ಒಂದೇ ಒಂದು ಜೂಮ್ ಕರೆಯಲ್ಲಿ 900ಕ್ಕೂ ಹೆಚ್ಚು ಉದ್ಯೋಗಿಗಳನ್ನು ವಜಾಗೊಳಿಸಿದ ಬಾಸ್!

ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿದ ಸಂಸ್ಥೆಯೊಂದು ಅನಿವಾರ್ಯ ಕಾರಣಗಳಿಂದ ಆನ್​ಲೈನ್​ ಮೀಟಿಂಗ್​ನಲ್ಲಿಯೇ 900ಕ್ಕೂ ಹೆಚ್ಚು ಉದ್ಯೋಗಿಗಳನ್ನು ಕೆಲಸದಿಂದ ಕಿತ್ತು ಹಾಕಿದೆ. ಕಂಪನಿಯ ಸಿಇಒ ಆದೇಶಕ್ಕೆ ಜೂಮ್ ಆನ್​ಲೈನ್​ ಮೀಟಿಂಗ್​ಗೆ ಹಾಜರಾಗಿದ್ದವರಿಗೆಲ್ಲ ಶಾಕ್​ ಆಗಿದೆ. ​

ನ್ಯೂಯಾರ್ಕ್:ಒಂದೇ ಒಂದು ಆನ್​ಲೈನ್​ ಮೀಟಿಂಗ್​ನಲ್ಲಿ ಏಕಾಏಕಿ 900ಕ್ಕೂ ಹೆಚ್ಚು ಉದ್ಯೋಗಿಗಳನ್ನು ಕೆಲಸದಿಂದ ತೆಗೆದುಬಿಟ್ಟರೆ ಹೇಗಾಗಬಹುದು? ಆ ಕೆಲಸಗಾರರ ಪರಿಸ್ಥಿತಿಯನ್ನು ಊಹಿಸುವುದು ಕಷ್ಟ. ನ್ಯೂಯಾರ್ಕ್ ಮೂಲದ ಒಂದು ಕಂಪನಿ ದಿಢೀರ್​ ಎಂಬಂತೆ ಜೂಮ್ ಆನ್​ಲೈನ್​ ಮೀಟಿಂಗ್​ನಲ್ಲಿ ತನ್ನ ಕಂಪನಿ ಉದ್ಯೋಗಿಗಳನ್ನು ತೆಗೆದುಹಾಕಿದೆ.

ಜೂಮ್ ಕರೆಯಲ್ಲಿ ಉದ್ಯೋಗಿಗಳನ್ನು ವಜಾಗೊಳಿಸಿದ ಬಾಸ್:

ಕೊರೊನಾದಿಂದ ಅನೇಕರು ಮನೆಯಿಂದಲೇ ಕೆಲಸ ಮಾಡುತ್ತಿದ್ದು ಕಂಪನಿಯ ಸ್ಥಿತಿಯನ್ನು ಚರ್ಚಿಸಲು Better.com ಕಂಪನಿಯ ಮಾಲೀಕ ವಿಶಾಲ್ ಗಾರ್ಗ್ ಎಂಬುವರು ಜೂಮ್ ಆನ್​ಲೈನ್​ ಮೀಟಿಂಗ್​ ಕರೆದಿದ್ದರು. ಆದರೆ, ಕಂಪನಿ ಬಗ್ಗೆ ಚರ್ಚಿಸದೇ ಇದ್ದಕ್ಕಿದ್ದಂತೆ ಅಲ್ಲಿಯ 900ಕ್ಕೂ ಹೆಚ್ಚು ಕೆಲಸಗಾರರನ್ನು ಅದೇ ಆನ್​ಲೈನ್​ ಮೀಟಿಂಗ್​ನಲ್ಲೇ ತೆಗೆದುಹಾಕಿದ್ದಾರೆ.

ಕೆಲವು ಅನಿವಾರ್ಯ ಕಾರಣಗಳಿಂದ ಕೆಲವರನ್ನು ಕಂಪನಿಯಿಂದ ವಜಾ ಮಾಡಬೇಕಾಗಿದೆ. ಆ ನತದೃಷ್ಟರು ನಿಮ್ಮ ನಡುವೆಯೂ ಇದ್ದಾರೆ. ಈಗಾಗಲೇ ಶೇ 9ರಷ್ಟು ಉದ್ಯೋಗಿಗಳನ್ನು ಕೆಲಸದಿಂದ ವಜಾ ಮಾಡಲಾಗಿದೆ ಎಂದಿದ್ದಾರೆ. ಕಂಪನಿ ಮಾಲೀಕ ವಿಶಾಲ್ ಅವರ ದಿಢೀರ್​ ಆದೇಶಕ್ಕೆ ಜೂಮ್ ಆನ್​ಲೈನ್​ ಮೀಟಿಂಗ್​ಗೆ ಹಾಜರಾಗಿದ್ದವರಿಗೆಲ್ಲ ಶಾಕ್​ ಆಗಿದೆ. ​

ಕಂಪನಿಯ ಮುಖ್ಯ ಹಣಕಾಸು ಅಧಿಕಾರಿ ಕೆವಿನ್ ರಯಾನ್ ಈ ಕುರಿತು ಪ್ರತಿಕ್ರಿಯಿಸಿದ್ದು, ಮಾರುಕಟ್ಟೆಯಲ್ಲಿ ದಿನನಿತ್ಯ ಬರುತ್ತಿರುವ ಪ್ರಮುಖ ಬದಲಾವಣೆಗಳಿಂದಾಗಿ ಇದು ನಮಗೆ ಅನಿವಾರ್ಯವಾಗಿತ್ತು. ಹಾಗಾಗಿ ಉದ್ಯೋಗಿಗಳನ್ನು ವಜಾಗೊಳಿಸುವ ನಿರ್ಧಾರಕ್ಕೆ ಬರಲಾಗಿದೆ ಎಂದಿದ್ದಾರೆ.

ಇದನ್ನೂ ಓದಿ: ಗೂಗಲ್ ಶೀಟ್‌ ಬಗ್ಗೆ ಪಾಠ ಮಾಡುವ ಈ ಸುಂದರಿಯ ಸಂಬಳ ಎಷ್ಟು ಗೊತ್ತಾ?