ನವದೆಹಲಿ:ಹುರುನ್ 2021ರ ಜಾಗತಿಕ ಶ್ರೀಮಂತರ ಪಟ್ಟಿಯಲ್ಲಿ ಟೆಸ್ಲಾದ ಎಲೋನ್ ಮಸ್ಕ್ ಅಗ್ರ ಸ್ಥಾನದಲ್ಲಿದ್ದಾರೆ.
ಮಂಗಳವಾರ ಬಿಡುಗಡೆಯಾದ 10ನೇ ಆವೃತ್ತಿಯ ಹುರುನ್ ಗ್ಲೋಬಲ್ ರಿಚ್ಲಿಸ್ಟ್ 2021ರ ಪಟ್ಟಿಗೆ ವಾರದಲ್ಲಿ 8 ಬಿಲಿಯನೇರ್ ಸೇರ್ಪಡೆಯಾಗಿದ್ದು 2020ರ ವರ್ಷದಲ್ಲಿ 421 ಕಬೇರರು ಒಳಸೇರಿ ಆಗರ್ಭ ಸಿರಿವಂತರ ಸಂಖ್ಯೆ 3,288ಕ್ಕೇರಿದೆ.
ಕೋವಿಡ್-19 ಸಾಂಕ್ರಾಮಿಕ ರೋಗದ ಹೊರತಾಗಿಯೂ, ಪರಿಶೀಲನೆಯ ಅವಧಿಯಲ್ಲಿ ವಿಶ್ವದಾದ್ಯಂತದ ಎಲ್ಲಾ ಬಿಲಿಯನೇರ್‌ಗಳ ಒಟ್ಟು ಸಂಪತ್ತು ಶೇ 32ರಷ್ಟು ಏರಿಕೆಯಾಗಿ 14.7 ಟ್ರಿಲಿಯನ್‌ಗೆ ತಲುಪಿದೆ.
ಕೋಟ್ಯಾಧಿಪತಿಗಳು ಕಳೆದ ವರ್ಷ ಜರ್ಮನಿ ಜಿಡಿಪಿ ಸಮಾನಾಗಿ ಸಂಪತ್ತು ಗಳಿಸಿಕೊಂಡಿದ್ದು, ಒಟ್ಟಾರೆ ಸಂಪತ್ತು ಚೀನಾದ ದೇಶೀಯ ಉತ್ಪನ್ನಕ್ಕೆ ಸರಿಸಮಾನಾಗಿದೆ. 14.7 ಟ್ರಿಲಿಯನ್ ಡಾಲರ್ ಸಂಪತ್ತಿಗೆ ಹೊಸದಾಗಿ 3.5 ಟ್ರಿಲಿಯನ್ ಡಾಲರ್ ಸೇರಿಸಿಕೊಂಡಿದ್ದಾರೆ. ಇದು ಆರ್ಥಿಕ ಶಕ್ತಿಯ ದೊಡ್ಡ ಸಾಂದ್ರತೆಯಾಗಿದೆ ಎಂದು ವರದಿ ಹೇಳಿದೆ. ಹುರುನ್ ಗ್ಲೋಬಲ್ ರಿಚ್ ಲಿಸ್ಟ್ 2021ಯಲ್ಲಿ 68 ದೇಶಗಳ 2,402 ಕಂಪನಿಗಳ 3,228 ಬಿಲಿಯನೇರ್‌ಗಳು ಇದ್ದಾರೆ.
ಟೆಸ್ಲಾದ ಎಲೋನ್ ಮಸ್ಕ್ ಒಂದೇ ವರ್ಷದಲ್ಲಿ 151 ಬಿಲಿಯನ್ ಡಾಲರ್ ಸಂಪತ್ತು ಗಳಿಸಿದ್ದಾರೆ. ಮೊದಲ ಬಾರಿಗೆ ವಿಶ್ವದ ಅತ್ಯಂತ ಶ್ರೀಮಂತ ವ್ಯಕ್ತಿಯಾಗಿ 197 ಬಿಲಿಯನ್ ಡಾಲರ್ ನಿವ್ವಳ ಮೌಲ್ಯ ಹೊಂದಿದ್ದಾರೆ. ಅಮೆಜಾನ್ ಇಂಕ್ ಸಹ-ಸಂಸ್ಥಾಪಕ ಜೆಫ್ ಬೆಜೋಸ್ 189 ಬಿಲಿಯನ್ ಡಾಲರ್ ನಿವ್ವಳ ಮೌಲ್ಯದೊಂದಿಗೆ 2ನೇ ಸ್ಥಾನದಲ್ಲಿದ್ದಾರೆ. ವಿಶ್ವದ ಅತಿದೊಡ್ಡ ಐಷಾರಾಮಿ ಸರಕುಗಳ ಕಂಪನಿ ಲೂಯಿ ವಿಟಾನ್ ಸಿಇಒ ಬರ್ನಾರ್ಡ್ ಅರ್ನಾಲ್ಟ್ 114 ಬಿಲಿಯನ್ ಡಾಲರ್ ಮುಖೇನ ಜಾಗತಿಕವಾಗಿ ಮೂರನೇ ಸ್ಥಾನದಲ್ಲಿದ್ದಾರೆ. ಬಿಲ್ ಗೇಟ್ಸ್ (ಮೈಕ್ರೋಸಾಫ್ಟ್) ಮತ್ತು ಮಾರ್ಕ್ ಜುಕರ್‌ಬರ್ಗ್ (ಫೇಸ್‌ಬುಕ್) ನಂತರದ ಸ್ಥಾನದಲ್ಲಿದ್ದಾರೆ.
ಕೋವಿಡ್ -19ನಿಂದ ಉಂಟಾದ ಅಡ್ಡಿಗಳ ಹೊರತಾಗಿಯೂ ಈ ವರ್ಷ ಕಳೆದ ದಶಕದ ಅತಿದೊಡ್ಡ ಸಂಪತ್ತಿನ ಹೆಚ್ಚಳ ಕಂಡಿದೆ. ಸ್ಟಾಕ್ ಮಾರುಕಟ್ಟೆಯ ಉತ್ತುಂಗವು ಕಳೆದ ವರ್ಷ ವಾರಕ್ಕೆ ಎಂಟು ಹೊಸ ಡಾಲರ್ ಶತಕೋಟ್ಯಾಧಿಪತಿಗಳನ್ನು ಸೃಜಿಸಿದೆ ಎಂದು ಹುರುನ್ ವರದಿಯ ಅಧ್ಯಕ್ಷ ಮತ್ತು ಮುಖ್ಯ ಸಂಶೋಧಕ ರೂಪರ್ಟ್ ಹೂಗೆವರ್ಫ್ ಹೇಳಿದ್ದಾರೆ.
ಇದನ್ನೂ ಓದಿ: ಪ್ರತಿ 10 ಗ್ರಾಂ. ಚಿನ್ನದ ದರದಲ್ಲಿ 11,901 ರೂ. ಕುಸಿತ!