ನವದೆಹಲಿ:ಪ್ರಧಾನಿ ನರೇಂದ್ರ ಮೋದಿ ಸರ್ಕಾರದ ಕೆಲ ಕ್ರಮಗಳಿಂದ ಈ ವರ್ಷ ಅಮೆರಿಕ ಮತ್ತು ಚೀನಾ ದೇಶಗಳಿಂದ ಆಮದು ಕಡಿಮೆಯಾಗುವುದರೊಂದಿಗೆ ರಫ್ತು ಪ್ರಮಾಣ ಗಮನಾರ್ಹ ಏರಿಕೆ ಕಂಡಿದೆ.
ಕೇಂದ್ರ ಮಾಹಿತಿಯ ಪ್ರಕಾರ, 2020ರ ಸೆಪ್ಟೆಂಬರ್‌ನಲ್ಲಿ ಅಮೆರಿಕಕ್ಕೆ ಭಾರತದ ರಫ್ತು 5.1 ಬಿಲಿಯನ್ ಡಾಲರ್ ಆಗಿದ್ದು, 2019ರಲ್ಲಿ ಇದೇ ತಿಂಗಳು 4.4 ಬಿಲಿಯನ್ ಡಾಲರ್ನಷ್ಟು ರಫ್ತು ಮಾಡಲಾಗಿತ್ತು. ಈ ಮೂಲಕ ರಫ್ತು ಪ್ರಮಾಣ ಶೇಕಡಾ 15.5ರಷ್ಟು ಹೆಚ್ಚಾಗಿದೆ.
ಇದಲ್ಲದೆ ಅಮೆರಿಕದಿಂದ ಆಮದು ಪ್ರಮಾಣ ಶೇಕಡಾ 34.3 ಇಳಿಕೆ ಕಂಡಿದೆ. 2019ರಲ್ಲಿ 2.8 ಬಿಲಿಯನ್ ಡಾಲರ್ನಷ್ಟು ಆಮದು ಮಾಡಿಕೊಳ್ಳಲಾಗಿತ್ತು. ಆದರೆ ಈ ವರ್ಷ 1.8 ಬಿಲಿಯನ್ ಡಾಲರ್ಗೆ ತಲುಪಿದೆ.
ಅದೇ ರೀತಿ ಈ ವರ್ಷ ಏಪ್ರಿಲ್ನಿಂದ ಸೆಪ್ಟೆಂಬರ್ ನಡುವಿನ ಅವಧಿಯಲ್ಲಿ ಚೀನಾದಿಂದ ಆಮದು ಪ್ರಮಾಣ ಕಡಿಮೆಯಾಗಿದೆ. ಕಳೆದ ವರ್ಷ 36.3 ಬಿಲಿಯನ್ ಡಾಲರ್ನಷ್ಟು ಆಮದು ಮಾಡಿಕೊಳ್ಳಲಾಗಿತ್ತು. ಆದರೆ ಈ ವರ್ಷ 27.4 ಬಿಲಿಯನ್ ಡಾಲರ್ಗೆ ಇಳಿದಿದೆ. ಈ ಮೂಲಕ ಆಮದು ಪ್ರಮಾಣ ಶೇಕಡಾ 24.5ರಷ್ಟು ಕಡಿಮೆ ಆಗಿದೆ.
ಚೀನಾಕ್ಕೆ ಭಾರತೀಯ ರಫ್ತು ಪ್ರಮಾಣ ಶೇಕಡಾ 26.3ರಷ್ಟು ಏರಿಕೆಯಾಗಿದ್ದು, 2019ರಲ್ಲಿ 8.4 ಬಿಲಿಯನ್ ಡಾಲರ್ನಷ್ಟು ರಫ್ತು ಮಾಡಲಾಗಿತ್ತು. ಆದರೆ ಈ ಬಾರಿ 10.6 ಶತಕೋಟಿ ಡಾಲರ್ ತಲುಪಿದೆ ಎಂದು ಕೇಂದ್ರ ಮಾಹಿತಿ ನೀಡಿದೆ.