿಶ್ವದ ನಂ.1 ಶ್ರೀಮಂತರಾಗಿದ್ದಾರೆ. ಇವರ ನಂತರದ ಸ್ಥಾನದಲ್ಲಿ 98 ಬಿಲಿಯನ್​ ಡಾಲರ್ ಸಂಪತ್ತು ಹೊಂದಿರುವ ಬಿಲ್ ಗೇಟ್ಸ್ ಇದ್ದಾರೆ.

76 ಬಿಲಿಯನ್​ ಡಾಲರ್​ ಸಂಪತ್ತು ಹೊಂದಿರುವ ಎಲ್​ವಿಎಂಎಚ್​ ಸಿಇಒ ಮತ್ತು ಚೇರಮನ್ ಬರ್ನಾರ್ಡ್​ ಆರ್ನಾಲ್ಟ್​ ಪಟ್ಟಿಯಲ್ಲಿ ಮೂರನೇ ಸ್ಥಾನಕ್ಕೇರಿದ್ದಾರೆ. 67.5 ಬಿಲಿಯನ್​ ಡಾಲರ್​ ಸಂಪತ್ತಿನ ಒಡೆಯ ವಾರೆನ್​ ಬಫೆಟ್​ ನಾಲ್ಕನೇ ಸ್ಥಾನದಲ್ಲಿದ್ದಾರೆ.

ಜೆಫ್​ ಬೆಜೋಸ್​ ಅವರ ಮಾಜಿ ಪತ್ನಿ ಮೆಕೆಂಜಿ ಬೆಜೋಸ್​ ಈ ಬಾರಿ ಫೋರ್ಬ್ಸ್​ ಪಟ್ಟಿಯಲ್ಲಿ ಸ್ಥಾನ ಪಡೆದಿರುವುದು ಅಚ್ಚರಿ ಮೂಡಿಸಿದೆ. 36 ಬಿಲಿಯನ್​ ಡಾಲರ್​ ಸಂಪತ್ತಿನ ಒಡತಿಯಾದ ಮಕೆಂಜಿ 22ನೇ ಸ್ಥಾನದಲ್ಲಿದ್ದಾರೆ.

ಇನ್ನುಳಿದಂತೆ ಒರಾಕಲ್ ಸ್ಥಾಪಕ ಹಾಗೂ ಸಿಇಒ ಲ್ಯಾರಿ ಎಲಿಸನ್ (59 ಬಿಲಿಯನ್ ಡಾಲರ್) ವಿಶ್ವದ 5ನೇ ಅತಿ ದೊಡ್ಡ ಶ್ರೀಮಂತರೆನಿಸಿದ್ದಾರೆ. ಕಳೆದ ವರ್ಷ ವಿಶ್ವದ ಎಲ್ಲ ಬಿಲಿಯನೇರ್​ಗಳ ಒಟ್ಟು ಸಂಪತ್ತು 8.7 ಟ್ರಿಲಿಯನ್​ ಡಾಲರ್​ಗಳಷ್ಟಿತ್ತು. ಈ ಬಾರಿ ಇವರ ಒಟ್ಟು ಸಂಪತ್ತು ಕುಸಿದಿದ್ದು 8 ಟ್ರಿಲಿಯನ್​ ಡಾಲರ್​ಗಳಿಗೆ ಇಳಿದಿದೆ.