ನವದೆಹಲಿ :ಕೇಂದ್ರ ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವಾಲಯ ತನ್ನ ಹೊಸ ಗೌಪ್ಯತೆ ನೀತಿ ಹಿಂತೆಗೆದುಕೊಳ್ಳುವಂತೆ ಫೇಸ್‌ಬುಕ್ ಒಡೆತನದ ವಾಟ್ಸ್ಆ್ಯಪ್ಗೆ ನಿರ್ದೇಶನ ನೀಡಿದೆ.
ಐಟಿ ಸಚಿವಾಲಯವು ತನ್ನ ಹೊಸ ಗೌಪ್ಯತೆ ನೀತಿಯನ್ನು ಹಿಂತೆಗೆದುಕೊಳ್ಳುವಂತೆ ವಾಟ್ಸ್ಆ್ಯಪ್ಗೆ ನಿರ್ದೇಶನ ನೀಡಿದೆ ಎಂದು ಸರ್ಕಾರದ ಮೂಲಗಳನ್ನು ಉಲ್ಲೇಖಿಸಿ ಪಿಟಿಐ ವರದಿ ಮಾಡಿದೆ.
ವಾಟ್ಸ್‌ಆ್ಯಪ್ ಗೌಪ್ಯತೆ ನೀತಿ ಬದಲಾವಣೆಗಳು ಗೌಪ್ಯತೆ, ದತ್ತಾಂಶ ಸುರಕ್ಷತೆಯ ಮೌಲ್ಯಗಳನ್ನು ಹಾಳು ಮಾಡುತ್ತದೆ. ಭಾರತೀಯ ನಾಗರಿಕರ ಹಕ್ಕುಗಳಿಗೆ ಹಾನಿ ಮಾಡುತ್ತದೆ ಎಂದು ಸರ್ಕಾರ ಅಭಿಪ್ರಾಯಪಟ್ಟಿದೆ ಎಂದು ವರದಿ ತಿಳಿಸಿದೆ.
ಹಿಂದಿನ ಪಿಟಿಐ ವರದಿಯ ಪ್ರಕಾರ, ಸರ್ಕಾರವು ವಾಟ್ಸ್‌ಆ್ಯಪ್ ಹೊಸ ಗೌಪ್ಯತೆ ನಿಯಮಗಳ ಸುತ್ತಲೂ ಸಾಧ್ಯವಾದಷ್ಟು ಉತ್ತಮವಾದ ಆಯ್ಕೆಗಳನ್ನು ನೋಡುತ್ತಿದೆ. ಸಚಿವಾಲಯವು ಈ ಸಮಸ್ಯೆಯನ್ನು ಅರಿತುಕೊಂಡಿದೆ. ಇಂದು, ಜರ್ಮನಿ ವಾಟ್ಸ್‌ಆ್ಯಪ್ನ ಈ ಗೌಪ್ಯತೆ ನೀತಿಯನ್ನು ನಿಷೇಧಿಸಿದೆ.
ಇದರ ಬಗ್ಗೆ ನಾವು ಏನು ಮಾಡಬಹುದೆಂದು ಸಚಿವಾಲಯವು ಪೂರ್ವಭಾವಿಯಾಗಿ ನೋಡುತ್ತಿದೆ ಎಂದು ಸಚಿವಾಲಯದ ವಿಶೇಷ ಕಾರ್ಯದರ್ಶಿ ಮತ್ತು ಹಣಕಾಸು ಸಲಹೆಗಾರ ಜ್ಯೋತಿ ಅರೋರಾ ಗುರುವಾರ ನಡೆದ ಅಸ್ಸೋಚಾಮ್ ಕಾರ್ಯಕ್ರಮವೊಂದರಲ್ಲಿ ಹೇಳಿದ್ದರು.
ಇದನ್ನೂ ಓದಿ: ಹಗುರ & ಸರಳೀಕೃತ ವಿಂಡೋಸ್ 10 ಎಕ್ಸ್ ಬಿಡುಗಡೆ ಮಾಡಲ್ಲ: ಮೈಕ್ರೋಸಾಫ್ಟ್
ಮೇ 10ರಂದು ವಾಟ್ಸಾಪ್ ತನ್ನ ಹೊಸ ಗೌಪ್ಯತೆ ನವೀಕರಣವನ್ನು ಸ್ವೀಕರಿಸದ ಕಾರಣ ಯಾವುದೇ ಖಾತೆಯನ್ನು ಅಳಿಸುವುದಿಲ್ಲ ಎಂದು ಪ್ರಕಟಣೆಯಲ್ಲಿ ತಿಳಿಸಿದೆ. ಆದರೆ ಹಲವು ವಾರಗಳ ನಂತರ ವಿವಾದಾತ್ಮಕ ನಿಯಮಗಳನ್ನು ಒಪ್ಪದ ಬಳಕೆದಾರರು ತಮ್ಮ ಚಾಟ್ ಪಟ್ಟಿ ಪ್ರವೇಶಿಸಲು ಸಾಧ್ಯವಾಗುವುದಿಲ್ಲ. ಅಂತಿಮವಾಗಿ, ಅಪ್ಲಿಕೇಶನ್‌ನಲ್ಲಿ ಒಳಬರುವ ಫೋನ್ ಅಥವಾ ವಿಡಿಯೋ ಕರೆಗಳಿಗೆ ಉತ್ತರಿಸಲು ಸಾಧ್ಯವಾಗುವುದಿಲ್ಲ.
ಇದು ಎಲ್ಲಾ ಬಳಕೆದಾರರಿಗೆ ಒಂದೇ ಸಮಯದಲ್ಲಿ ಆಗುವುದಿಲ್ಲ. ನಿಮ್ಮ ಚಾಟ್ ಪಟ್ಟಿಯನ್ನು ಪ್ರವೇಶಿಸಲು ನಿಮಗೆ ಸಾಧ್ಯವಾಗುವುದಿಲ್ಲ. ಆದರೆ ಒಳಬರುವ ಫೋನ್ ಮತ್ತು ವಿಡಿಯೋ ಕರೆಗಳಿಗೆ ನೀವು ಇನ್ನೂ ಉತ್ತರಿಸಬಹುದು. ನೀವು ಅಧಿಸೂಚನೆಗಳನ್ನು ಸಕ್ರಿಯಗೊಳಿಸಿದ್ದರೆ, ಸಂದೇಶವನ್ನು ಓದಲು ಅಥವಾ ಪ್ರತಿಕ್ರಿಯಿಸಲು ನೀವು ಅವುಗಳನ್ನು ಟ್ಯಾಪ್ ಮಾಡಬಹುದು ಅಥವಾ ತಪ್ಪಿದ ಫೋನ್ ಅಥವಾ ವಿಡಿಯೋ ಕರೆಯನ್ನು ಮರಳಿ ಕರೆ ಮಾಡಬಹುದು ಎಂದು ಹೇಳಿದೆ.
120 ದಿನಗಳ ನಿಷ್ಕ್ರಿಯತೆಯ ನಂತರ ವಾಟ್ಸಾಪ್ ಖಾತೆಗಳನ್ನು ಸಾಮಾನ್ಯವಾಗಿ ಅಳಿಸಲಾಗುತ್ತದೆ. ಇದರಲ್ಲಿ ನಿಷ್ಕ್ರಿಯತೆಯು ಬಳಕೆದಾರರು ಮೆಸೇಜಿಂಗ್ ಪ್ಲಾಟ್‌ಫಾರ್ಮ್‌ಗೆ ಸಂಪರ್ಕ ಹೊಂದಿಲ್ಲ ಎಂದು ಸೂಚಿಸುತ್ತದೆ. ಈ ತಿಂಗಳ ಆರಂಭದಲ್ಲಿ ಫೇಸ್‌ಬುಕ್ ಒಡೆತನದ ಕಂಪನಿಯು ಬಳಕೆದಾರರು ತನ್ನ ಗೌಪ್ಯತೆ ನೀತಿ ನವೀಕರಣವನ್ನು ತನ್ನ ಮೇ 15ರ ಗಡುವಿನೊಳಗೆ ಸ್ವೀಕರಿಸುವುದಿಲ್ಲ ಎಂದು ಹೇಳಿತ್ತು.
